10
Nigada paila karaiwaga duwosisia
1 Mwa Guyau! Avaka paila saina kusikaduwonaku?
Avaka paila kukwatupwanaim titoulem avai tuta lakabodasi mwau?
2 Tomitugaga deli ninasi walakaiwa ilamidadaisi tonamakava.
Ibodi matausina biwaisi metoya makaisina sikula leilaleiyasi.
3 Tomitugaga la nanamsa gaga ivigaki la kamnomwana,
e togugoveka ibigigagi Guyau deli ikoulovi matauna.
4 Tomitugaga gala ikamiabi Guyau.
Metoya onanola walakaiwa matauna idoki Yaubada gala isim dimlela.
5 Tomitugaga iyubwaila ola vavagi komwaidona.
Matauna gala ikikateta paila Yaubada la yakala.
Ivakaluwou komwaidosi kala tilaula.
6 E ininamsi titoulela kawala, “Galaga bakapusi.
Yeigu gala avai tuta baboda mwau.”
7 Kala livala ivakasau bigigaga, sopa deli vitukokola.
Matauna saina nanakwa bikatilaka deli bimmatowa.
8 Matauna isupepuni wala ovalu,
iuwayausa mwada bikatumati tobubwaila.
E ikuukwauta paila matausina availa availa mwada biyogagi.
9 Matauna isupepuni iuwayausa makawala laiyoni.
Matauna ikanapwala itutuli tonamakava,
e bisikoli matausina metoya okala sikula e bibia bilau.
10 Tobubwaila ikaligasi paila gala availa bipilasi,
paila ola tumolaula ikalisau matausina.
11 Tomitugaga ininamsi titoulela kawala,
“Yaubada gala wala bikaiki wowola avaka!
Matauna bogwa itabodi matala e gala wala avai tuta bigisaigu!”
12 Mwa Guyau! Kumipuki matausina tomitugaga,
e kululuwaiga matausina leibodasi mmayuyu.
13 Ammakawala tomitugaga bikaluwou Yaubada
e bininamsi titoulela kawala, “Matauna galaga bimipukwaigu”?
14 Mitaga yoku bogwa lokugigisi goli,
e kululuwai matausina eibodasi mwau deli mmayuyu,
e yoku kutitobogwa wala paila bukupilasi.
Tomama ikatilavi titoulela baisa yoku.
Yoku tuta komwaidona kupilasi matausina gumalawa.
15 Ibodi bukukwatudidaimi si peula tomitugaga.
Ibodi bukumipuki paila avai sula bogwa eivagaisi,
tatoula wala bipakaisi sula makwaina.
16 Yaubada matauna Guyau Tosivagasi.
Matausina ititapwarorusi baisa ituwoli yaubada
igau bitamwausi metoya ola valu.
17 Mwa Guyau! Ibodi bukunakaigali si nigada matausina tommanum,
e bukukwatupewoli matausina.
18 Yoku bukulagi si dou matausina eibodasi lamadada deli matausina weilova,
e bukukwabwaili matausina oyakala.
Mapaila mina watanawa gala tuvaila bivitukokolasi.