7
Yaa gamma Izara vuosisi wɩa
1 Naa kʋaŋ chaaŋ maŋ ye malakasi banɩɩsa ta ba zie tɩŋgbaŋka gie lʋga anɩɩsa wa ma, ta pɔgɩlɩ bʋlɔgɩsɩ dieke dɩ nyɩna lʋgaha mana mana ma wa, dɩ a da nɩgɩma tɩŋgbaŋka gie me, yaa mʋgɩkpɩɩma ma, yaa tɩɩŋ kaanɩ ma.
2 Saŋka mi maŋ ye malaka wʋnyɩ dɩ nyɩna ŋmɩŋ pɔsɩŋ chaaŋ ta pɔgɩlɩ magɩlɩŋ dieke dɩ yine miivolitieŋ Nabidie Ŋmɩŋ sɩɩtɩ wa; ta keesi aŋaŋ lɔlɩkpeŋkpɩɩŋ ta wa malakasi banɩɩsa diekemba Ŋmɩŋ dɩ yɩna ba sieŋ dɩ ba chʋʋsɩ tɩŋgbaŋ aŋaŋ mʋgɩkpɩɩma wa.
3 Ʋ baarɩ dɩ “Da chʋʋsɩ tɩŋgbaŋka gie yaa mʋgɩkpɩɩmaha yaa tɩɩsɩsɩ ntaala tɩ woliŋ yi magɩlɩŋ a yi Ŋmɩŋ tʋntʋntɩba die mana ma.”
4 Ta maŋ wʋŋ vuodiekemba ba yine Ŋmɩŋ magɩlɩkʋ a yi be wo bɩɩsɩŋ, ba yi vuosi tuse kɔbɩga aŋaŋ baŋɩsɩ-nɩɩsa aŋaŋ banɩɩsa, vuodiekemba die dɩ nyɩna Izara buuriŋ mana ma.
5-8 Ta vuosi tuse baŋ aŋaŋ bale dɩ nyɩŋ Juda maarɩŋ ma,
ta vuosi tuse baŋ aŋaŋ ale dɩ nyɩŋ Rubeni maarɩŋ ma,
ta vuosi tuse baŋ aŋaŋ ale dɩ nyɩŋ Gaadi maarɩŋ ma,
ta vuosi tuse baŋ aŋaŋ ale dɩ nyɩŋ Asiri maarɩŋ ma,
ta vuosi tuse baŋ aŋaŋ ale dɩ nyɩŋ Nafitali maarɩŋ ma,
ta vuosi tuse baŋ aŋaŋ ale dɩ nyɩŋ Manase maarɩŋ ma,
ta vuosi tuse baŋ aŋaŋ ale dɩ nyɩŋ Simiani maarɩŋ ma
ta vuosi tuse baŋ aŋaŋ ale dɩ nyɩŋ Liiva maarɩŋ ma,
ta vuosi tuse baŋ aŋaŋ ale dɩ nyɩŋ Isakari maarɩŋ ma,
ta vuosi tuse baŋ aŋaŋ ale dɩ nyɩŋ Sebuluni maarɩŋ ma,
ta vuosi tuse baŋ aŋaŋ ale dɩ nyɩŋ Josefu maarɩŋ ma,
ta vuosi tuse baŋ aŋaŋ ale dɩaŋ dɩ nyɩŋ Benjamani maarɩŋ ma.
Kpɩkpaakʋ wɩa
9 Ka kʋaŋ chaaŋ maŋ ye kpɩkpaaŋ ta ba wo bɩɩsɩŋ, ta ba nyɩŋ tɩŋgbaŋka gie tɩgɩsɩ mana ma aŋaŋ buuriŋ mana ma, aŋaŋ maarɩŋ mana ma, aŋaŋ jabalɩkɩŋ mana ma, ta ba yeegi nyiŋyeekiwagɩ yɩala ta zie naagbaŋkʋ aŋaŋ Yiipɔlɩka nɩŋŋa, ta pɔgɩlɩ vaatɩ ba nuusisi me ta keese aŋaŋ lɔlɩkpɩɩma a bala dɩ,
10 “Gbatɩtaanɩŋ nyɩŋ wa tɩ Nabidie Ŋmɩŋ vuodieke dɩ kalla naagbanɩŋ ma wa,
wʋnɩŋ aŋaŋ Yiipɔlɩka jigiŋ.”
11 Ta malakasi mana dɩ taaŋ giliŋ naagbaŋkʋ, aŋaŋ nyɩŋkʋraha aŋaŋ nyinvugiti anɩɩsa wa a zie, ta nan bubi tɩŋgbaŋ naagbaŋkʋ nɩŋŋa ta jɩaŋ Ŋmɩŋ ta baarɩ:
12 “Wusie,
pɩmpagɩŋ, aŋaŋ bɩrɩŋ aŋaŋ
yɩaŋ aŋaŋ aŋwaasɩ aŋaŋ jɩlɩma aŋaŋ hagɩrɩŋ
aŋaŋ yiko yiwo tɩ Nabidie Ŋmɩŋ sɩɩtɩ yaa gamma haahuu.
Wusie.”
13 Ta nyɩŋkʋraha wʋnyɩ die dɩ pɩasɩ mɩŋ dɩ, “Ta vuodiekemba dɩ yeeginene nyiŋyeekiwagɩ yɩalaha yiwo bamba, ta nyɩŋ sɩa?”
14 Maŋ yiŋŋi a balɩ wa dɩ, “Jakʋʋŋ, fʋnɩŋ fʋ sɩbɩna ama manɩŋ n ka sɩba.”
Ta ʋ balɩ mɩŋ dɩ, “Vuosi gie nyɩŋ wa wahalɩ kpeŋkpɩɩŋka ma, ta sʋgɩrɩ ba nyiŋyeekiwagɩtɩ Yiipɔlɩka zɩŋ ma ta a yɩantɩ.
15 Die wɩa,
“Ba zie Ŋmɩŋ naagbaŋkʋ nɩŋŋa
a tʋma yɩa wa ŋmɩntʋasɩ aŋaŋ yuŋ,
ʋ jɩamɩŋ juoku sʋŋ,
ta wʋnɩŋ Ŋmɩŋ vuodieke dɩ kalɩna naagbaŋkʋ ma wa
nan dɩ bie aŋaŋ ba ta ʋ ligisiŋ nan lige be,
16 ta kɔŋ yaa nyanyuule kaaŋ bɩ yigi be,
ta ŋmiine yaa tuuli kpeŋkpɩɩŋ kaaŋ bɩ juu ba nyɩŋgbanɩŋ,
17 ta Yiipɔlɩ dieke dɩ benne naagbaŋkʋ nɩŋŋa wa nan gbarɩ ba,
ta yaa ba ga bulu dieke dɩ yɩnana miivoli wo jigiŋ,
ta Ŋmɩŋ nan chɩɩtɩ ba nɩntaantɩ mana.”