9
येसुए उसिसर ओरापरींव
(मत्ती १०:५-१५; मर्कूस ६:७-१३)
1 येसुए तछा बाह्र जना उसिसरालाई खुल्द माचाव पुरूसर पले·न्या स़ोनो याजोरो हुवरालाई सगराँन्या सक्तीर याद,
2 परमेस्वरए ओराज्यालाव पाँ सथैना स़ोनो याजोरो हुवरालाई सगराँना अइ लिद यापरींक्यो,
3 “येमत जेबाक जेस काता ज़ तालाँच्यो। झुइ तादी ब, झ़ैं तादी ब, अर्नी तादी ब, पैसा तादी ब, फेरैसिन्या क्वा तादी ब काता ज़ तालाँच्यो।
4 जो नाखारल जेबाज़्या, जेमापुलुसा पै तोबो झ़िमक वाज़ लिच्यो।
5 फरी जेबाव नाखारल जेलाई ल्यो यामायाचिकिन ननी जेपुलुस्क नोरालाई चेतावनी यान्याए जूँनी जेखँताव गालो धुइरो नल ज़ थरैद ख्यानैद याराएच्यो,” है लिद यापरींक्यो।
6 है जैद नोर येसुए ल्योनी पुलुस्द नाखार नाखारल चाव था सथैए सथैए, याजोरो हुवरालाई सगराँए सगराँए बाकेर।
7 गालील खन्दलाव राजा हेरोदए येसुए ओदोज़्याव य़ेनर थैद उथुपुल ताके। येसुए उजूँनी ख्वाराए, “ऱील सछैंज़्याव यूहन्ना जन्द हुद ले,” है यादोज़्याव।
8 ख्वाराए, “एलिया फरी हुद ले,” है यादोज़्याव। ख्वाराए फरी, “काताकाव भाःकाव अगमबक्ता सिउनी सैसिद उहुव सा,” है यादोज़्याव।
9 हेरोदए है लिके, “यूहन्नालाई ते ङा ज़ ओङ़ै च़म्द सैःव ङारापरींव ची। आव इताव य़ेन दाज़्याव सु ओताव?” लिद नोलाई तखेप सरेसो ओपैंज़्याव।
येसुए पाँच हजारलाई भरेस ओरायो
(मत्ती १४:१३-२१; मर्कूस ६:३०-४४; यूहन्ना ६:१-१५)
10 येसुए नो ओरापरींव ओसाचीर ओल्द हुद, यादोव य़ेन भरी है दोकेर। नकिन येसुए नोरालाई सुए यामासैंद बेथसेदा यादोज़्याव नाखारदा यालाँक्यो।
11 छींनी माहोल्याराए ओबाव सैंद ओल्योदा ज़ बाकेर। याहुज़्याव रँःद येसुए नोरालाई ओल्योक हुव याद परमेस्वरए ओराज्यालाव पाँ यासथैक्यो स़ोनो याजोरो हुवरालाई ब यासगराँक्यो।
12 जाँ ऱिमदा ऱिमदा बाह्र जना उसिसर ओल्योक हुद, “आव माहोल्यारालाई यापरींके। गे इताव साइँसुइँवक गेलिज़्या। हो ताकिन आजीलाव नाखार जीदा बासिन्या बासर खिम्द ज़्यावर लँःद घज़्युनारक,” है यादोक ते,
13 येसुए, “आवरालाई ज़्यावर जे ज़ याव ताके,” है ओरादोक ते, उसिसराए, “गेस भरेस पाँच गोता, ङाँः ऩेब्लो वाज़ लिज़्या। सैं ज़्यावर लँःद रैद्यान्या है नलिज़्याव?” है दोकेर।
14 नो माहोल्यार खेपार वाज़ पाँच हजारा याल्यो।
नकिन येसुए उसिसरालाई नो माहोल्यारालाई पचास पचासलाव ताना जैद सोचोइँव यापरींक्यो।
15 नोराए हैज़ जैद प़ाइँलाई यारासोचोइँकेर।
16 नकिन येसुए नो पाँच गोता भरेस स़ोनो ऩेब्लो ङाँः उकुइत रैद स्वर्गदा भाल्सिद, असिक ऩिद भरेसर ङाँःर केःद, उसिसरालाई माहोल्याराए याङ़ाक याङ़ाक झाःद्याव यापरींक्यो।
17 नोर प़ाइँए याफू तसी ज़्याद यासय़ेलोर यादुप्क बाह्र झुर्नु ताके।
पत्रुसए येसुलाई ख्रीस लिन्या ओथ·रैव
(मत्ती १६:१३-२३; मर्कूस ८:२७-३३)
18 छींनी तछा येसु उसिसरास बाद ओबातङ ज़ ओपोंखारिज़्याव। पोंखारिद ओखेमोत उसिसरालाई, “माहोल्याराए ङालाई सु है दाँज़्यार?” है ओरादोक ते,
19 उसिसराए, “ख्वाराए ऱील सछैंज़्याव यूहन्ना है दींज़्यार, ख्वाराए एलिया है दींज़्यार, ख्वाराए फरी काताकाव भाःकाव अगमबक्ता सिउनी सैंसिउ ताखेहो है दींज़्यार,” है दोकेर।
20 येसुए फरी, “जे ङालाई सु है जेदाँज़्या नी?” है ओरादोक ते, पत्रुसए, “नँ परमेस्वरनी हुव ख्रीस ज़,” है दोक्यो।
21 नकिन येसुए, “आव पत्रुसए है ओल्यो पाँ सुलाई ज़ है तारादोच्यो,” लिद नोरालाई अर्थैद,
22 “ङा मिँ मिन्सिउए कुधु दुखर दैद आव गेदेसलाव स़ेरर, मुख्या पुजारीर स़ोनो सास्त्रीराए ल्योनी सोसी ऩिन्या ङातारिज़्या। नोराए यासैःनाव स़ोंलात सिउनी सैंसिद ङासोरिज़्या,” है यादोक्यो।
येसुए उसिस जैसिन्या
(मत्ती १६:२४-२८; मर्कूस ८:३४–९:१)
23 नकिन फरी माहोल्याराए ल्योदा भाल्सिद प़ाइँलाई ज़, “जोए ङास हुन्या युँ दोज़्याव, होए उजिउए मया मादाद दिनकाव ज़ क्रुसत सिन्या मिताव दुखर सहिद ङाछींत उहुक।
24 जोए आव उजिउत ओललाई तान्या वाज़ खिम्ज़्याव, होए उजुनीलाई सम़ैज़्याव। फरी जोए आव उजिउत उजिउए मया मादाद ङा ङाजूँनी दोज़्याव, होए जुनी दैरिज़्याव।
25 जोए आव मानुवात लिज़्याव भरी दैद उजुनीलाई ओसम़ैकिन नोलाई काता ची ता?
26 जो आव बेलाक ङा स़ोनो ङापाँत ओलाज हुज़्या, ङा मिँ मिन्सिउ ब फरी छैंव ङाचाकर्यारास ङाबाबुए ओज़गै मगैरास ङाहुक ङा ब नोलाई रँःद ङालाज हुन्या ले।
27 ङा साचो है ङादाचिज़्या, आकाव च्याँःसिद लिज़्यावरानी जे ख्वा ख्वाराए परमेस्वरए ओराज्या जेमारँःवा पै सिन्या जेमाले,” है यादोक्यो।
येसुए ओज़गै ओसरैंःव
(मत्ती १७:१-८; मर्कूस ९:२-८)
28 नो है ओरादोव छ्यामकिन तसातावाक येसुए ओलस पत्रुस, यूहन्ना स़ोनो याकूबलाई लाँद तोबो गोंत पोंखारिनाक्यो।
29 नक येसुए ओपोंखारिज़्यावत ज़ ओङाःर चबनै त़ोसिद ओक्वार ब तक तकौ ताद मी झीःन्या ताके।
30 हाःत ज़ फरी मोसा स़ोनो एलियानी हुद येसुस पाँकेर।
31 नोनी ब बनै ज़गै ज़गैवनी निरैंःज़्याव। स़ोनो येसुए यरूसलेमल उजिउ ओझाःरिज़्यावए जूँनी यापाँज़्याव।
32 पत्रुस ङ़ादा ओनैंनिस यामीर पातिद ङ़ल्द यालिज़्याव। यासैंसिउत येसु ओज़गै मगैस नो मिँनिस ओपाँज़्याव यारारँःकेर।
33 नकिन मोसा स़ोनो एलियानी येसुस भाःसिद निबाज़्याव रँःद पत्रुसए येसुलाई, “अ गुर्बा, गे आक लिन्या बनै चाव लिज़्या। गे जेलाई स़ोम्लो पाल तङ्गैद गेयाच्यो, तोबो नँलाई, तोबो मोसालाई, तोबो एलियालाई,” है दोक्यो। पत्रुस ओछ्याचेए काता पाँन्या लिन्या ब ओमासैंज़्याव।
34 ओपाँज़्याक ज़ बादल तोबो हुद नोरालाई याकप्क्यो। उसिसर बनै छे·केर।
35 नो बादल जींनी तोबो गा अइ लिद थास्के, “आव ङा ङाछाँतिउ ङाज़ा ज़, जे आवए ओपाँ थैच्यो।”
36 नाः ओपाँवत नक येसुलाई वाज़ रँःकेर। नो स़ोम्लोराए फरी नो यारँःव भरी हाः बेलाक सुलाई ज़ है मारादोकेर।
माचाव पुरूसए ओक्योःव छोर्या
(मत्ती १७:१४-१८; मर्कूस ९:१४-२७)
37 हो पराःती नो गोंतिन याझरिउत मिँर बनै माहोल्या येसुस दैसिना हुकेर।
38 नो माहोल्यारानी तोबोए, “अ गुर्बा, नँस ङाबिन्ती लिज़्या। ङाज़ा तोबोका तोबो ज़ लिज़्या, नोलाई नयुँ नाद चिऊद्याँके।
39 नोलाई कैताक माचाव पुरूसए क्योःद, चिर चिर क़िउ परींद, उमँःजानी ख्याङग्याँ खेङ्गे जैद ओयाःनी फुइ गज्या पले·द बनै दुख ओमाएवा पै माऱासो।
40 नसिसरालाई ‘पले·दिचिके’ है ङारादोक ते मापले·धुकेर,” है दोक्यो।
41 नकिन येसुए नक लिज़्यावरालाई, “ए जेयुँ माहुबोर, परमेस्वरस माखैवर, ङा जेस खा ची ङालिरिज़्याव, खा ङासहिचिके!” है दाद छोर्याए ओबाबुलाई, “नज़ालाई आदा रैके,” है दोक्यो।
42 ओबाबुए ओरैज़्यावत ज़ नो पुरूसए छोर्यालाई नक ज़ पछारिद खागरा खगर॰ जैक्यो। है जैद येसुए नो माचाव पुरूसलाई हप्कैद पले·द्याद सोजोकाव जैद ओबाबुलाई एक्यो।
43 नकाव लिज़्यावर परमेस्वरए अचम्बलाव ओसक्तीर रँःद अचम्ब ज़ ताकेर।
येसु उसिन्याए जूँनी फरी ओपाँव
(मत्ती १७:२२-२३; मर्कूस ९:३०-३२)
नोर अचम्ब ताद यालिज़्याक ज़ येसुए उसिसरालाई,
44 “आव ङापाँ जेर्ना घ्याँ जैद थैच्यो। ङा मिँ मिन्सिद हुवलाई मिँराए याकुइत सूँपिनारिज़्यार,” है यादोक्यो।
45 नोराए नो पाँ यामाबुझिदी ब येसुलाई सुधिन्या छे·केर। नो पाँए ओअर्थ कप्सिउ उलिज़्यावए माबुझिधुकेर।
घेप्पा जैसिन्या पाँ
(मत्ती १८:१-५; मर्कूस ९:३३-३७)
46 नकिन येसुए उसिसर या याल, “गे सु घेप्पा गेलिज़्याव?” लिद याखर्लेसिज़्याव।
47 नोर याखर्लेसिज़्याव सैंद येसुए तोबो ज़िम्ज़ा ल़ुज़ालाई रैद ओलापक सच्याँद,
48 उसिसरालाई है यादोक्यो, “जोए ङा ङामिनत आव मिताव ज़िम्ज़ारालाई यासुम्ज़्याव, होए ङालाई मनी सुम्नाज़्याव। ङालाई सुम्ज़्यावए फरी ङालाई वाज़ माःक, ङालाई परींज़्यावलाई ब सुम्ज़्याव। है जैद जे जेखार्ल जो सज़िम्सिज़्या, हो ज़ घेप्पा लिज़्या।”
गेकिन तँदा लिज़्यावर
(मर्कूस ९:३८-४०)
49 फरी यूहन्नाए, “गुर्बा, तोबोए नमिननी माचाव पुरूसर ओरापले·ज़्याव गेरँःके। नो गेस ओमाल्योए नोलाई पले·व गेमाएके,” है ओदोक ते,
50 येसुए, “नोलाई तावैंच्यो। जो जेकिन तँदा माजैसिए, हो जेस ज़ लिज़्या,” है दोक्यो।
सामरियालावराए येसुलाई ल्यो यामायो
51 येसु स्वर्गदा बान्या बेला उहुनावए यरूसलेमदा बान्या पक्का युँ दाद,
52 उजूँनी पोर जैन्याए जूँनी तोबो ऩेब्लो उमींर ङ़ादा ज़ यापरींक्यो। नोर सामरिया खन्दलाव तोबो नाखारल बन्दोबस्त जैनाकेर।
53 नो नाखारलावराए फरी, येसुए यरूसलेमदा बान्या उयुँ थू ओजैवए नल ल्यो माएकेर।
54 निताव रँःद उसिसनी याकूब स़ोनो यूहन्नानी येसुलाई, “अ प्रभु, सैं आवरालाई नमतिन मेंः सवाद्याद चुयाप जैन्या?” है निदोक ते,
55 येसुए, “निताव जैन्या माःक,” है दाद नोनिलाई सिङार्द,
56 छुत नाखारदा बाकेर।
येसुस बाव पैंज़्यावर
(मत्ती ८:१९-२२)
57 याबाज़्याक येमक येसुस तोबो दैसिद, “नँ जोदा नबाज़्या, ङा ब होदा ज़ ङाबाया,” है ओदोक ते,
58 येसुए, “स्यालर लिन्या कुँ लिज़्या, बाज़ार लिन्या सिप ब लिज़्या। ङा मिँ मिन्सिद हुवलाई ते ङ़ै कप्न्या पो ब माले,” है दोक्यो।
59 फरी येसुए तोबोलाई, “ङास हुन्के,” है ओदोक ते, नोए, “अ प्रभु, ङ़ादा ङाबाबुलाई ङागादैदा,” है दोक्यो।
60 येसुए फरी, “सिउरालाई सिउ स्यासोराए घरागादैज़्यारक, नँ भन्या परमेस्वरए ओराज्यालाव पाँ सथैना बान्के,” है दोक्यो।
61 फरी छुत तोबो हुद, “प्रभु, ङा ते नँस ज़ ङाबारिज़्या, खाली ङ़ादा ङाझ़िमलावरास तखेप बिदा ङाऩिनारिज़्या,” है ओदोक ते,
62 येसुए नोलाई, “एँः कीक घोर क्योःद उछींदा भाल्सिज़्याव मिँ परमेस्वरए ओराज्याल पसिन्या स्यासो माताए,” है दोक्यो।