LILIU PILIYUWELA
Kabovitouula
Mapilana Liliu Piliyuwela livalela eivitouula ambaisa mapilana Liliu Pilimatala kala vigimkoluva. Ikugwa ilivala paila Solomoni la guyau ila itobu tuta makwaina ikaliga. Isetuwoli igini ammakawala Yeroboam ikugwai mina Isireli madilasina opiliyavata e ikowolovaisi guyau Rioboam, matauwena Solomoni latula, avai tuta iyosi la guyau paila madilasina opilibolimila. Oluvi ilivala wala paila kabokaraiwaga makwaina opilibolimila, baisa Yuda dalela, ila itobu tuta makwaina iyoulisi Yerusalem 586 BC.
Buki kala katumimisa
Solomoni la guyau 1.1—9.31
a) Taitu makwaisina ivitouula la guyau
1.1-17
b) Bwala Kwebumaboma ikaliaiisi
2.1—7.10
c) Taitu makwaisina oluvi
7.11—9.31
Madalasina opiliyavata si kowolova 10.1-19
Mapilana Yuda la gweguya liliusi 11.1—36.12
Yerusalem eiyoulisi 36.13-23
1
Solomoni la nigada paila kabitam
(1 Gwe 3.1-5)
E Solomoni matauna guyau Debida latula saina igiyoumkumku ikaraiwogi Isireli kabokaraiwaga, e Guyau la Yaubada imitukwaii matauna e ivigaki peuligaga sainela.
Guyau Solomoni ikaraiwogi komwaidona kumatoula matausina ikikaraiwogaisi tokabilia kasi bawa lakatuluwovila deli lakatuvila, komwaidona tokaidadala valu, dala tommoyesi, deli komwaidona tomota, ikaraiwogi matausina bilosi deli matauna ovalu makatupona si kabotapwaroru mapilana Gibioni. Bilosi mapilana paila uula Guyau la Buliyoyova metitokila baisa, makwaina goli Mosese matauna Guyau la touwata leikaliaii oviloupakala. (E Kabutu Didawogala eitotu Yerusalem olumoulela Buliyoyova makwaina guyau Debida eikaliaii avai tuta eikaimilivau Didawaga makwaina metoya Kiriati Yearim.) + Kabogwabu lula makwaina Besaleli matauna Uri latula e Ura tabula eiyouduli metoya tanumnumta barasi deli eitotu ovalu Gibioni omatala Guyau la Buliyoyova. Guyau Solomoni deli komwaidona tomota itapwarorusi baisa Guyau metoya mapilana. + E omatala Guyau la Buliyoyova Solomoni itemmali Guyau metoya igibugabu lula odabala kabogwabu makwaina eiyoudulokaisi metoya tanumnumta barasi; ikatumataisi lakatuluwotala mauna e igibukwaisi lula odabala makwaina.
E wa bogi makwaina Yaubada eiviloubusi baisa Solomoni ikatupoi kawala, “Ki avaka magim basakaim ke?”
E Solomoni ivitakauloki Guyau kawala, “Tuta tuta kuyomitali m mitakwai saina siligaga baisa tamagu Debida, e baisa tuta bogwa lokutugwalaigu laguyau bakaimapu matauna. Mwa, Guyau Yaubada, m biga katotila lokuvagi baisa tamagu. Yoku lokuvasanaigu baguyoi odubasi tomota matausina saina bidugaga gala ibodi bitakalau. + 10 Mapaila kusakaigu kabitam deli kateta magigu bakaraiwaga odubasi matausina. Mitaga ammakawalaga bavigaki bakaraiwogi mabudona m tomota saina bidugaga?”
11 E Yaubada ivitakauloki Solomoni, kawala, “Yoku bogwa kunagibau. Kaina bukunigada paila guguwa bidubadu, veiguwa, kam nikoli bikanuvagasi, kam tilaula bikaligasi, kaina m momova bikaduwonaku, mitaga kaimapula yoku lokunigadi kabitam deli ninitalapula paila bukuguyoi ulo tomota, paila matausina yeigu lavigakaim lokuguyau. 12 Yeigu bogwa basakaim kabitam deli nikoli. Deli tuvaila bakatumkulovi, basakaim saina bidugaga guguwa, veiguwa deli kam nikoli bikanuvagasi gala taitala matausina giyoububogwa makawala kaina matausina giyouwovau tuta oluvi.”
Guyau Solomoni la peula deli la veiguwa
(1 Gwe 10.26-29)
13 Mapaila Solomoni isilavi makatupona kabotapwaroru mapilana Gibioni, ambaisa Guyau la Buliyoyova eititoki, e ikaimilavau Yerusalem. E baisa isisu iguyoi Isireli. 14 Matauna ikatuyouli lakatuluwotala lakatuvasi waga kaibibiu deli 12,000 wosa. Mimilisi isaim mapilana Yerusalem, e mimilisi iwitali ilosi ovilouvakaveka ituwoli ituwoli. + 15 Wa tuta matutona iguguyau e siliba saina bidugaga kala bawa makawala dakuna olumoulela Yerusalem, deli kweisila saina bidugaga, makawala kala bawa riga okuvalila koyala Yuda. 16 E mina Msiri deli mina Silisia igigimwalasi wosa baisa avai valu avai valu, + 17 e tuvaila makawala mina Itipita igigimwalasi waga kaibibiu. Mitaga Solomoni la towotetila ikikaraiwogaisi gigimwala makwaisina. Isakaisi guyousi mina Itai deli mina Siria si wosa deli si waga kaibibiu, e bigimolaisi waga kaibibiu kaitala mapula lakatulima lakatutala siliba, e natana wosa mapula lakatutala kweluwolima siliba.
+ 1:4 1.4 2 Sml 6.1-17; 1 Lil 13.5-14; 15.25—16.1 + 1:5 1.5 Sun 38.1-7 + 1:9 1.9 Vit 13.16; 28.14 + 1:14 1.14 1 Gwe 4.26 + 1:16 1.16 Kak 17.16