3
Porofete gie‐ticnere dâŋ
1 O Israe ŋic guru sâc, Wofuŋzi ŋoŋere ʒiŋuc mukac: Aigita mâreŋkonec batarac‐ŋoparâ jowac‐ŋopa warepo ŋoŋere okacdâŋ kecʒiŋuc bajukopac i mupe mananiŋ:
2 “Mâreŋko ŋic gurune gurune juraŋgopieŋ
jaŋeraonec ŋoŋe sawa rowosâec‐ŋopapo,
irec no hehesic‐ŋeŋic sasaware erâ bâtiŋ‐ŋopapemu.
3 “Ŋic jajaheczi muc manac mi ehuc
hata wirec sâcne ranicmu me?
4 Me laioŋ moczi kâteo qowi mi kihuc
owa sâko sâcne eocmu?
Me laioŋ motec ɋârizi qowi mi bâfuarâ
qânâ hawec‐ticnao fohuc dâŋeocmu me?
5 Me mâreŋko bitiŋ mi foha wipe moc sâcne kiocmu?
Me wiac moczi bitiŋko mi raʒiha
fuc herâ sâcne fahareocmu?
6 Me hae moc wena qeŋ dâŋeme
ŋic ŋokac jaŋe mi fâfâreniŋmu,
me Wofuŋzi mi muhame
hae moc ira wiac hâhâwicne moc fuaocmu me?
7 Jâmbomac, Wofuŋ Anutu e kiŋaŋŋicfâc‐ticne porofete
jaŋe dâŋticne soŋne mi mufua‐jarehuc
wiac moc mi eocmu.
8 Laioŋzi owackeme mozi hâhâwic tâmiric juocmu?
Wofuŋ Anutuzi dâŋ mume mozi qâoma ehuc
findaŋdâŋ mi muocmu?”
Samaria ŋic jaŋere okacdâŋ
9 Asiria ŋicwofuŋ ficko â Aigita mâreŋte ŋicwofuŋ ficko
dâŋ kecʒiŋuc musokapie mananʒepieŋ:
“Ŋoŋe Samaria mâreŋte tikio tumaŋnenʒepieŋ,
ehuc hae mâreŋ ira ojowa sâko â bâbâʒâic fokac
i hone manac enʒepieŋ.”
10 “Ficsanaŋ‐jeŋicko sindaŋ â bâbâʒâic faio fefec he feeŋgopieŋzi
wiac tiŋne eniŋte kâuc baeŋgopieŋ.”
Wofuŋte dâŋ iŋuc.
11 Irec Wofuŋ Anutuzi kecʒiŋuc mukac:
“Râsi jaŋe hae mâreŋ‐ŋeŋic orâŋkeniŋmu,
ehuc sacsanaŋ‐ŋeŋic heroc qâropierâ
ficsanaŋ‐ŋeŋickonec wiac fiuc roniŋmu.”
12 Wofuŋzi kecʒiŋuc mukac: “Lama soŋaŋ moczi laioŋ mickonec lama kike hâŋne jajahec â hazec ŋifecne sawa roocmu, irec sâc jaha Israe ŋic Samaria mâreŋko jueŋgopieŋzi bilaŋke â fofo qoruc furi sâko i sawa barâ wiseniŋmu.”
13 Anutu Tâpiri Ɋuŋɋasaŋ Wofuŋ,
Wofuŋ Anutu hâcne, ere dâŋ ʒiŋuc fokac
i manarâ Jakobore kikefuŋ mutaniŋke‐jareniŋ:
14 “No Israe ŋic sindaŋ‐jeŋicte okacne bazu‐jarepemu,
dameŋ ira Bete haeo alata ŋerakac
i sipirickehuc alata ʒuŋe‐jeŋic hezupe
mâreŋko waha qaocmu.
15 Eme no hoe dameŋte fic mecne, â ʒoaŋ dameŋte fic mecne
i mâmâc heroc qâropiepemu,
ehame fic elefaŋte ʒuŋenezi ba eric ekicne,
â fic sâko mako gâcne i mâmâc omae‐fâreocmu.”
Wofuŋte dâŋ iŋuc.