2
Yaubada bogwa einagi taitala guyau
1 Avaka uula boda ituwoli ituwoli mwada bikoulovaisi kasi karaiwaga?
E avaka uula tomota ikikeiwalamakavasi?
2 Si gweguya eipoisivisisi,
e kasi tokwaraiwaga ikikeiwalasi mwada bikoulovaisi Guyau Yaubada,
deli bikoulovaisi guyau matauna availa Yaubada bogwa einagi.
3 E kawasi, “Ka, bitatanekwaidasi metoya osi karaiwaga,
e karaiwaga makwaina bitapakaisi, kadai!”
4 Guyau Yaubada ola takaikaia wa labuma igigili matausina,
e iyosokani si nanamsa saina gewagewa.
5 Oluvi deli la gibuluwa ikamitilaki matausina,
e metoya ola gidaleiya sainela ivitukukoli matausina.
6 E ikaibiga kawala, “Ogu koya kwebumaboma mapilana Saiyoni,
bogwa lavasani guyau matauna availa lanagi.”
7 E guyau matauna ilivala, kawala,
“Yeigu bakamituli avaka Guyau eikaibigi.
Matauna eilukwaigu kawala, ‘Yoku latugu.
Yam lagaila bukudokaigu tamam.
8 Ka, bukunigadaigu, e basakaim komwaidona boda ituwoli ituwoli.
Bogwa basakaim komwaidona valu watanawa.
9 Oyamam bukuyosi kaitala tanumnumta,
baisa kabutuvitusila m kwaraiwaga kala peula,
e bukukwatuvi mabudosina boda.
Bogwa bukukwatumimisi mabudosina,
makawala tomota bikatumimisaisi kulia.
10 E yokomi gweguya, bukulagaisi kamitilaki makwaina,
e yokomi kasi tokwaraiwaga mina watanawa, bukutakutaisi vituloki makwaina.
11 Bukuwotitalaisi Guyau Yaubada deli mi kokola.
12 Deli mi tatuva bukukwavaginasi omatala matauna.
Kidamwaga gala - ka! Saina nanakwa bitokaia la gibuluwa,
e saina nanakwa goli bukukwaligasi.
Mitaga availa availa bilokaiasi matauna mwada bikwalasi,
matausina goli bimwasawasi.