17
सम्जैन्या पाँर
(मत्ती १८:६-७,२१-२२; मर्कूस ९:४२)
1 येसुए उसिसरालाई, “पापल पारैन्या पाँर ते जुनी ब हुन्या ज़ लेर, खाली निताव पाँर पले·ज़्यावलाई थैए माँतकन ज़ लिज़्या।
2 जोए आव मिताव ज़िम्ज़ारालाई पापल ओरापारैकिन, नितावलाई ते बुरू ओधेंल राँथै सुर्द्याद समुन्द्रल ख्यान्या पाथ लिज़्या।
3 है जैद जे ननी जोगोइसिद ल्यो ताके।
“ननैंए निताव पाप ओदोज़्याव नरँःकिन नोलाई सिङारो ताके। नसिङार्क ओपापनी ओओल्किन नोलाई ऱासो ताके।
4 फरी नँ नउपर्त तछात ज़ सात पाला मादान्या य़ेन दाव य़ेन नँस खैहुव य़ेन ओदोदी ब, नोलाई ब ऱासो ताके,” है यादोक्यो।
युँ हुप्न्या
5 फरी येसुए ओसाचीराए ओललाई, “अ प्रभु, परमेस्वरए ओपाँत गेयुँलाई झन ज़ सुहुप्द्यासियो,” है यादोक ते,
6 येसुए, “परमेस्वरए ओल्योदा बाजीए ओसै हावालिउ तादी ब जेयुँ जेसुहुप्किनी तोबो बनै घ्योःव ऱूम्बू सींलाई ‘भोस्द समुन्द्रल रूपिसिनान्के,’ है जेदोकिन जेपाँ भैंःन्या ले।”
बाँदाए दान्या य़ेन
7 “जेनी सुए ची जेबाँदालाई एँः कीन्यानी तादी ब बेधा छोन्यानी तादी ब, उहुव प़ाइँना ज़्यावर जैद ओसेवा जेदोज़्यादा?
8 बुरू उहुव प़ाइँना नोलाई, ‘नँ नक्वार फेरैसिद ज़्यावर जैद ङालाई रैद्याँकेदा, ङा ज़्याद ङाखेमोत नँ ब नज़्युया,’ है ची जेदोज़्याखेहो।
9 है जैद नो जेबाँदाए है दासिउनी वाज़ ओदोवए नोलाई कातानी ची धन्याबाद जेएरिज़्याव?
10 हिताव ज़ जे ब परमेस्वरए है ओदाचिउ भरी जेदोदी ब ‘गे ते असिक दैन्या स्यासोर गेमाले। गे ते है ओदासिउ य़ेन दाज़्यावर वाज़ ची गेल्यो ओल्यो’ लिद य़ाका दोच्यो।”
दस जना कुऱीर
11 येसु यरूसलेमदा ओबाज़्याक सामरिया स़ोनो गालीलनी निखार्लाव घ्याँ ओबाज़्याव।
12 तोबो नाखारल उपसिक कुऱीर दस जना येसुस दैसिहुकेर। नोर जाँ अछतङ च्याँःसिद,
13 “अ येसु गुर्बा, गेलाई नयुँ ओनाक,” है लिद याक़िक ते,
14 येसुए नोरालाई रँःद, “जे पुजारीराए ल्योक सतैंसिना बाचिके,” है ओरादोक ते, नोर येमत याबाज़्याक ज़ प़ाइँ गराँकेर।
15 नोर यागराँव सैंद तोबो वाज़ येसुए ल्योक ओल्द हुद, बनै चोइस क़िद परमेस्वरए उमिन बनै सघ्योःद्याद,
16 येसुए उखँत फुलुप्सिद धन्याबाद चरैःक्यो। नो मिँ सामरिया जातलाव ओल्यो।
17 येसुए नोलाई, “जे गराँवर दस जना माःक रो? नँसकाव नौ जना काना याबाव?” है दाद,
18 नकाव लिज़्यावरालाई, “काता, परमेस्वरलाई धन्याबाद चरैःन्या आव तोबो छुत जातलाव मिँ वाज़ उलिज़्याव रो?” है दाद,
19 नो गराँवलाई, “च्याँःसिद चावस बान्के। ङालाई नयुँ उहुबोए नगराँके,” है दोक्यो।
परमेस्वरए ओराज्या हुन्या बेलाकाव सरेसर
(मत्ती २४:२३-२८,३७-४१)
20 फरिसीराए येसुलाई, “परमेस्वरए ओराज्या खर्क उहुरिज़्याव?” है लिद यासुधिक येसुए, “परमेस्वरए ओराज्या रँःन्या सरेसरास माहुइ।
21 मिँराए फरी, ‘आङ लिज़्या, होङ लिज़्या,’ है ब लिन्या मालेर। है जैद जे ज़ सैंच्यो, परमेस्वरए ओराज्या जेयुँल ज़ ताज़्या,” है यादोक्यो।
22 नकिन फरी उसिसरालाई, “तछा मिँ मिन्सिउलाई फरी तखेप रँःव गेदैकिन ताखेहो है लिन्या बेला ब हुन्या ले। हैदी ब रँःव दैन्या जेमाले।
23 है जैद मिँराए ‘आङ लिज़्या, होङ लिज़्या’ है यालिज़्यावङ ताबाच्यो, नोराए यापाँ ब तापतिच्यो।
24 किताव नमत बिजुली उमिल्किक प़ाइँदा ज़ ज़गै ओजैज़्याव, हिताव ज़ ङा मिँ मिन्सिउ ब प़ाइँए रँःन्या जैद हुन्या ङाले।
25 खाली नोकिन ङ़ादा दुखर सहिद आव बेलाकाव मिँराए ल्योनी सोसी ऩिन्या ङातारिज़्या।
26 ङा मिँ मिन्सिउ ङाहुन्या बेला, नोआए ओपालाकाव मिताव ज़ तारिज़्या।
27 नोआए ओपालाकाव मिँर ज़्याव ज़ यालिज़्याव, ओव ज़ यालिज़्याव, ज्यार रेर ब दाव ज़ यानैज़्याव। हाःत ज़ नोआ ऱी जहाजल उपसिउ प़ाइँना ऱीर ज्याल्हुद प़ाइँलाई यागदैक्यो।
28 “लोतए ओपालाकाव मिँर ब हितावर ज़ याल्यो। नोर मनी ज़्याद ओद यालिज़्याव, लँःन्यार लँःव ज़ यालिज़्याव, यो·न्यार ब यो·व ज़ यालिज़्याव, धुर ब झाःव ज़ यालिज़्याव, झ़िमर ब जैव ज़ यालिज़्याव।
29 खाली लोत सदोमनी उपुलुसो प़ाइँना ज़ परमेस्वरए नमतिन मेंः सवाद याखेम्क्यो।
30 “मिँ मिन्सिउ उहुन्या छ्याम ब हिताव ज़ तारिज़्या।
31 है जैद जे हो बेलाक थालात लिज़्यावए ओधन सम्पती जोगोइन्याए जूँनी उझ़िमल तापसिक। हिताव ज़ एँःल लिज़्याव ब उझ़िमदा ओल्द ताबाक।
32 लोतए ओज्यालाई य़ाका दोच्यो।
33 है जैद जोए आव उजिउत ओललाई तान्या वाज़ खिम्ज़्याव, होए उजुनीलाई सम़ैज़्याव। फरी जोए आव जुनील उजिउए मया मादोव, होए उजुनीलाई बाँचैज़्याव।
34 ङा जेलाई है ङादाचिज़्या, हो बेलाक, रील तोबो तैंत स्याँद लिज़्यावनिलाई तोबोलाई लाँरिज़्याव, तोबोलाई ख्यानैरिज़्याव।
35 हिताव ज़ फरी राँथै हे·ज़्यावनिलाई तोबोलाई लाँरिज़्याव, तोबोलाई ख्यानैरिज़्याव।
36 [फरी एँःल य़ेन दाज़्यावनिलाई ब तोबोलाई लाँरिज़्याव, तोबोलाई ख्यानैरिज़्याव,”] है यादोक्यो।
37 नकिन उसिसराए, “प्रभु, निताव खा बेलाक, काङ्क ओतारिज़्याव?” है यादोक ते, येसुए, “किताव खरल ओताक वाज़ का गिद्दर हुज़्यार, हिताव ज़ तान्या ले,” है यादोक्यो।