85
Nigada paila mina Isireli kasi bwaina
1 Mwa Guyau! Yoku bogwa kunokapisi m valu,
e yoku kuvigaki mina Isireli biyubwailasi tuvaila.
2 Yoku bogwa kuligaiwa m tomota si mitugaga,
deli kulumwelavi komwaidona si sula.
3 Yoku kusim gibuluwa baisa matausina,
e kukwatuyumali m gidaleiya sainela.
4 Mwa Yaubada! Kama tokwatumovasi yoku kukwaimalaimasi,
e desi taga kuninamwau baisa yakamaisi.
5 Ki, bogwa wala bukugibuluwaimasi tuta komwaidona?
Ki, mwada m gibuluwa gala avai tuta biwokuva?
6 Kukwatupewolaimasi tuvaila,
e yakamaisi wala m tomota bakayakawolaimsi.
7 Mwa Guyau! Kumitukwaiyaimasi,
e kupilasaimasi paila bukukwatumovaimasi.
8 Yeigu laninakaigila wala avaka Guyau Yaubada eililivala.
Ikatotila vakota baisa yakidasi la tomota tatoula,
kidamwa gala tuvaila bitakeiitasi oda kidikedasi nagowa.
9 Biga mokwita matauna eitulotula wala bikoli matausina availa availa itemmalaisi matauna,
e makawala wala matauna Tokwatumova bisisu oda valusi.
10 E yebwaili deli kimadagi bogwa bibodasi wala,
e mitukwaibwaila deli vakota bogwa bikaipapasi goli.
11 Tomota si katalova bimwena ovalu watanawa,
e Yaubada la mitukwaibwaila bikululuki metoya wa labuma.
12 Guyau bivigakaidasi bitayubwailasi,
e da pwaipwaiasi kaiuwala bivigaki bitaluvabwailasi.
13 Mitukwaibwaila bikugwa omatala Guyau,
e bikatubiasi la keda matauna.