पत्रुसए
उस॰कताव ओसरो चिथी
आव चिथी येसुए उसिस पत्रुसए ओसरो ज़। नो चिथी परींद ओराएज़्यावराए येसुए उमिनत दुख दैव ज़ यानैज़्याव। है जैद पत्रुसए ‘अजम्बरी जुनीए जेआस बनै थ॰रिउ लिज़्या’ लिद सम्जैद, यायुँ सझेंःद ओराएज़्याव (१ पत्रुस १:३-१२; ५:१२)। परमेस्वरलाई यायुँ हुप्ज़्यावर आव मानुवात खासिद यालिज़्यावए (१:१७; २:११) ख्रीसए ओदैव मिताव दुखर नोराए मनी दैन्या लेर (४:१-१९)। निताव दुखर उहुदी ब परमेस्वरलाई यायुँ हुबोर सरकारए ओकानुन धूँल सतस लिद परमेस्वरए ओक्याँत ख्यासिद लिन्या सरैंःसिउ लिज़्या (२:११–३:१२)। माचाव य़ेनत दुख दैज़्याव देखा बुरू चाव य़ेनत दुख दैन्या चाव लिज़्या (३:१७)।
1
1 ङा पत्रुस, येसु ख्रीसए ओसाचीए ङाल्योनी, जे परमेस्वरनी छाँतिसिउर पोन्तस, गलातिया, कापादोकिया, एसिया स़ोनो बिथिनियाल चितराँ पुतराँ ताद खासिद लिज़्यावरालाई आव चिथी परींद ङायाचिज़्या।
2 परमेस्वर गेबाबुए जेलाई ओज़ा येसु ख्रीसए ओपाँ भैंःन्यार जैन्याए जूँनी जेलाई ङ़ादाकिन ज़ थ·रैद, छैंव उपुरूसए चोखोइद, ओज़ाए उझीए ब छरैचिक्यो।
जेल्योदा परमेस्वरए उयुँ झन ज़ गराँद जेयुँ होलाँ जैद ओयाचिउक।
अजम्बरी जुनीए आस
3 गेप्रभु येसु ख्रीसए ओबाबु परमेस्वरए उमिन बनै ओघ्योःक। गेल्योदा उयुँ नाद साःरो जुनील जर्मैसिक्यो। है जैद ओज़ा येसु ख्रीसलाई सिउनी ओसोचोइवए गेलाई मनी अजम्बरी जुनील बान्या आस याद नैसिउ।
4 नो आस स्वर्गत नैसिउ जेजुँ ज़। नो जुँ चिन्या ब माले, खेम्न्या ब माले, म़ान्या ब माले।
5 परमेस्वरए नो अजम्बरी जुनीलाव जेआस छींनीकाव बेलाक सयो·द्याचिरिज़्याव। नो सयो·द ओमायाचिवा पै जे नत जेयुँ सुहुप्द जेनैज़्यावए जेलाई ओल ओसक्तीनी जोगोइद पाथस नैचिज़्याव।
6 है जैद आज्यालकाव जाँवा पै जेदैज़्याव दुखर जो मितावर याहुदी ब प़ाइँ सहिद रेंव ज़ जेलिज़्या।
7 किताव सुनलाई मेंःल खारिज़्यार, हिताव ज़ आव जेदुखए ओअर्थ मनी ‘जेयुँर साचो उहुप्ज़्याव सैं ओमाहुप्ज़्याव?’ जाँचिन्याए जूँनी ची। जेयुँ हुबो ते खेम्द बाज़्याव सुनकिन झन ज़ ओएः ल्यो लिज़्या। है जैद दुखर उहुक जेसहिधुकिन येसु ख्रीस ओसरैंःसिहुव बेलाक जेलाई थ॰रिउ, महिमानोर, जेगुन ल्योर दैहुन्या ले।
8 नोलाई ङ़ादाकिन जेमारँःधुदी ब मया जेदोज़्या। आज्याल जेमारँःधुदी ब ओल्योदा जेयुँ हुप्ज़्या। स़ोनो जेरेंतए ज़ो·वा ज़ो·वा जेताज़्या,
9 काराव ल्यो ताकिन नो जेयुँ जेसुहुबोनी अजम्बरी जुनी जेदैरिज़्या।
10-11 जेल्योदा इताव जुनी हुरिज़्या लिद अगमबक्ताराए नो असिकए जूँनी ङ़ादा ज़ सर्द नैर। ख्रीसए उपुरूसनी ओल ख्रीसए उजूँनी ‘दुखर दैद उसिउत ज़गै मगैव तारिज़्या’ लिन्या ङ़ादा ज़ पाँद लेर। खाली नो पुरूसनी यादैव पाँए ओअर्थ माबुझिद, ‘आव खा बेलाक, सु ओतारिज़्याव?’ लिद खिमो ज़ यानैज़्याव।
12 छींनी नो पाँए ओअर्थ प़ाल्द होराए यापालाकावए जूँनी माःक, जे जेपालाकावए जूँनी ची ओल्यो लिन्या थ·रैकेर। आज्याल नो पाँ ज़ जेलाई परमेस्वरए ओपाँ सथैज़्यावराए स्वर्गतिन परींसिउ छैंव पुरूसए ओसक्तीनी सथैचिज़्यार। नो पाँ परमेस्वरए ओचाकर्याराए मनी बनै थैन्या युँ यादोज़्याव।
छैंवस लिन्या
13 है जैद जेतहस लिद, प़ाइँत ज़ सैंसिद झाःसिद लिचिके। येसु ख्रीस फरिकाव ओरैंःहुक जेलाई यान्या असिकदा जेयुँ थू जैद नैचिके।
14 किताव ल़ुज़ाराए है दासिउ याभैंःज़्याव, हिताव ज़ जे मनी परमेस्वरए ओपाँर भैंःद, नो ङ़ादाङाव ओपाँ मासैंदकाव जेयुँ स्यासो फरी ताजैच्यो।
15 जेलाई खुल्ज़्याव छैंव लिज़्या। है जैद जे मनी हिताव ज़ प़ाइँल छैंवस लिचिके।
16 धर्मसास्त्रल मनी इताव सर्सिउ लिज़्या,
“ङा छैंव ङालिज़्या,
जे मनी हिताव ज़ लिच्यो।”
17 होए मिँ रँःद मादोव, य़ेन रँःद वाज़ दोज़्याव। नितावलाई ‘बाबु’ है जेदोज़्याव ताकिन आव मानुवात खासिद जेलेवा भरी ओल्योदा जेयुँ खोतोरो जैद छे·द लिच्यो।
18 जे ज़ जेसैंज़्या, ङ़ादाङाव जेजिज्यु बाज्युकिनकाव जेदोहुज़्याव अऩाकलाव रितिथितीरानी खेम्द बान्या सुन चाँदीए फुर्सुल ओजैचिउ माःक।
19 कान्त ज़ ओखत माल्यो हाँस्या पाथा स्यासो लँःद मालँःसिधुन्या ख्रीसए उझीए ज़ फुर्सुल ओजैचिउ ची।
20 नोलाई आव नाम नम ओमाजैद ङ़ादाकिन ज़ उथैद ओनैज़्याव। आव छींनीकाव बेलाक बल्ल जे जेजूँनी ज़ सरैंःद्याचिक्यो।
21 जे नोलाई रँःद परमेस्वरए ल्योदा जेयुँ हुप्ज़्या। नोलाई ज़ परमेस्वरए सिउनी सोचोइद ज़गै मगैव जैक्यो। है जैद जेयुँ जेआस परमेस्वरए ल्योदा ज़ लिज़्या।
22 जे आव सतलाव पाँ भैंःद, छैंव ताद नैं मेंलाई मया दान्या जेतावए, नो जेमया पक्कास जेयुँ स्यानी ज़ ताव ओताक।
23 काराव ल्यो ताकिन जे साःरो जुनी दैद जेनै। नो जेदैव जुनी ते फ्या·न्या धुरनी जेदैव माःक, परमेस्वरए खर्क ज़ माफ्या·न्या एकतार रहिज़्याव जींदो ओपाँनी ज़ जेदैव ची।
24 धर्मसास्त्रल मनी इताव सर्सिउ लिज़्या,
“मिँ भरी छी स्यासोर ज़,
यासोभा ल्योर ब वास स्यासोर ज़।
छीर ब थँज़्यार,
वासर ब गलिज़्यार।
25 प्रभुए ओपाँ ते खर्क ज़ माम़ाए, माखेमे।”
नो माखेम्न्या पाँ यासथैचिज़्याव चाव था ज़।