33
Wosila yakaula
1 Yokomi tomitukwaibwaila, bukugovasi deli mwasawa,
paila uula vavagi makwaisina avaka Guyau bogwa eivagi.
Kuyakawolaisi matauna, komwaidomi availa availa kukwabikuwolaisi matauna.
2 Bukunokagutokisi baisa Guyau deli mi gita,
e oyumami gita kaivakaveka bukuusiwosisi baisa matauna.
3 Kuwosisi wosi pilavau baisa matauna.
Kuwawaisi mi gita deli mi katugweimila,
e bukugovasi deli mwasawa.
4 Yaubada la biga komwaidona biga mokwita
e gagabila bitadubumi komwaidona avaka avaka iuvagi.
5 Guyau iyebwaili mitukwaibwaila deli karaiwaga duwosisia,
e la mitakwai ivakasau valu watanawa.
6 Guyau ibubuli valu walakaiwa metoya ola karaiwaga.
Ibubuli kalasia, tubukona e utuyam metoya ola biga.
7 Ikouguguli bolita ivigaki gulotala,
e tilibwabwau ikatubodi okabala.
8 E yokomi mina watanawa, kukukolaisi Guyau.
Kutemmalaisi matauna, komwaidomi tomota odabala pwaipwaia.
9 Avai tuta ilivala valu watanawa ikaloubusi,
e vavagi komwaidona eikaloubusisi metoya ola karaiwaga.
10 Guyau isilibodi ninasi boda ituwoli ituwoli.
Mwada bivagaisi avaka einagaisi, mitaga Guyau gala wala itagwala.
11 Mitaga avaka avaka nanola matauna baisa bikanigaga wala.
Avaka avaka inagi bikaloubusi, gala wala biwokuva.
12 Avai boda inagaisi mwada Guyau si Yaubada, bogwa bimwasawasi.
E avai tomota Guyau einagi mwada la tomota tatoula, matausina goli bimwasawasi.
13 Guyau wa labuma ikululuki
igisi mina watanawa komwaidosi.
14 Metoya ola kabokwaraiwaga ikululuki
komwaidosi tosisula valu watanawa.
15 Ibubuli si nanamsa avaka avaka ininamsaisi,
e inikoli wala komwaidona avaka avaka iuvagaisi.
16 Taitala guyau gala bikugwa mwada uula la tokwabilia saina topapeula.
E taitala tokabilia gala wala bitomgwaga mwada uula la peuluvagasi.
17 Minasina wosala kabilia gala dimlesi paila tomgwaga.
Wosa minasina saina napapeula mitaga gala wala ibodi bikoli tomota.
18 Guyau iiyamati matausina availa availa ikabikuwolaisi matauna,
availa availa idubumaisi la mitakwai.
19 Ikoli matausina metoya okaliga,
e ikamovi matausina metoya otutala molusaula.
20 Yakidasi tapikwakwaisi Guyau.
Matauna kada Tokwalasi deli kada Topilasisi.
21 Tamwasawasi paila uula matauna.
Paila tadubumaisi matauna Tobumaboma.
22 Mwa Guyau! Ibodi bukumitukwaiyaimasi,
paila bogwa kapikwakwaimsi goli.