19
पावल एफिससल ओल्द उहुव
1 अपोल्लोस कोरिन्थल उलिज़्याक पावल रूनिकाव घ्याँ हुद एफिसस सहरल केस्हुके। नल ख्वा ख्वा येसुए ओपाँत बाज़्यावरास दैसिद,
2 “जे येसुए ओपाँत जेहुव बेलाक छैंव पुरूस दैद जेमानै?” है ओरादोक ते, नोराए, “छैंव पुरूसए उमिन आःपै गेमाथैताए,” है दोकेर।
3 नकिन पावलए, “हिताव ताकिन ते, जे काताए ओपाँनी जेसछैंसिउ की?” है ओरादोक ते, “गे ते यूहन्नाए ओपाँनी गेसछैंसिउ ची,” है दोकेर।
4 है जैद पावलए याबिरैव भरी चावस पलास्द्याद, “ऱील सछैंज़्याव यूहन्नाए मिँरालाई यादोव पापनी यायुँ फर्कैद्याद ओलकिन छींनी हुज़्याव येसुए ल्योदा यायुँ सुहुप्द्यान्याए जूँनी ओरासछैंज़्याव ची,” है ओरादोक ते,
5 नोराए निताव पाँ थैद प्रभु येसुए उमिननी ज़ सछैंसिकेर।
6 नकिन पावलए याक्याँत उकुइ नैद ओरायो प़ाइँना छैंव पुरूस याक्याँत हुद नोर छुत छुत खामनी ब पाँकेर, छैंव पुरूसनी अचम्बलाव पाँर ब पाँकेर।
7 नोर बाह्र जनावा याल्यो।
8 नकिन स़ोंमैना पै पावलए धर्मसास्त्र झ़िमल परमेस्वरए ओराज्यालाव पाँर सथैद नोरास खर्लेसिद नोरालाई सभैंःन्यात बनै ज़ धामा दोक्यो।
9 हितावत मनी ख्वा ख्वाराए परमेस्वरए ल्योदा यायुँ जात्त ज़ माफर्कैद, झन ज़ एकोहोर्यासो जैसिद माहोल्याराए याङ़ाक येसुए ओपाँ बले·व पैंकेर। है जैद पावल येसुए ओपाँत हुव भरिरास ननी भाःसिद हाःकिन तुरान्नस इस्कुलल यादुप्सिज़्याव।
10 ऩेरिम भरी नल दुप्सिद एसिया खन्द भरिल लिज़्याव यहूदीर स़ोनो छुत जातलाव मिँराए परमेस्वरए ओपाँ थैन्या मौका दैकेर।
मन्तर तन्तरलाव यापोस्तोकोर याराख्याव
11 परमेस्वरए पावलए ओक्याँनी अचम्बलाव ओय़ेनर सतैंद ओराएज़्याव।
12 क्वार रैद पावललाई छापो परींद याजोरो हुवर लाँद याराएक, नो याजोरो हुवर यागराँज़्याव, माचाव पुरूसर ब पुलुस्द याबाज़्याव।
13 यहूदीराए याखार्ल मनी माचाव पुरूसर पले·न्यार यालिज़्याव। नोराए माचाव पुरूसरालाई प्रभु येसुए उमिननी पले·न्या धामा दाद, “गे है गेदाचिज़्या, पावलए ओरासथैज़्याव येसुए उमिननी जे पुलुस्द बाचिके,” है यारादोज़्याव।
14 तोबो स्केवास यादोज़्याव यहूदी मुख्या पुजारीए सात भाइ ओज़ाराए मनी निताव य़ेन यादोज़्याक,
15 नो माचाव पुरूसए, “येसुलाई ङासरेस्ज़्या, पावललाई मनी ङासरेस्ज़्या, जेलाई ते ङामासरेस्चिए,” है दाद,
16 नो माचाव पुरूसए क्योःद ओनैज़्याव मिँए नोरालाई खप्द हारैद, नोर नो झ़िमनी नाङग्या पात्या, झीर्घ्यामनी मर्घ्यामोर ताद पुलुस्द धोंःकेर।
17 एफिससल लिज़्याव भरिराए, यहूदीर स़ोनो छुत जातलावर, आव पाँर थैद बनै ज़ छे·केर। है जैद प्रभु येसुए उमिन बनै घ्योःद ओमान ब रहिके।
18 प्रभु येसुए ओपाँत हुवर मनी कुधुए ङ़ादाकिनकाव माचाव याय़ेनर प़ाइँए याङ़ाक माम़ोंद ज़ यापाँज़्याव।
19 ङ़ादाकिन मन्तर तन्तर दाज़्यावराए ते यापोस्तोकोर रैद दुप्द प़ाइँए याङ़ाक ज़ याराम़ुकेर। नो याराम़ुव पोस्तोकोराए याएः याजाँचिक चाँदीए सिक्का पचास हजारा ओल्यो।
20 है जैद परमेस्वरए ओपाँ प़ाइँनी प़ाइँनी ज़ घ्योःद आदा होदा बनै ज़ उफींजिज़्याव।
21 आव भरी ओतावत पावलए उयुँल, माकेदोनिया स़ोनो अखैयालाव घ्याँ बाद फरी यरूसलेमदा बान्या थ·रैक्यो। ‘हुकिन छींनी रोम सहरदा मनी बाव ताके’ है उलिज़्याव।
22 है जैद ओसेवा दाज़्यावनी, तिमोथी स़ोनो इरास्तसनिलाई, ओलकिन ङ़ादा ज़ माकेदोनियादा निपरींक्यो। ओल ते जाँवा पै एसिया खन्दल ज़ लिके।
पावलए ओपाँत एफिससल यामचिउ
23 हाः बेलाक एफिसस सहरल येसुए ओपाँत छ्याल्दिउ खैलानी बैला माताके।
24 तोबो देमेत्रियस यादोज़्याव सोनारए, आर्तेमिस देबीए ज़िम्ज़ा ज़िम्ज़ा चाँदीए अङग्यार जैद सहरलाव तुप्न्यारालाई कुधु फाइदा जैद ओराएज़्याव।
25 तछा नोरालाई स़ोनो छुत नो मिताव य़ेन दाज़्यावरालाई दुप्द, “अ ङादाज्यु भाइर, जे ज़ जेसैंज़्या, आव गेय़ेननी ज़ चाव कमाइ ताज़्या।
26 नो पावलए झन आव गेसहरल स़ोनो एसिया भरिल, ‘कुइए जैसिउ अङग्यार काता देवतार ब माःक’ है दाद कुधु मिँरालाई तँदा ज़ याजैक्यो।
27 है जैद नोए ओपाँए ज़ आव गेय़ेन वाज़ माःक, झन आर्तेमिस गेदेवत्यानीए ओमन्दिर ब कान्ल ज़ गनिसिन्या माले। हिताव ओताकिन ते एसिया भरिल स़ोनो मानुवाताव मिँराए गेमानिज़्याव देवत्यानीए ओज़गै मगै ब म़ान्या ओछ्यास लिज़्या,” है ओरादोक ते,
28 प़ाइँ ज़ यारिस बनै चोद, “एफिससल लिज़्याव आर्तेमिस देवत्यानी जय जय,” है लिद बनै क़िकेर।
29 नो पाँत सहरलाव मिँर कुधु ज़ मचिद माकेदोनियानी हुव पावलए ओनैंनी गायस स़ोनो अरिस्तार्खसनिलाई क्योःद राम दान्या पोल स़ेले स़ेले यारालाँकेर।
30 पावलए नो पाँ थैद ओनैंनी निजूँनी राम दान्या पोदा बाव ओपैंज़्याव, नलाव यायुँ हुबोराए भैंःद माएकेर।
31 एसिया खन्दलाव सरकारए ओय़ेन दाज़्याव ख्वा ख्वा ओनैंराए मनी, “राम दान्या पोदा ताबानी,” लिद ओल्योदा था परींकेर।
32 नल बावर ख्वाराए ‘आव ज़’, ख्वाराए ‘हो ज़’ लिद बनै याक़िक सुए ज़ काता ज़ माथ·रैधुकेर। खाली कुधु मिँराए ‘काराव यादुप्सिउ’ लिन्या ब यामासैंज़्याव।
33 छींनी नलाव यहूदीराए तोबो अलेक्जेन्दरलाई जवाप याव परींकेर। है जैद नोए, ‘आदा थैचिके’ लिद उकुइए सान दाद याएक्यो।
34 खाली नोराए ‘यहूदी ज़ ओल्यो’ लिन्या सरेस्द प़ाइँए यार्गा तोबो जैद, “एफिससल लिज़्याव आर्तेमिस देवत्यानी जय जय,” है लिद ऩेघन्ता भरी क़िउका क़िउ ज़ लिकेर।
35 बल्ल बल्लङ नो सहरलाव प्रधानए नोरालाई चाप चुप जैद, “अ एफिससलाव मिँर, आदा थैचिके। नो नमतिन तेव माहान देवत्यानी आर्तेमिस स़ोनो होए ओमन्दिर आव गेसहरल गेमीं ज़ लिज़्या लिन्या प़ाइँए ज़ सैंज़्यार सानी।
36 ‘माःक’ लिन्या सु ज़ मालेर। जे काराव जेमचिज़्याव? च़िम दोचिके, मुर्खलाव य़ेन तादोच्यो।
37 आव स़ेल्द जेरारैव मिँनी ते गेमन्दिरनी काता ब माहाइनी, गेदेवताए उमिन ब बले·द मायासिर।
38 है जैद देमेत्रियस स़ोनो ओलसकाव ओनैंराए यामुद्दा कातार उलिकिन अदालतल बाद उजुर ओदोरक।
39 छुत यापाँ उलिकिन जनताराए कचरी मनी लिज़्या सानी।
40 खाली अऩाकलाव आछिमकाव जेदोज़्याव मिताव ते दान्या माःक, म़ानी रोमी सरकारए गेलाई गेगल्ती थ·रैद्यान्या ओछ्यास लिज़्या। मचिन्या निउँ काता ज़ ओमाल्योए गे काता जवाप यान्या?”
41 है दाद प़ाइँलाई भाःसिउ यापरींक्यो।