115
Yaubada tomitakwai tokimadagi
1 Mwa Guyau! Ibodi bakakavisaimsi wala yoku e kammwaleta wala yoku,
e galaga yakamaisi,
paila uula m mitakwai deli m kimadagi.
2 Avaka uula boda ituwoli ituwoli bikatupoiyaidasi,
kawasi, “Ambaisaga mi Yaubada?”
3 Da Yaubadasi isisu wala wa labuma,
e iuvagi avaka avaka magila bivagi.
4 Matausina eibubulaisi si yaubada metoya siliba deli goula,
e oyumasi wala eiyoudulaisi minasina.
5 Minasina isim udosi, mitaga gala gagabila bilivalasi,
e isim mitasi, mitaga gala gagabila bigisasi.
6 Isim taigasi, mitaga gala gagabila bilegasi,
e kabulusi, mitaga gala gagabila bisikonasi.
7 Isim yumasi, mitaga gala gagabila bikabikonasi,
e kaikesi, mitaga gala gagabila biloulasi.
Gala gagabila bilivalasi, ikikapatusi wala.
8 Ibodi goli komwaidosi availa availa eibubulaisi e eidubumaisi minasina,
bidavilasi bimila tokolusi makawala wala minasina bogwa eibubulaisi.
9 E yokomi mina Isireli bukudubumaisi Guyau.
Matauna ipilasaimi e ikolaimi.
10 Yokomi la tolula Yaubada, bukudubumaisi Guyau.
Matauna ipilasaimi e ikolaimi.
11 Komwaidomi yokomi totapwaroru, bukudubumaisi Guyau.
Matauna ipilasaimi e ikolaimi.
12 Guyau iluluwaidasi e bimitukwaiyaidasi.
Matauna bimitukwaii mina Isireli
deli komwaidosi Yaubada la tolula.
13 Bogwa bimitukwaii komwaidosi availa availa itemmalaisi matauna,
gweguya deli goli tokai.
14 Ibodi Guyau bisakaimi litumia,
e yokomi deli litumia bukuunigeyaisi goli.
15 Ibodi Guyau bimitukwaiyaimi,
matauna kala tobubuli valu walakaiwa deli watanawa.
16 Labuma baisa Yaubada kalamwaleta wala la vavagi,
mitaga valu watanawa bogwa isaiki tomota.
17 Tomata gala wala biyakawolaisi Guyau.
Matausina tolesi Tuma gala wala biyakawolaisi matauna.
18 Mitaga yakidasi tommomova bogwa bitanokagutokisi baisa matauna,
tuta baisa deli tuta gala biwokuva.
Kala yakaula Guyau.