55
La nigada taitala tau lubaila eikasali matauna
1 Mwa Yaubada! Kulagi ulo nigada.
Taga kutotubuloki ulo yokakapisi.
2 Kunakaigalaigu deli kuvitakaulokaigu.
Ulo nokubukubu bogwa eiyogagaigu.
3 Si kapoi agu tilaula bogwa eiyokukolaigu,
e tomitugaga si lamadada bogwa eisomitaki wowogu.
Matausina iyomwauwaigusi.
Igibuluwaigusi, deli goli tokukolosi yeigu.
4 Yeigu ibulukukolaigu,
deli kaliga kokolela iyomami nanogu.
5 Yeigu bogwa lakokola deli atatuva.
Kabokakayuwa saina immakiusa wowogu.
6 O kidamwa isim pinupanegu, makawala bubuna.
Gagabila bayowa balʹo babani vaiwasi.
7 Mokwita goli bayowa bala kaduwonaku
e bamili valu oviloupakala.
8 Gagabila bananakwa basipepuni
metoya yagila saina minimani deli utuyagila.
9 Mwa Guyau! Kusipinigu si bigatona agu tilaula.
Bogwa lagisi tomota iiyowaisi deli ikukwaiyaisi ovalu.
10 Ivaulaisi ivapataisi valu yam deli bogi,
e valu ivakasau sula deli vavagi mwau.
11 Kodadaimi isisu ambaisa ambaisa.
Kedala valu ikasewa lamadada deli wabu.
12 Kidamwa taitala tilaula biyosokanaigu,
gagabila bapeuloki.
E kidamwa taitala tokominimani bikaluvalova baisa yeigu,
yeigu gagabila basipepuni metoya baisa matauna.
13 Mitaga baisa yoku kalogu lokuyosokanaigu!
Yoku sogu deli lubaigu tatougu.
14 Bogwa tabigikium kadataiyu,
deli kadataiyu tatapwaroru wa Bwala Kwebumaboma.
15 Bibodi agu tilaula bikaligasi igau gala bibodi si tuta.
Ibodi matausina bibusisi tommomova bilosi Tuma!
Mitugagawokuva wala isisu osi bwala deli oninasi.
16 Mitaga yeigu adou baisa Guyau Yaubada paila pilasi,
e matauna bikatumovaigu.
17 Kaukwau, lalavi deli bogi
ulo kavilavila deli ulo kayagigila imwena baisa matauna,
e matauna bogwa bilagi kaigagu.
18 Matauna bikaimalaigu bwainawokuva wala
metoya okabilia makwaisina laiyowai,
baisa tilaula saina bidugaga.
19 Yaubada matauna bogwa eigiyoubogwa metoya tuta kala vitouula,
e matauna bilagaigu deli bikalisau matausina.
Paila ipakaisi bininavilasi,
deli gala sitana ikukolaisi matauna.
20 Kalogu tobogwa iwaiya lubaila matausina.
Bogwa eikotuni la biga katotila.
21 La biga kala posa ikalisau mona posala,
mitaga kowolova wala isisu onanola.
La biga saina dumokikina makawala bulami dumokikinela,
mitaga bitai makawala kema kala kakata.
22 Kuvakalisi m koni mwau baisa Guyau,
e matauna bikolaim.
Matauna gala wala bitagwala tokamokwita bimamasi.
23 Mitaga yoku, ulo Yaubada, bukumipuki matausina tokatumata deli tosasopa bikaligasi
igau gala mabila kasi tomoya bikalisau.
Mitaga yeigula badubumaim wala.