50
Tapwaroru mokwita
1 Guyau matauna Yaubada Topeuligaga ililivala.
Matauna idoudou baisa viloumwaidona valu watanawa metoya opilibomatu e bila opilikwaibwaga.
2 Yaubada visigala ititapi metoya mapilana Saiyoni,
makwaina vilouveka kala gigisa saina bwainigaga.
3 Da Yaubadasi igau bima, mitaga gala kwaimanum.
Omatala bisisu kova kovalululu,
e utuyagila bitavini bitapatu matauna.
4 Matauna bidou mina labuma deli mina watanawa, matausina kala tosola,
paila bigisaisi matauna biyakali la tomota.
5 Matauna ikaibiga kawala, “Kumiakaigusi ulo tomota tokimadagi,
matausinaga bogwa lakabutu metoya osi lula.”
6 E mina labuma ikamitulaisi Yaubada matauna tomitukwaibwaila,
e matoulela goli toyakala.
7 Yaubada kawala, “Ulo tomota kunakaigalaigusi, e balivala.
Yeigu igau bakamitilakaimi, yokomi mina Isireli.
Yeigu Yaubada, mi Yaubada goli.
8 Yeigu gala akamitilakaimi paila mi lula,
deli makwaisina lula kwegubugabu tuta komwaidona lokumiakaigusi.
9 Mitaga gala magigu bulumakau nammwala metoya omi yokanikani,
kaina gota metoya omi yawa.
10 Komwaidona mauna olawodila baisa ulo vavagi wala,
deli goli minasina bulutuvalu eitotusi wala odubasi lakatuluwovila koya.
11 Komwaidona mauna nayoyowa baisa ulo vavagi,
e deli goli komwaidona mauna namomova ambaisa ambaisa.
12 “Kidamwa yeigu bakamolu, gala ibodi balukwaimi,
paila valu watanawa deli komwaidona avaka avaka olumoulela baisa ulo vavagi.
13 Ki, kudokaisi bakoma vilionesi bulumakau nammwala
kaina bamom buyavisi gota ke?
14 Ibodi nokagutoki bukuvigakaisi mi lula baisa yeigu Yaubada,
deli bukusakaigusi yeigu Topeuligaga komwaidona
avaka bogwa lokukwatotilasi mwada bukusakaigusi.
15 Kidamwa avai tuta bukubodasi mwau, kudousi baisa yeigu,
e yeigu bakatumovaimi,
e yokomiga bukuyakawolaigusi.”
16 Mitaga Yaubada iluki mina watanawa kawala,
“Ki, avaka uula bukulakasaisi ulo katuloluta?
Deli avaka uula bukulivalasi paila ulo kabutu?
17 Yokomi gala kutagwalasi kidamwa yeigu bakiduwosisiaimi,
e yokomi kupakaisi makwaisina ulo karaiwaga.
18 Yokomi kugisaisi wala matausina touveilau e kukwalubailisi,
e tuvaila kutitoulalasi osi deili tokakailasi.
19 “Yokomi tuta komwaidona kuninanamsasi wala paila bukubigigagasi.
E tuvaila gala avai tuta bukuvaiwasisi sopa.
20 Yokomi tuta komwaidona kutitabinakaisi wala budamia deli tuwamia,
e tuvaila kunainevisi wala kasi pakula matausina.
21 Yokomi bogwa lokuuvagaisi komwaidona vavagi makwaisina, e yeigula gala wala avaka alivala.
Mapaila kudokaisi wala mwada yeigu makawala wala yokomi.
Mitaga tuta baisa lakakamitilakaimi
e laiyomitali vavagi makwaisina baisa yokomi.
22 “Kulagaigusi availa availa yokomi tokatukubona.
Kidamwaga gala, yeigu bakatudoumwaimi,
e gala wala availa tuvaila bikatumovaimi.
23 Matauna availa inokagutoki baisa yeigu, ikamiabaigu,
e yeigu mokwita wala bakatumovi komwaidosi matausina availa availa ikabikuwolaigusi.”