BUKI PILIYUWELA
42
(Sam 42—72)
Taitala tosipwala ininigada
1 Makawala minana dia saina kala daka magila bimom wa sakala
e yeigu goli makawala, iiyovi nanogu paila yoku.
2 E avinagai paila yoku, Yaubada Tomomova.
Avai tuta gagabila bawa batapwaroru baisa omatam?
3 Yam bogi auvalam,
e mitilagigu wala avigaki kʹagu.
Tuta komwaidona agu tilaula ikikatupoiyaigusi, kawasi,
“Ki, ambaisaga m Yaubada?”
4 Iwia nanogu tutala aluluwai makwaisina vavagi omitibogwa.
Aluluwai ammakawala laliloula deli tobobawa, paila bakalosi ola bwala Yaubada.
Aluluwai ammakawala lakugwai matausina tutala kaliloulasi,
e kawosisi deli kagovasi kala yakaula Yaubada, e gulitinidesi kamwasawasi.
5 Ki, avaka uula immayuyu nanogu?
Avaka uula imwau nanogu?
Ka, bogwa bapikwaku baisa Yaubada.
E deli bayakawolivau matauna,
paila matauna goli agu tokwatumova e ulo Yaubada.
6-7 Yeigu baisa tosipwala saina iwia nanogu,
e mapaila aninavila baisa ulo Yaubada.
Matauna ivigaki nanogu kala mmayuyu, makawala kaisai ikatuuvilaigu.
Labudoboda mwau makawala dadoya,
makawala dadoya wa Waya Yoridani otutala katubugibogi,
e saina dadoya ititayelu metoya makwaisina Koya Emoni deli Koya Misa,
e ibubusi butukowala saina peula butula makawala pilapala.
8 Ibodi Guyau bimitukwaiyaigu wa yam,
e wa bogi gagabila bawosi,
e bawosi wosila nigada baisa Yaubada, matauna Guyoula ulo momova.
9 E baisa makawala balivala baisa Yaubada agu tokwala.
Kawagu, “Avaka uula kulumwelavaigu?
E avaka uula lalumkoli mmayuyu sainela
metoya osi vakatutuki matausina agu tilaula?”
10 Paila imitaki wowogu metoya osi kavilaki
e ikatukoyayaigusi kawasi,
“Ki, ambaisaga m Yaubada.”
11 Ki, avaka uula immayuyu nanogu?
Avaka uula imwau nanogu?
Ka, bogwa bapikwaku baisa Yaubada,
E deli, bayakawolivau matauna,
paila matauna goli agu tokwatumova e ulo Yaubada.