103
Yaubada la yebwaili
1 Bilomagu, kuyakawoli Guyau,
e tomwaidogu goli, bayakawoli matauna tobumaboma.
2 Bilomagu, kuyakawoli Guyau,
e taga kulumwelavi la ninabwaila.
3 Iligaiwa komwaidona ulo mitugaga
e iyomovaigu metoya agu lelia komwaidona.
4 Ikaliduboli agu laka
e imitukwaiyaigu metoya ola yebwaili deli la nokapisi.
5 Isemakavi bidubadu vavagi bwaina baisa yeigu,
e mapaila agu lumkola totubovau yeigu,
deli ulo peula makawala mluveka la peula.
6 Guyau ipii matausina eibodasi lamadada,
e ivagi avaka bibodi matausina si kaisisu.
7 Eiyomitali nanola baisa Mosese,
e itagwala mina Isireli bigisaisi la vavagi topilaveka.
8 Guyau matauna tonokapisi deli toyebwaili.
Matauna la gibuluwa iyobali, e la mitakwai gala avai tuta biwokuva.
9 Gala bikamitilakaidasi tuta komwaidona paila da mitugagasi,
paila la ninamwau isim kala kalitutila.
10 Gala bimipukwaidasi makawala avaka bibudokaidasi,
e gala bimipukwaidasi paila da mitugagasi deli da sulasi.
11 Labuma isisu saina walakaiwa sainela odabala pwaipwaia,
e makawala goli kala vakaila la yebwaili baisa availa availa itemmalaisi matauna.
12 Kala woloula opilibomatu bila opilikwaibwaga,
e makawala goli kala maloula biligaiwa da mitugagasi metoya baisa yakidasi.
13 Taitala tau la ninabwaila baisa litula saina bwainigaga,
e makawala goli Yaubada la ninabwaila baisa availa availa itemmalaisi matauna.
14 Matauna iluluwai ammakawala eibubulaidasi.
Inikoli wala kidamwa yakidasi pwaipwaia.
15 Yakidasi goli da momovasi makawala mnumonu.
Tatovakavekasi takaitubwasi makawala kai lalela saina nanakwa iluwai e ikatuyawai.
16 E oluvi yagila iuu e bogwa eitamwau makaina,
e gala wala bitagisivau tuvaila.
17 Mitaga Guyau la yebwaili bikanuvagasi baisa availa availa itemmalaisi matauna,
e la bobwailila bikanigaga baisa avai tubwa avai tubwa
18 paila matausina availa availa itemmalaisi la kabutu,
deli ikabikuwolaisi la karaiwaga makwaisina deli si kimadagi tuta komwaidona.
19 Guyau isaili la takaikaia walakaiwa wa labuma,
e matauna guyoula vavagi komwaidona.
20 Eei, yokomi anelosi topeuligaga, kuyakawolaisi Guyau.
Paila yokomi kukwabikuwolaisi la karaiwaga makwaisina
deli kunakaigalaisi avaka la biga.
21 Yokomi towalakaiwa topapeula, kuyakawolaisi Guyau.
Paila yokomi la towotetila, e kuuvagaisi nanola.
22 Komwaidomi la bubuli tommomova
ambaisa ambaisa iguguyoi goli, kuyakawolaisi Guyau.
Bilomagu, kuyakawoli Guyau.