7
Tokugwa si semakavi
Oyamla makwaina Mosese eivigimkulovi kala kaliai Guyau la Buliyoyova, ivaputumi deli ikabomi makwaina deli goli guguwala komwaidona, deli kabogwabu lula toyo guguwala komwaidona. Oluvi gweguyala dala madalasina matausina kasi tokugwa mina Isireli, matausina goli leinagaisi paila bipilasisi sonukula makwaina, imaiyaisi si semakavi baisa Guyau kala bawa makawala. kailima kaitala waga kaibibiu deli naluwotala nayu bulumakau, kaitala waga kaibibiu paila taiyu tokugwa si semakavi, e natana bulumakau paila taitala taitala matausina tokugwa la semakavi. Avai tuta guguwa makwaisina bogwa leisakaisi Guyau, e Guyau iluki Mosese kawala, “Kukwau guguwa makwaisina paila bipilasi wotitalela Buliyoyova; e kusaiki mina Libai paila avaka bipilasi si paisewa.” Mapaila Mosese isaiki mina Libai makaisina waga kaibibiu deli minasina bulumakau. Kaiyu makaisina waga kaibibiu deli navasi bulumakau isaiki dala Gerisoni, e kaivasi waga kaibibiu deli nalima natonu bulumakau isaiki dala Merari. E avaka Itama matauna Eroni latula biluki matausina bivagaisi makawala. Mitaga dala Kowati isibwaigasi Mosese gala isaiki waga kaibibiu deli bulumakau paila uula guguwa kwebumaboma eiyamataisi ikikatikewaisi okaiyasi.
10 E tokugwa matausina tuvaila imaiyaisi si semakai paila bipakasi kala kaboma kabogwabu lula. Avai tuta bogwa bisailisi si semakavi okabogwabu lula, 11 Guyau iluki Mosese kawala, “Kuluki matausina kidamwa olopola kweluwotala kwaiyu yam e yam kwaitala kwaitala makwaisina tokugwa taitala taitala ibodi bisemakavi la semakavi okabogwabu lula paila bivigaki kala kaboma kabogwabu lula makwaina.”
12-83 Baisa makawala kala takasa paila si semakavi leisakaisi.
 
Yam Dala Tokugwai
1st Yuda Nasoni
2nd Isaka Netaneli
3rd Sebuloni Eliabi
4th Rubeni Elisura
5th Simioni Selumieli
6th Gada Eliasapi
7th Epereim Elisama
8th Manasa Gamalieli
9th Beniamina Abidani
10th Dani Aiesa
11th Asera Pagieli
12th Napitalai Aira.
 
Taitala taitala matausina si semakavi imaiyaisi makawala wala. Kaitala kaboma silibawokuva kala mokaila makawala kwaitala taitu kwaiveka mokaila (1.5 kg). Deli kwelatala bolu silibawokuva kala mokaila makawala kwaitala taitu mokaila (800g). E kaboma deli bolu ikasuwoki pwarawa eitagulikaisi deli olibe bulamila paila kaula lulela. Kaitala kaboma kaikekita goulawokuva kala mokaila makawala kwaitala yagogu (110g), ikasuwoki wala lula maiina simasimina; natana namwala bulumakau natubovau, natana sipi namwala, deli natana nagwadi lam kwaitala kala taitu paila lula kwegubugabu; natana gota paila mitugaga lulela e nayu bulumakau nammwala, nalima sipi nammwala, nalima gota, deli nalima lam kwaitala kasi taitu paila kalubaila lulela.
84-88 E komwaidona kala bawa si semakavi makwaisina leimaiyaisi matausina tailuwotala taiyu tokugwala Isireli paila kala kaboma kabogwabu lula makwaina baisa makawala kala bawa.
- keluwotala kaiyu kaboma silibawokuva wala deli kwelaluwotala kwelayu bolu silibawokuva wala komwaidona kasi mokaila makawala lima yuwa petala kaula (28 kg)
- keluwotala kaiyu keiluya goulawokuva wala ivakasuwoki wala lula maiina simasimina kala mokaila komwaidona makawala kwaitala taitu kwaiveka
- e tuvaila buluwotala nayu bulumakau nammwala, buluwotala nayu sipi nammwala, deli buluwotala nayu lam kasi taitu kwaitala, e toyo kaula lulela bisegulikaisi paila lula kwegubugabu
- buluwotala nayu gota paila mitugaga lulela, e buluwoyu navasi bulumakau nammwala, buluwolima buluwotala sipi nammwala, buluwolima buluwotala gota, buluwolima buluwotala lam kasi taitu kwaitala paila kalubaila lulela.
89 Avai tuta Mosese eisuvi olumoulela Guyau la Buliyoyova paila bibigatonasi kasitaiyu Guyau, matauna inakaigali Guyau kaigala iluluki matauna metoya odabala makwaina Kabutu Didawogala, oluwalaisi minasina tokolu nayu mauna isim pinupanesij eiyoudulaisi odabala makwaina.
i 7:12-83 (Nasoni matauna Aminadaba latula, Netaneli matauna Suwa latula, Eliabi matauna Eloni latula, Elisura matauna Sedeuri latula, Salumieli matauna Surisadai latula, Eliasapi matauna Deueli latula, Elisama matauna Amiuda latula, Gamalieli matauna Pedasura latula, Abidani matauna Gidioni latula, Aiesa matauna Amisadai latula, Pagieli matauna Okirana latula, Aira matauna Enani latula.) j 7:89 Nayu mauna isim pinupanesi. Kugisi Biga Kala Katumiki.