12
हार मामानिद यादा ज़ बान्या
1 है जैद यायुँ हुप्ज़्यावर नाः माहोल्या गेङ़ाताव साचीर यातावए गे ब तन्धरे जैज़्याव पाँर स़ोनो झुकैद पापल पारैज़्याव पाँर ऱास्द थ॰रिद आव जिउत ज़ दुखर सहिद परमेस्वरए ल्योदा बान्या येमदा आस दाद गेधोंःना।
2 गेयुँ सुहुप्द्याद अजम्बरी जुनी दैन्या जैज़्याव येसुलाई चिऊद नैव ताके। नोए बीज्यातर तादी ब, क्रुसत तङ्गैसिद सिन्या तादी ब, स्वर्गताव युँ होलाँ तान्या पोलाई उरँःवए नो भरी सहिक्यो। आख ते परमेस्वरए उसिंहासनए ओवोर्दा च़ुसिद ले।
3 जे जेर्सा सैःद जेयुँ मासतेन्याए जूँनी निताव पापीराए ल्योनी मासहिसिधुन्या दुखर सहिउ येसुलाई य़ाका दोच्यो।
गेदुखराल परमेस्वरए मुइलिउ जैसिज़्याव
4 जे आःपै पापीराए ल्योनिकाव सिन्या मिताव दुखर जेमादैताए।
5 परमेस्वरए जेलाई ओज़ा मितावर जैद ओसम्जैचिउ पाँर तामेंःच्यो। नो पाँ आव ज़,
“अ ङाज़ा, ‘परमेस्वरए ओदईनिक दुख ताके’ लिद राँता ब ताजैसिनी, नयुँ ब ताकेःयो।
6 जोए ल्योदा परमेस्वरए उयुँ ताज़्या, होलाई मुइलिउ जैज़्याव।
जोलाई ओज़ा जैज़्याव, होलाई कैताक रीःज़्याव।”
7 जेलाई मुइलिउ जैन्याए जूँनी दुखर ब जेदैज़्या। परमेस्वरए किताव ओबाबुए ओज़ालाई ओजैज़्याव, हिताव ज़ जैचिज़्याव। ओबाबुए ओमाम·लैव ज़ा सु ची उलिज़्यावदा?
8 परमेस्वरए जेलाई ओज़ाराए माँःती जैद ओमाम·लैचिउ ताकिन ओज़ाल मागनिसिद नामर्याल गनिसिन्या जेल्यो।
9 फरी आव मानुवाताव गेबाबुराए मुइलिउ याजैसिउए यामान नैद गेराएज़्या। होकिन झन स्वर्गताव गेबाबुए उधूँल ल्यो ताके। ननी ज़ मासिन्या जुनी दैन्या गेले।
10 आव मानुवाताव गेबाबुराए ते छ्यावाए जूँनी जो पैंज़्यार, हो य़ेनत मुइलिउ जैसिज़्यार। परमेस्वर गेबाबुए ते गे गेजूँनी ज़ छैंव ओगेर यान्याए जूँनी मुइलिउ जैसिज़्याव।
11 आव मुइलिउ जैज़्याव भरिए उस॰कत सुख माताए दुख ज़ ताज़्या। खाली छींनी नोर सहिद मुइलिउ ताव मिँरालाई परमेस्वरए युँ होलाँ ब जैद्याव दोज़्याव, उयुँलाव मिताव ब जैव दोज़्याव।
12 है जैद सेलोलो सिउ जेखँ जेकुइर थ॰रिउ जैचिके।
13 प़ाइँए थ॰रिउ युँ जैद साचो येमनी वाज़ बाच्यो। हो ताकिन ची धो धो बाज़्यावर ब मापर्दप्द चावस बान्या लेर।
परमेस्वरनिकाव असिक माचुकैन्या
14 प़ाइँस खैन्या खिम्च्यो। परमेस्वरए उयुँलाव मिताव छैंव तान्या खिम्च्यो। माछैंवराए सुए ज़ परमेस्वरलाई रँःधुन्या मालेर।
15 जेनी परमेस्वरनिकाव असिक सुए ज़ ताचुकैच्यो। जेखार्ल युँल दाद नैन्या सु ज़ ताताक, म़ानी खादरलाव चिउ भतान्जी मिताव ताद कुधुलाई बले·न्या जेले।
16 एसाव युँ मानैधुन्यानी अधर्मी ओताव मिताव ब सु ज़ तातारक। नोए तकेज़ा ज़्यावए जूँनी परमेस्वरनिकाव ओदैव ओजेथाक ब यो·क्यो।
17 जे ज़ जेसैंज़्या, छींनी ओबाबु उसिन्या बेलाक जेथाकलाव असिक फरी उऩिक मादैक्यो। बनै घर्द धामा दाद ब मासोवोल्धुक्यो।
जेहुव पो परमेस्वरए ओङ़ाकाव पो ज़
18 जे जेहुव पो इस्राएलीर सीनै खागरताव याहुव पो स्यासो ते माःक। नोराए नत घेप्पा मेंःए मुल्का, अन्धनी दुन्ध चुम चुमो, बनै घ्योःव लापा रँःकेर।
19 हाःत ज़ नमत भोंकरए ओर्गा थैद नमतिन हुव अचम्बलाव पाँ याथैक नोर बनै छे·द “परमेस्वर फरी गेस तापाँक,” लिद मोसास बिन्ती दोकेर।
20 परमेस्वरए नोरालाई, “आव खागरत सुए ज़ छाप्न्या माताए। छाप्किन, जै जन्तु तादी ब, लुँए झेःद सैःव ज़ परिके,” है ओरादोक नोर याछ्याचेए मासहिधुकेर।
21 बनै छे छे ङम्सिउ ओतावए मोसाए पाला, “ङा ब ङाछ्याचेए ङागूज़्या,” है लिके।
22 खाली जे ते निताव पोत जेहुव माःक। जे जेहुव पो ते झन स्वर्गताव सियोन दाँदाताव जींदो परमेस्वर उलिज़्याव यरूसलेम सहरल हुद जेले। नल मागनिसिधुन्या परमेस्वरए ओचाकर्यार बनै रेंद ओसेवा दोज़्यावर लिज़्यार।
23 परमेस्वरए ओज़ाल गनिसिउ, स्वर्गत यामिन सर्सिउ भरी ब लिज़्यार, परमेस्वरए उयुँलाव मिताव धर्मी मिँराए यापुरूसर ब लिज़्यार, प़ाइँलाई फाल्ज़्याव परमेस्वर ब लिज़्या।
24 साःरो बाचानिकाव गेत्याला येसु ब लिज़्या। नोए उजिउ झाःद ओयासिउनी गेलाई परमेस्वरस सखैसिज़्याव। ओल उसिउ ते हाबिल उसिउ मितावनी माःक। हाबिल मितावनी सिन्या ते खिस फेरिन्या वाज़, येसु उसिउनी ते सखैन्या दोज़्याव।
परमेस्वरए ओपाँकिन तँदा गेबाकिन ओछ्यास लिज़्या
25 जे जोगोइसिद लिच्यो, म़ानी नो सखैज़्यावए ओपाँ माभैंःज़्याव मितावर जे ब तान्या ओछ्यास लिज़्या। आव मानुवात परमेस्वरए ओपाँ थैव यामाभैंःवनी उस्किउ यामादैकिन, गे झन स्वर्गनी पाँज़्यावए ओपाँ गेमाभैंःकिन कातानी उस्किउ गेदैरिज़्याव?
26 ङ़ादा सीनै खागरत परमेस्वरए ओर्गाए आव नामलाई थोनो·क्यो। होए उछींनी फरी अइ लिद य़ाका नैक्यो,
“फरी तछा तखेप ङाथोनो·रिज़्या,
आव नामलाई वाज़ माःक, नमलाई ब ङाथोनो·रिज़्या।”
27 नो ‘फरी तखेप ङाथोनो·रिज़्या’ है उलिज़्यावए ओअर्थ आव ज़ — ओराजैव भरी ओपो·स ज़ तछा याखेम्रिज़्याव। हो ताकिन ची माथोनो·सिधुन्यार वाज़ रहिरिज़्यार।
28 है जैद खर्क ज़ माथोनो·सिधुन्या थ॰रिउ ओराज्या ओयासिरिज़्यावए गे परमेस्वरए उगुन मानिद ओललाई ओज़्यास्ज़्याव मिताव ओमानर नैद्याद छैंव युँस ओसेवा दाव ताके।
29 काराव ल्यो ताकिन गे गेपरमेस्वर चुयाप ख्याज़्याव मेंः स्यासो लिज़्या।