94
Yaubada kasi toyakala tomota komwaidona
Mwa Guyau! Yoku wala Yaubada tomipuki.
Kuyomitali m gibuluwa!
Yoku wala kasi toyakala tomota komwaidona.
Mwa! Kutokaia e kusaiki matausina tokaluvalova avaka bibudoki matausina.
Ammakawala kala woloula tomitugaga bimwasawasi?
Ki, Guyau - ammakawala kala woloula?
Ammakawala kala woloula tosula bikaluvalovasi wala,
deli bikamnomwanasi paila si sula?
 
Mwa Guyau! Matausina ikatugigaiyaisi m tomota,
e ilamidadaisi matausina metoya om boda.
Ivakaligaisi kakau deli weilova,
deli ikatumataisi tomitawasi availa availa isisuaisi oma valusi.
Matausina ililivalasi, kawasi, “Tauwau! Guyau gala wala igigisaidasi.
Mina Isireli si Yaubada gala wala ivitusaidasi!”
 
Ulo tomota, ammakawami yokomi saina toninagowa yokomi?
Ki, avai tutaga ibodi bitapuloki ninami?
Yaubada ibubuli taigadasi - ki, sitana ililagi?
E ibubuli mitadaisi - ki, sitana igigisi kaina?
10 Matauna ikaraiwogi boda ituwoli ituwoli - ki, ibodiga bimipuki matausina?
Matauna kasi tovituloki tomota komwaidona - ki, sitanaga la kabitam kaina?
11 E Guyau bogwa leinikoli avaka eininamsaisi.
E inikoli ammakawala kala nigonigwa si bigatona. +
 
12 Mwa Guyau! Tomota matauna lokukwatululuti bimwasawa sainela,
e matauwena goli lokuuvituloki m Kwaraiwaga!
13 Yoku kuvigaki matauna bivaiwasi ola tuta mwau,
e bila goli avai tuta bikelaisi nobwala paila kasi silagi matausina tomitugaga.
14 Guyau gala bisilavi la tomota,
e gala bisilavi matausina availa availa metoya ola boda.
15 Karaiwaga duwosisia igau bitabani metoya okaboyakala,
e deli komwaidosi tomota tomitukwaibwaila bipilasaisi makwaina.
 
16 Ki, availa itokailagu tutala eikoulovaigusi tomitugaga
e availa ipiaigu tutala ikoulovaigusi tomitugaga?
17 Kidamwa goli Guyau gala bipilasaigu,
kagu yam bogwa lalobogwa mapilana Tuma.
18 Yeigu lalivala kawagu, “Mwa Guyau! Lakakapusi!”
Mitaga m mitakwai ivisimiliwolaigu.
19 Avai tutaga aninayuwa deli anokubukubu,
yoku kuvisimolaigu deli kuyomwasalaigu.
 
20 Yoku kupaiki matausina toyakala totabilibili.
availa availa matausina ikoukikitasi baisa yakala doudoga, mwada yakala duwosisia,
21 e availa availa ikikeiwalasi bitabinakaisi tobubwaila.
e ikamogaisi tobubwaila paila bikaligasi.
22 Mitaga Guyau itabodaigu,
e ulo Yaubada ikolaigu.
23 Matauna igau bimipuki matausina paila si mitugaga sainela
e bikatudoum matausina paila si mitugaga.
Guyau da Yaubadasi bogwa bikatudoum matausina.
+ 94:11 94.11 1 Kr 3.20