MALAKAI
La Buki
Kabovitouula
Mapilana Malakai La Buki leima otutala Bwala Kwebumaboma mapilana Yerusalem ikaliivauwaisi, katitaikina 450 BC. Matauna tovitoubobuta la nanamsa siligaga sainela magila tolula deli tomota bivigivauwaisi si kimadagi baisa makwaina si kabutu deli Yaubada. Mokwita bidubadu eikapusisi e gala wala itapwarorusi duwosisia baisa Yaubada. Tolula deli tomota isisasopasi baisa Yaubada, paila gala isemakavaisi duwosisia avaka ibodi bisakaisi Yaubada, deli gala ibubunasi makawala avaka ibudoki tokwabikaula baisa Yaubada la vituloki. Mitaga igau wala Guyau bima biyakali deli bikatumigileu la tomota, e mitaga ikugwa biwitali taitala la touwata paila bikatubiasi la keda deli bikamituli Yaubada la kabutu.
Buki kala katumimisa
Mina Isireli si mitugaga 1.1—2.16
Yaubada la yakala deli la nokapisi 2.17—4.6
1
Biga mabigana Guyau isaiki Malakaia paila biluki mina Isireli.
Guyau la yebwaili paila mina Isireli
Guyau ilivala baisa la tomota, kawala, “Ka, tuta komwaidona laiyebwailimi.” ++
Mitaga tomota ivitakaulasi, kawasi, “Ammakawalaga kudoki lokuyebwailimasi?”
Guyau ivitakauloki, kawala, “Ka, Iso sola bodala Yekobe isisuaisi, mitaga Yekobe deli tubula avigaki mina mbwailigu, e Iso deli tubula avigaki mina kukologu. Iso la valu odubakailab bogwa layogagi e mauna nabubolodila eivigakaisi si valu.”
Kaina matausina Iso tubula bilivalasi, matausina goli mina Edom, kawasi, “Bogwa eikodidaimi ma valusi, mitaga igau bakakaliivauwaisi.” Mitaga Guyau bivitakaula, kawala, “E bwaina wala bikaliivauwaisi, mitaga igau yeigu bakodidaimivau wala. E tomota bidokaisi boda mabudona ‘Viluwela Mitugaga’, deli ‘Mabudona tomota Guyau eigibuluwi tuta gala biwokuva?.”
Mina Isireli bigisaki mitasi vavagi makwaina e bilivalasi, kawasi, “Matauna Guyau saina topeula olopola Isireli, e makawala goli matauna topeula oluwalaisi boda ituwoli ituwoli otalila mapilana Isireli.”
Guyau ikamitilaki mabudona tolula
Guyau Topeuligaga ililivala baisa tolula, kawala, “Tuta tuta gwadi ibodi bitemmali tamala, deli towotetila ibodi bitemmali kala tokwaraiwaga. Ka, yeigu tumami, e avaka uula yokomi gala sitana kutemmalaigusi. Yeigu kami tokwaraiwaga, e avaka uula gala sitana kukwamiabaigusi. Paila kukwaluwouwaigusi, e mitaga kukwatupoisi, kawami, ‘Ammakawalaga kakaluwouwaimsi?’ E ka, mi kalawou baisa makawala - yokomi bogwa lokululasi kaula kwemigigaga ogu kwabolula. E tuvaila kukwatupoisi, kawami, ‘Ammakawalaga gala kakamiabaimsi?’ Ka, balukwaimi - yokomi lokudokaisi ulo kabolula gala avaka kala yeiwau. Avai tuta kumaiyaisi natana bulutuvalu nakau kaina nakatoula kaina napem mwada bukuvigakaisi lula baisa yeigu, ki, kudokaisi baisa gala avaka kala gaga? Kaina ibodi bukuvigikonaisi bukusakaisi natana minasina namigigaga baisa taitala tokwaraiwaga. Ki kudokaisi, bukuyomwasalaisi nanola matauna? Kaina kudokaisi binakaigali avaka mi nigada?” +
E yokomi tolula, ka, bukuvigikonaisi bukunigadasi baisa Yaubada paila bikabwailidasi! Matauna gala wala bimapu mi nigada. E ka, baisa goli kami pakula titoulemi. 10 Guyau Topeuligaga ikaibiga, kawala, “Yeigu nanogu mwada taitala yokomi bikatubodi Bwala Kwebumaboma kala lula, e makawala bisilibodaimi taga bukuvakatamakavaisi kova odabala ulo kabolula. Gala wala imwamwasila nanogu paila yokomi. Gala wala bakabwaili lula makwaisina kumiakaigusi. 11 Tomota metoya mapilana bila piliyuwela ovalu watanawa itemmalaigusi. Tomota ambaisa ambaisa igabwaisi maiina simasimina baisa yeigu, e deli igabwaisi lula makwaisina iyomwasalaigusi. Komwaidosi goli matausina itemmalaigusi. 12 Mitaga yokomi kukwaluwouwaigusi tutala kulivalasi kidamwa ulo kabolula gala isim dimlela, e tutala kugabwaisi kaula kudokaisi kwemigigaga odabala makwaina. 13 E kawami, ‘Tauwau, bogwa tasomatasi vavagi makwaisina, kadai!’ e ivinu kabulumi baisa yeigu. Paila tuta tuta kumiakaigusi natana mauna lokuveilauwaisi wala, kainaga natana napem kaina nakatoula, mwada bukuvigakaisi lula baisa yeigu. E kwatulaisi? Kudokaisi bogwa bakabwaili mi lula? 14 Abuloti matauwena tosasopa availa eilula natana mauna namagaga baisa yeigu, mitaga olumoulela la yawa eisisii natana namatabwaila bogwa eikatotilabogwa mwada bisakaigu. Paila yeigu goli giyouveka, e tomota metoya komwaidona boda ituwoli ituwoli ikukolaigusi.”
a 1:1 Maigana kala katumiki “ulo tokamatula”. + 1:2 1.2-3 Rm 9.13 + 1:2 1.2-5 Ais 34.5-17; 63.1-6; Yer 49.7-22; Isi 25.12-14; 35.1-15; Emo 1.11-12; Obe 1-14 b 1:3 Mapilana Edom opapala Milaveta Pilamata mapilana opilibolimila. + 1:8 1.8 Kak 15.21