7
1 Baisa tuta bogwa leivinakwaisi kaliai kalila valu, deli eivitomiliwolaisi komwaidona kalapisila tabodasi, e inagaisi si paisewa boda mabudosina, Bwala Kwebumaboma kala toyamata, mabudona tousiwosi tobumaboma, deli mabudona mina Libai.
2 E yeigu anagi taiyu tauwau paila bikaraiwogaisi viloumwaidona Yerusalem. taitala matauna bodagu yagala Anani, e taiyuwela Ananaia, matauna tokabilia si kumatoula. Ananaia isim kala dubumi, deli itemmali Yaubada e gala taitala bipati matauna.
3 E yeigu aluki matausina gala biulaimwaisi kalapisilela Yerusalem kaukwau, tatoula wala bipela kalasia biulaimwaisi, e igau wala kalasia eitotu bikatubodaisi deli bikatukikitaisi makaduyosina, e oluviga toyamata bilosi ivaiwasisi tutala kalasia bisalili. Yeigu tuvaila aluki matausina binagaisi toyausa metoya oluwalaisi tomota matausina tosisula Yerusalem e binagaisi mimilisi bisibodaisi kaboyausa kwaitala kwaitala deli mimilisi biuvakawalisi wala opapala si bwala titoulesi.
Yagasi matausina eikaimilavausi metoya okatupipi
4 Yerusalem valu vilouveka, mitaga ivigaki makawala viloububagewa wala, deli gala ibawa bwala leikaliaisi.
5 E Yaubada iviyelu nanogu bakoguguli tomota deli kasi tokugwa deli goli tokwaraiwaga e baviyeluvau liliusi. E abani giniginila liliusi matausina tomaibogwa metoya okatupipi, e kasi liliu labani baisa makawala.
6 Bidubadu matausina eisisuaisi okatupipi isilavaisi Babilonia e ikaimilavausi Yerusalem deli Yuda, taitala taitala matausina ikaimilavau wala ila ola valu tatoula. E ola tuta guyau Nebukadinesa matauna ilau veisia Babilonia. Matausina isisuaisi wala okatupipi leima lagaila.
7 E kasi tokugwa yagasi Serubabela, Yosuwa, Niemaia, Asaraia, Raamia, Naamani, Modekai, Bilisani, Misipereti, Bigivai, Neum, deli Baanai.
8-25 Baisa yagasi Isireli dalesi dilatala dilatala deli kasi bawa tomota metoya dala dilatala dilatala matausina eikaimilavausi metoya okatupipi.
Parosi - 2,172
Sepatia - 372
Arai - 652
Peati Mowabi matauna (tabula Yesuwa sola Yoabi) - 2,818
Elam - 1,254
Satu - 845
Sakai - 760
Binui - 648
Bebai - 628
Asagadi - 2,322
Adonikam - 667
Bivigai - 2,067
Adini - 655
Ateri (igiyuwela Esekaia) - 98
Asum - 328
Besai - 324
Aripi - 112
Gibioni - 95
26-38 E tuvaila mabudona tomota eikaimilavausi oviloutabusi mavilousina.
Bedeliem deli Netopa - 188
Anatoti - 128
Beta Asimaveta - 42
Kiriati Yearim, Kepira, Biaroti - 743
Rama deli Geba - 621
Mikimasi - 122
Beteli deli Ai - 123
Vilouyuwela Nebo - 52
Vilouyuwela Elam - 1,254
Arim - 320
Yeriko - 345
Lodi, Adida, deli Ono - 721
Senaa - 3,930
39-42 Baisa tolula tubusia yagasi matausina eikaimilavausi metoya okatupipi.
Yedaia (matauna Yesuwa tabula) - 973
Imera - 1,052
Pasuru - 1,247
Arim - 1,017
43-45 Mina Libai dalesi matausina eikaimilavausi metoya okatupipi.
Yesuwa deli Kadimieli (matausina Odavia tubula) - 74
Bwala Kwebumaboma towaisi gita matausina (Asapi tubula) - 148
Bwala Kwebumaboma kala toyamata matausina (tubusia, Salum, Ateri, Talimoni, Akubi, Atita, deli Sobai) - 138
46-56 Dala madalasina kala tokwaliai Bwala Kwebumaboma matausina eikaimilavausi metoya okatupipi.
Siya, Asupa, Tabaoti,
Kerosi, Sia, Padoni,
Lebana, Agaba, Salimai,
Anana, Gideli, Gari,
Reaya, Resini, Nekoda,
Gasam, Usisa, Pasea,
Besai, Meunim, Nepusesim,
Bakibuki, Akupa, Arura,
Basiliti, Meida, Arisa,
Bakosi, Sisera, Temai,
Nesia, deli Atipa.
57-59 Dala madalasina Solomoni la towotetila matausina eikaimilavausi metoya okatupipi.
Sotai, Sopereti, Perida,
Yaala, Dakoni, Gideli,
Sepatia, Atili, Pokereti Asebaim, deli Amona.
60 E kasi bawa tubusia tokwaliai Bwala Kwebumaboma deli Solomoni la towotetila matausina eikaimilavausi metoya okatupipi - 392.
61-62 E madalasina Delaia, Tobia, deli Nekoda dalesi kasi bawa - 642. Matausina eikaimilavausi metoya valu mavilousina, Teli Mela, Teli Arisa, Kerubi, Adoni, deli Ima, mitaga matausina gala inikolaisi mokwita kaina dalesi mina Isireli kaina gala.
63-64 E tuvaila matausina dalesi tolula, Obaia, Akosi, deli Basilai gala ibanaisi giniginila liliusi paila bikamokwitaisi ammatausina tubusia. (Basilai tabula matauna ivaiya natana vivila metoya odalela Basilai guma Giliadi, e matauna ikaimapu yawala dalela.) E inainevisi gala ibanaisi ammatausina tubusia mokwita, mapaila gala ikamokwitaisi matausina dalesi tolula.
65 Mapaila tokaraiwogala Yudia iluki matausina gala ibodi bikamsi kaula makwaisina leisemakavaisi baisa Yaubada tatoula wala bibanaisi taitala tolula matauna ibodi biwotitali makwaisina Urim deli Tumim.
66-69 Kasi bawa komwaidona matausina eikaimilavausi metoya okatupipi makawala - 42,360
Si ula tauwau deli vivila - 7,337
Tomwasawesi kaigilagela tauwau deli vivila - 245
Wosa - 736
Miuli - 245
Kameli - 435
Ase - 6,720.
70-72 Bidubadu matausina itugwalaisi si veiguwa paila bipilasaisi mapula youdulela Bwala Kwebumaboma kala kaliaivau.
Tokaraiwaga la pilasi -
goula kala vakaila tala beyawa (8 kg)
kailuwolima kailuyala paka
lakatulima yaluwotolu tolula kasi kwama
Tommoyesi dala dilatala dilatala si pilasi -
goula kala vakaila luwotolu vasi peta (168 kg)
siliba kala vakaila makawala gulotala taitu uvalima isividoga (1,250 kg)
Kesala tomota si pilasi -
goula kala vakaila luwotolu vasi peta (168 kg)
siliba kala vakaila luwoyu lima yuwa peta (140 kg)
yaluwolima yaluwotala yalima yayu tolula kasi kwama.
73 E tolula, mina Libai, Bwala Kwebumaboma kala toyamata, tomwasawesi kaigilagela, deli tomotamakava wala, Bwala Kwebumaboma kala topaisewa - komwaidosi wala mina Isireli - imilivalusi olopola mavilousina valu oviluwela Yuda.