3
Na-kel-uri-an siJon
(Mat 3.1-12; Mak 1.1-8; Jon 1.19-28)
1 Len nasihau tosǝŋavur pisan erim seTiperius tovi Sisa hǝn naut a Rom, nǝboŋ aPontius Pilate tovi gavna hǝn naprovens Jutea, nǝboŋ aHerot Antipas tovi vanuan totibau hǝn naut a Kalili, mai aṽan, nahǝsan aFilip tovi vanuan totibau hǝn naut a Iturea mai a Trakonitis, mai aLisanias tovi vanuan totibau hǝn naut a Apilin,
2 nǝboŋ aAnnas mai aKaiafas artovi b̃iltihai tutumav, nasoran siGot egǝm hǝn aJon anatun aSekariah len naut masmas tob̃ǝb̃esw.
3 Ŋa aJon iyar vi lan naut p̃isi todar vis Nawisel Jortan hǝn b̃ikel ur napisulan egai mai nǝvanuan gail ke, lipair dan nǝsaan salito mai lidam̃ hǝni ke tibaptais hǝn galito hǝn narub̃atian dan nǝsaan.
4 Ehum ahai kelkel ur aIsaiah totosi sutuai tia husur aJon ke:
“Nadoldol sua satokai len naut masmas tob̃ǝb̃esw,
‘Mǝteutaut hǝn nap̃isal m̃os Nasub̃,
gol nap̃isal san gail linor,
5 dereh nab̃ur madiŋdiŋ gail p̃isi tepul,
naṽehuh gail p̃isi tipapav,
nap̃isal tohab̃ taṽor tegǝm tinor
mai nap̃isal tokutkutu temǝsoh balai.
6 Ale nǝvanuan gail p̃isi leris lǝboi nap̃isal
hǝn nǝ-lav-kuvi-an dan nǝsaan salito, aGot togolgole.’ ”
7 Imagenan aJon ikel mai naluṽoh lotogǝm hǝn b̃ibaptais hǝn galito ke, “Anatun nǝm̃at gail! Ase ikel nalǝlǝgauan mai gamito hǝn mǝtb̃igam dan nab̃iltilol paŋpaŋ b̃egǝmai?
8 Len nǝmauran samito, mitiṽan hǝn naṽite tinor hǝn nǝpairan samito dan nǝsaan. Ale samtetub̃at sor mai gamit gabag ke, ‘Asike datupanis husur aApraham evi atǝmadato ta sutuai.’ Husur nukel mai gamit ke aGot elǝboi b̃ilav nǝvat galegai ale gol ke legǝm vi pasusan siApraham!
9 AGot esum̃an naulum̃an toutaut tia hǝn b̃itai nǝkadhuhai gail hǝn nakuvkuv; nǝhai p̃isi lǝsǝṽan hǝn naṽit tovoi, gai dereh titaii, bubulan gail vi lan nǝhab.”
10 Ale naluṽoh lousi ke, “Beti namtigol nǝsa?”
11 AJon isor var galit ke, “Avan tokad nahurabat toru, tilav tesua mai avan topar, ale avan tokad nǝhanian tigol timaienan.”
12 Alat lotovi vanuan nǝtaks, galevis am logǝm hǝn lǝb̃ibaptais. Ale lousi ke, “Hai p̃usan, ginamit, namtigol timabe?”
13 Ikel mai galit ke, “Samtilav kuv nǝvat tetibau sǝhor nǝsa nǝgavmen ta Rom tokele.”
14 Beti nasoltia galevis lousi ke, “Be ginamit am, namtimabe?” Isor var galito ke, “Samtitaltal hǝn nǝvanuan gail hǝn lǝb̃ilav nǝvat mai gamito, samtelibliboŋ husur galito len nakotan. Mǝtehǝhaṽur hǝn nap̃urp̃uran samit ŋai.”
15 Len nǝboŋ enan nǝvanuan gail lopul hǝn nǝ-vatvat-viri-an. Len nǝnauan salit lousus galit ke, “AJon, gai hum ma b̃evi aKristo, aGot totabtabuh lan a?”
16 Ale aJon isor var galit p̃isi ke, “Nubaptais hǝn gamit hǝn nǝwai ŋai. Avil avan sua todaŋ sǝhor ginau satogǝmgǝmai, ginau novi ut kǝmas ŋai, nǝsanor kasi hǝn nǝb̃isah rub̃at nǝhau hǝn naributbut san. Gai dereh tibaptais hǝn gamito hǝn aNunun aGot mai nǝhab.
17 Gai esum̃an naulum̃an topat nǝhai rivrivhai tia hǝn b̃epǝpehun namisurhuwit dan nǝbavhut tomasmas. Dereh tib̃on hǝn namisurhuwit len natuhim han, be tepǝŋas nasugut nawit tosa len nǝhab todǝdas b̃imat.”
18 Ŋa len naṽide tosob̃ur aJon isor idaŋ mai galito, ale ikel ur na-kel-uri-an tovoi mai galito.
19 Be nǝboŋ aJon tosor tas nǝvanuan totibau, aHerot Antipas, husur tolah mai aHerotias tovi asoan aṽan, ale nǝboŋ aJon tosor tasi am husur natesasa p̃isi togole tia,
20 imagenan aHerot igol isa masuṽ sǝhor ta m̃o: ekǝkol gat aJon len naim bǝbaŋis.
AJon ibaptais hǝn aYesu
(Mat 3.13-17; Mak 1.9-11)
21 Loriŋ aJon len naim bǝbaŋis a tahw, be nǝboŋ nǝvanuan gail p̃isi lotobaptais, aYesu am ibaptais. Nǝboŋ aYesu tosor mai aGot, nǝmav esǝŋav,
22 aNunun aGot evi pan tokad niben sum̃an nǝtav, itav len aYesu, ale nadoldol egǝm len nǝmav ke: “Gaiug govi anatugw ulum̃an sagw notolǝmas bun gaiug, nohǝhaṽur masuṽ hǝn gaiug.”
Nǝbathuyah siYesu
(Mat 1.1-17)
23 Nǝboŋ aYesu totub̃at hǝn nauman san, nǝdam̃ han evi 30. Nǝvanuan gail lunau ke evi anatun aJosef,
siHeli,
24 siMattat,
siLevi, siMelki,
siJannai, siJosef,
25 siMattatias, siAmos,
siNahum, siEsli,
siNakkai,
26 siMaat,
siMattatias, siSemein,
siJosek, siJota,
27 siJoanan, siResa
siSeruppapel, siSealtiel,
siNeri,
28 siMelki,
siAtti, siKosam,
siElmatam, siEr,
29 siJosua, siElieser,
siJorim, siMattat,
siLevi,
30 seSimeon,
seJutah, siJosef,
siJonam, siEliakim,
31 siMelea, siMenna,
siMattata, siNatan,
siTevit,
32 siJesse,
siOpet, siPoas,
siSalmon, siNahson,
33 siAmminatap, siAtmin,
siArni, siHesron,
siPeres, seJutah,
34 siJakop, seIsak,
siApraham, siTerah,
siNahor,
35 siSeruk,
siReu, siPelek,
siEper, siSelah,
36 siKainan, siArfaksat,
siSem, siNoah,
siLamek,
37 siMetuselah,
siEnok, siJaret,
siMahalaleel, siKenan,
38 siEnos, siSet,
siAtam, siGot.