27
पावल रोमदा ओबाव
1 पावललाई इतालिया देसदा लाँन्या याथ·रैवत छुत कैदीरास माहाराजाए ओफौजीलाव कप्तान युलियस यादोज़्यावए ओपासल ज़ झाःकेर।
2 है जैद गे तोबो एद्रामितेनोस सहरनी हुव एसियालाव समुन्द्र छ्योकाव पो पोक बाज़्याव ऱी जहाजल पसिद गेबाके। गेस माकेदोनिया खन्दलाव थेसलोनिके सहरनी हुव तोबो अरिस्तार्खस ब उलिज़्याव।
3 गेबाव हो पराःती सीदोन सहरल केस्द जाँवा पै गेलिके। युलियसए पावललाई दया दाद, “ननैंरास दैसिद नचाहिन्यार होराए ल्योनी रैयो,” है दोक्यो।
4 नकिन फरी ऱी जहाजल गेबाक गेङ़ानी बतास उहुवए, साइप्रस तापुए बतास ओथोरोलाव घ्याँ गेबाके।
5 नकिन किलिकिया स़ोनो पामफिलिया खन्द ङ़ाकाव घ्योःव समुन्द्रलाव घ्याँ बाद, लुकिया खन्दलाव माइरा सहरङ केस्द, नो ङ़ादाङाव जहाजनी झरिद,
6 गेसकाव कप्तानए तोबो अलेक्जेन्द्रिया सहरनी हुव इतालियादा बाज़्याव जहाज दैद नल झाःसिक्यो।
7 नो जहाजल मनी, बतास गेङ़ानी हुद कुधु दिनत बल्ल क्नीदस सहर नजिकक गेकेस्के। हुकिन होदा, गे बाव गेपैंज़्याव येमदा बतासए बाव ओमायासिउए फरी क्रेत तापुए बतास ओथोर्ज़्याव सालमोने यादोज़्याव पोलाव घ्याँ गेबाके।
8 नकिन बनै ज़ धो धो तापु छ्यो छ्यो बाद लासिया सहर लापकाव ‘चाव बन्दरगाह’ यादोज़्याव जहाज थकनैन्या पोल गेबाके।
9 नक पै केस्न्या कुधु दिन गेझाःधुवए ज़्यूँःव साहा हुनाद उलिज़्याव। नो साहाक बतास दाद समुन्द्रल बान्या बनै ओछ्यास ल्यो ओताज़्याव। है जैद पावलए नो जहाज चलैज़्यावरालाई,
10 “अ ङादाज्यु भाइर, गे आथ पाला गेबाकिन जहाजलाव सामानर स़ोनो जहाजलाई मनी कुधु नोक्सान तारिज़्या। गेजिउलाई मनी ओछ्यास ल्यो ज़ लिज़्या,” है ओरादोज़्यावत ब,
11 नोए ओपाँ कप्तानए काता माँःती माङम्सिद, बुरू जहाजए ओर्गे स़ोनो जहाज चलैज़्यावनी निपाँ कोसै भैंःके।
12 हो स़ोनो ज़्यूँःव साहाक नो जहाज थकनैन्या पोल लिन्या जाँ माज़्यासो उलिज़्यावए नो जहाजत बाज़्यावर जाँकोसैए नो क्रेत तापुत छ्यावा होकसैकाव फोनिक्स सहरदा बान्या जैकेर। नो सहर दखिन-पछ्युँ स़ोनो उतर-पछ्युँदा फर्किउ जहाज नैन्या पो थुमो उलिज़्यावए य़ुँदा भरी नक ज़ लिन्या थ·रैकेर।
समुन्द्रलाव आँधी
13 हाःत ज़ दखिन त॰नी बनै चाव बतास स॰ स॰ हुद जहाज चलैज़्यावराए ‘अब ते गेकेस्या’ लिद नो जहाजलाई अदैज़्याव झँए साँगललाई ऱीनी स़ेल्द क्रेत तापु छ्यो छ्यो ज़ गेबाके।
14 हाःत ज़ उमँःजानी उतर त॰निकाव तापुनी ल्यो माल्यो बतास गेतर्त हुद,
15 जहाजलाई आदानी होदा ख्याक्यो। बतास त॰दा गेमालाँधुवए जहाजलाई गेऱास्क, बतासए झन समुन्द्र माँजल ज़ लाँसिक्यो।
16 बल्ल बतासलाई जाँ थोर्ज़्याव क्लौदा यादोज़्याव ज़िम्ज़ा तापु छींक गेकेस्नाक जहाजए ओर्मेःताव सुर्सिउ आदा होदा लिन्या दोङ्गालाई स़ेल्द बनै दुखस छींद जहाजल गेझाःके।
17 ‘ऱीए जहाजलाई मनी सुफुवा’ लिद घेप्पा तारए बनै ज़ कस्कैकेर। लिबिया छ्योकाव उर्जीं माल्यो बगरल गैन्या ओछ्यास ओतावए नो जहाजलाई स़ेल्ज़्याव क्वार सतेद्याद बतासए ओभरत ज़ ऱास्केर।
18 हो पराःती आँधीए जहाजलाई पा·वा पा·वा ओजैवए जहाजलाव सामानर ब हाइद ऱील याराख्याकेर।
19 हुकिनकाव हो पराःती जहाजए ओजार ब याराख्याकेर।
20 कुधु दिन पै आँधी बाबत ताद निमी सोरोर ब यामारैंःज़्यावए, ‘गेमारहिके ब’ लिद गेयुँर स्यासे गेसतेके।
21 ज़्यावर गेमाज़्युव कुधु दिन ओतावत पावल प़ाइँए ङ़ाक च्याँःसिद, “अ ङादाज्यु भाइर, ङा जेलाई है ङादाचिउ पाँर भैंःद क्रेत तापु जेमाऱासो ताकिन आः नोक्सान तान्या ओमाल्यो।
22 हैदी ब जेयुँ स्यासे तासतेच्यो — जहाज वाज़ खदम तारिज़्या, गे मिँर ते सु ज़ सिन्या गेमाले।
23 आछ्या रील ओसेवा ङादोज़्याव ङापरमेस्वरए ओचाकर्या ङाल्योक सरैंःसिद,
24 ‘पावल, ताछे·नी। नँ जुनी ब माहाराजाए ओङ़ाक नच्याँःसिरिज़्या। नँस बाज़्याव ननैंर मनी परमेस्वरए ओदयानी बाँचिरिज़्यार,’ है दाँक्यो।
25 है जैद ङानैंर, जेयुँ होलाँ जैचिके। परमेस्वरए है ओदाँव मिताव जुनी ब तान्या ज़ ले लिद ङायुँ हुबो ज़ लिज़्या।
26 खाली गे तोबो तापुत उर्जीं माल्योल गर्न्या गेले,” है दासिक्यो।
ऱी जहाज उचिसो
27 बतास ओदोव चौध रात ओतावत एद्रियास समुन्द्रल बतासए गेजहाजलाई आदा होदा उहुतैनाज़्याव। आधा रील ऱी छ्योदा गेहुव मिताव ङम्सिद जहाज चलैज़्यावराए,
28 ‘उर्जीं खा उलिज़्याव’ लिद यागोइँक चालीस मितर ताके। नकिन जाँ होकसैकावक फरी यागोइँक तीस मितर ताके।
29 ‘जहाज घ्योःव घ्योःव पहर जीदा थुकिसिया’ लिन्या छ्यासए जहाज अदैन्या झँए साँगलर ओर्मेःतिन चारता यारासतेकेर। हाःकिन ‘नम खर्क सँके’ लिद कींद ज़ गेझाःके।
30 हाःत ज़ नो जहाज चलैज़्यावराए धोंःन्या निउँ तोबो जैद, ‘जहाजए उसुनी धूँलाव झँर मनी पला·द सतेव ताके’ लिद नो आदा होदा लिन्या ज़िम्ज़ा दोङ्गालाई ऱील झरैकेर।
31 पावलए याचाल सैंद कप्तान स़ोनो सिपाईंरालाई, “आवर जहाजल गेस यामारहिकिन, गे भरी बाँचिन्या गेमाले,” है ओरादोक ते,
32 नो सिपाईंराए दोङ्गाए ओच़ेंर च़म्द बगैद याराएकेर।
33 नम उसँनाक पावलए प़ाइँलाई यायुँर सझेंःद्याद, “आछिम पै जेसोगोए काता ज़ माज़्याद जेल्यो चौध दिन जेताके।
34 है जैद आछिम जेर्सार सपरीन्याए जूँनी ज़्यावर ब ज़्युव ताके। गे सु ज़ मासिद तोबो गेम़ुल ब गलिन्या माले,” है दाद,
35 उकुइत भरेस रैद प़ाइँए याङ़ाक परमेस्वरलाई धन्याबाद चरैःद केःद ज़्युक्यो।
36 हाःत ज़ उपुर्काव भरिए पाला यायुँ होलाँ जैद या मनी ज़्युकेर।
37 नो जहाजल लिज़्यावर, गे भरी प़ाइँ झाःद, ऩेसय छयहत्तर जना गेल्यो।
38 है जैद गे भरी गेफू तसी ज़्याद, जहाजए उगुर सोबोम्न्याए जूँनी नो गेसय़ेलो गेदा भरी ऱील याराख्याकेर।
39 नम छेलाला उसँवत ‘आव काता पो ओताव?’ लिद सुए ज़ माथ·रैधुकेर। खाली तोबोक ओधाँद माल्यो छेरारा·व पो रँःद ‘गेधुवा पै जहाजलाई नङ ज़ लाँव ताके’ है लिद,
40 नो जहाजलाई अदैज़्याव सतेसिउ झँए साँगलर च़म्द ऱील ज़ ख्यानैद, जहाजए ओङ़ै आदा होदा दल्कैज़्याव दाबीलाई मनी चलैन्याए जूँनी पला·केर। नकिन बतासए फुलैद जहाजलाई स़ेल्ज़्याव क्वार तङ्गैद नो छेरारा·व पोदा यालाँज़्यावत ज़,
41 ऱी जींलाव बालुवा बोर्सिउत त़ोल्द जहाज होल ज़ गैके। ओङ़ै बनै चोइस उतूँसिउए कै जैद ब माहाइधुकेर। उछींनीकाव ऱीए छल्काए जहाजलाई बनै प़ोद पा·नाक्यो।
42 हाःत ज़ सिपाईंराए, ‘आलाव कैदीर हाइसिद धोंःर्या’ लिद सैःव पैंकेर।
43 खाली कप्तानए पावललाई जोगोइव ओपैंज़्याव। है जैद नोरालाई भैंःद मायाद, “जे ऱील चेल्न्या सैंज़्यावर ङ़ादा ऱील ज़ो·द पाखादा पुलुसचिके।
44 चेल्न्या मासैंज़्याव भरी जहाजलाव फल्यार, काता कातार हाइद नत ज़ बाचिके,” है लिद याअर्थैक्यो। है जैद तोबो ब कै मै माताद ज़ प़ाइँ पाखात गेपुलुस्के।