6
1 Ma wusɛ ɓe kelɛ mɛsay ndana sinɛ ɓe Njambiyɛ ɓaka, wusɛ kɛ ŋgwɛta nɛ wunɛ nde: Tiso, nda yi Njambiyɛ ma kelɔ ŋgikwa nɛ wunɛ kɛ́, wunɛ tî kel nde, ŋgikwa te gwâki mɛsɛŋgɛ kinɛ kelɔ yaŋa kɛ joŋgwɛ ɗyun na.
2 Kɛ yite Njambiyɛ lɛpima nde: ‹Komɛ ŋgimɔ te yi yakama nde, mi kêl kimɔ yasi nɛ ɓomɔ kɛ́ ma ɗya̧, ɛ mi kelɛ nda yi wɛ diyma kɛ́. Kɛ yesɔ te yi yakama nde, mi jôŋgwɛ ɓomɔ kɛ́ ma ɗya̧, ɛ mi kamɛ wɛ.› Ma gba kimɔ ŋgimɔ te yi Njambiyɛ kwaɗyɛ kelɔ ŋgikwa nɛ ɓomɔ kɛ́, yokɛ ndana. Ɗyoɓɔ te yi Njambiyɛ kwaɗyɛ joŋgwɛ ɓomɔ kɛ́, yokɛ.
Mɔ mɛsay mɛ Njambiyɛ
jóŋnaŋgwɛ nan?
3 Wusɛ yeti kɛ kwaɗyɛ kelɔ yiŋa yaŋa wɛtɛ nɛ wɛtɛ yi yakama njaŋgwɛ wɛtɛ mumɔ jatiɗye nyɛ kɛ ɓeya nje na, kambɔ ɓomɔ mɛ nje lɛpina ɓeyate suŋgwɛ nɛ mɛsay musu.
4 Ma yasi wɛtɛ, wusɛ kɛ teɗye nyɛ ɓomɔ kɛ mɛyasi hɛnɛ nde, wusɛ ɓotu ɓe mɛsay ɓe Njambiyɛ nɛ nje nyaŋgwɛ tiŋ te yi wusɛ ɓɛ nɔ, ko kɛ mɔy mɛbɔnɛ, ko nde, mɛyasi hɛnɛ kɛ ɓanɔ wusɛ, ko nde, temɔ su lekwɛ nɛ gɛs gɛs kɛ yiŋa ɓeya yasi te yi mɔndɛ wusɛ kɛ́.
5 Ko nde, ɓo kɛ njurɔ wusɛ, ɓo kɛ nyɛ wusɛ kɛ jɔɓɔ kɛ̀ nɔ, ko nde, ɓomɔ kɛ ŋgbɔ lu̧ ɗyambi suŋgwɛ nɛ wusɛ, ko ɓɛkɔ nde, wusɛ kɛ gwe mɛsay, ko nde, kɛ yiŋa mɛŋgimɔ wusɛ yeti kɛ ya na, wusɛ yeti kɛ ɗyena na, kɛ yinɔri hɛnɛ wusɛ ndi kɛ teɗye nde, wusɛ ɓotu ɓe mɛsay ɓe Njambiyɛ.
6 Kɛ joŋgwɛ ɗyusu, mɛtakɛ musu nɛ ŋgbeŋ. Wusɛ kɛ duwɛ mɛyasi. Wusɛ nɛ temɔ te yi gbisina ɓɛsɔ. Wusɛ nɛ temɔ te yi ŋgikwa. Wusɛ kél yasi nɛ ɗeti te yi Kimɔ Sisiŋ. Sendi, mɛkwaɗya mɛte yi wusɛ nɔ kɛ́ kinɛ likisi kɛ mɔyte na. Hɛ kél ndi sendi ɗete yí teɗye ɓomɔ nde, wusɛ ɓotu ɓe mɛsay ɓe Njambiyɛ.
7 Wusɛ kɛ pelɛ Kimɔ Tom te yi lɛpɛ gbakasi kɛ́ nyɛ ɓomɔ. Njambiyɛ kɛ nyɛ wusɛ ɗeti nɛ. Yo sendi ɗete yi wusɛ teɗye nde, wusɛ gbate ɓotu ɓe mɛsay ɓenɛ. Wusɛ kɛ joŋna kelɔ yasi nɛ ŋgbeŋ kɛ mbɔmbu wenɛ. Yo nda mɛjɔlɛ mɛ ɗyambi mɛte yi mumɔ ɓiye kɛ mbam ɓɔ, ɓiye yiŋa kɛ ɓɔ gare yí lu̧ nɛ ɗyambi nɛ ɓependɔ ɓenɛ, ko ɓo pûndu we nje nɔ.
8 Ko nde, ɓomɔ lûksa wusɛ, ko ɓo yɛ̂lkwɛ wusɛ, ko ɓo lɛ̂pinaŋgwɛ ɓeyate nɛ wusɛ ko kimɔte, ko ɓo ɓôŋ wusɛ nda ɓotu ɓe ja̧, ase nde, wusɛ lɛ́pi ndi gbakasi, wusɛ kél ndi su mɛyasi hɛnɛ yí teɗye nde, wusɛ ɓotu ɓe mɛsay ɓe Njambiyɛ.
9 Ko nde, ɓaŋa ɓomɔ yeti kɛ wokɔ yasi te yi wusɛ kelɛ kɛ́ na, ase nde, ɓaŋa kɛ kombile duwɛ wusɛ kumɔ njena, ko nde, wusɛ nda ɓotu ɓete ɓe kɛ gwe gwakɔ, ma wusɛ ndi ɓaka nɛ joŋ. Ko nde, ɓo kɛ teɗye wusɛ mɛbɔnɛ, ma ɓo yeti kɛ wo wusɛ na. Kɛ yite hɛnɛ wusɛ ndi kɛ teɗye nde, wusɛ ɓotu ɓe mɛsay ɓe Njambiyɛ.
10 Ko nde, ɓo kɛ nyɛ wusɛ ŋgambi kɛ temɔ, wusɛ su nɛ mɛsosa ŋgimɔ hɛnɛ. Ko nde, wusɛ bukate, wusɛ kɛ kelɔ nde, ɓomɔ ɓuɗyate tôndu nɛ kimɔ mɛyasi mɛte yi Njambiyɛ nyɛ mumɔ kɛ́. Ko nde, wusɛ kinɛ yaŋa, wusɛ su nɛ mɛyasi hɛnɛ. Yinɔri hɛnɛ, yo yí teɗye ɓomɔ nde, wusɛ ɓotu ɓe mɛsay ɓe Njambiyɛ.
11 Wunɛ ɓotu ɓe Kɔrɛŋt, wusɛ lɛpima mɛyasi nɛ gbas gbas nyɛ wunɛ, ɓutɛ sendi mɛtemɔ musu nyɛ wunɛ.
12 Wusɛ tì kwaɗyɛ wunɛ mbɛt te na, ma yo wunɛ kɛ kpalɔ ɗiyɔ kinɛ kwaɗyɛ wusɛ ɗete na.
13 Mi kɛ lɛpina ndana nyɛ wunɛ nda mi lɛ́pinaŋgwɛ nyɛ ɓɔnɔ ɓembɛ. Yo nde, wunɛ kêl nɛ mi nda yi mi kelma sendi nɛ wunɛ kɛ́, yite nde, wunɛ ɓûta mɛtemɔ mun nyɛ wusɛ.
Wusɛ ɓâkaŋgwɛ nɛ ɓeya yasi
14 Wunɛ tî gbam kol kelɔ yiŋa yasi wɛtɛ wúnɛ ɓotu ɓete ɓe yeti kɛ tikɔ temɔ kɛ yi Njambiyɛ na. ’Ma yasi te yi nɛ ŋgbeŋ kɛ́ yakama ɗiyɔ ka ɓenɛ kɔtu yasi? ’Ho nde, mɛjasi ɓenɛ yitil yakama ɗiyɔ ka kɛ mbɛy wɛtɛ?
15 ’*Krist ɓenɛ *Satan yakama ɓɛ ka ŋgiŋ wɛtɛ? Yasi te nda kɛ njoka mɔ te ɛ tikɛ temɔ kɛ yi Njambiyɛ nɛ̀ yɔkɔ ɛ yeti kɛ tikɔ temɔ kɛ yenɛ kɔ?
16 Sendi, mbon te nda kɛ njoka mbanjɔ Njambiyɛ nɛ̀ mɛyasi mɛte yi ɓomɔ kanɛ tikɔ Njambiyɛ kɛ́? Yo nde, mɛyotu musu, yo mbanjɔ Njambiyɛ te ɛ nɛ joŋ kɔ. Yo ɗete nda yi Njambiyɛ lɛpima nde: ‹Mi ta ɗiyɔ joŋna kɛ njoka yan. Mi ta ɓɛ Njambiyɛ wan, ɓo má ɓɛ kandɔ ɗyembɛ.›
17 Yori Baba Mbokɔ te ɛ nɛ ŋguŋguɗyɛ hɛnɛ kɔ lɛpɛ nyɛ ɓotu ɓenɛ nde: ‹Wunɛ jîsa ɗuwɛ kɛ njoka yan. Wunɛ ɓâkaŋgwɛ nɛ ɓo. Wunɛ tî kpoka yasi te yi mi kiɗyɛ nde, wunɛ tî kpoka kɛ́ na. Ɗete, mi ta ɓu̧ wunɛ nɛ mɛsosa.
18 Ŋgɛ wunɛ kelɛ ɗete, mi má ɓɛ Saŋgwɛ wun, wunɛ má nje ɓɛ ɓɔnɔ ɓembɛ, ɓɔnɔ ɓembam nɛ̀ ɓɔnɔ ɓoma. Yo Baba Mbokɔ te ɛ nɛ ɗeti hɛnɛ kɔ lɛpɛ ɗete.›