5
Maŋ bâbârisiere dâŋ jazakicne
1 O Israe kikefuŋ, no ŋoŋere erâ makuc bahuc dâŋ kecʒiŋuc mupe mananiŋ:
2 “Israe ŋokac ʒeŋoŋ e waha qawec fokac
i mocwâc mi fahareocmu,
e mâreŋ‐ticnao raŋe foha
moczi mocwâc mi bafahareocmu.”
3 Wofuŋ Anutu e dâŋ kecʒiŋuc muwec:
“Hae mockonec ŋic wâŋ tauseŋzi ʒikao rarâ
gâcne sâko hâmopie nâfocne 100 sawa juniŋmu,
â hae mockonec 100 jaŋe rapie
nâfocne 10 sawa risieniŋmu;
Israe kikefuŋ ŋoŋerao iŋuc hâcne fuaocmu.”
4 Wofuŋ e Israe kikefuŋ ʒiŋuc ŋazakac hâcne:
“Ŋoŋe no wira basac enarehuc sâcne juniŋmu.
5 Bete ufuŋ ine moc mi iqickenʒepieŋ,
ehuc Giligali haeo mi raʒinʒepieŋ,
â Bere‐Seba haeo sicne fotâc wâc mi enʒepieŋ;
Giligali rune jaŋe kâpâcwâruo raniŋmu,
â Bete ufuŋzi siroweocmu hâcne.”
6 Ŋoŋe Wofuŋ wira basac ecnehuc sâcne juniŋmu,
iŋuc mi epie ine Wofuŋzi mume
ʒoc fuarâ Josefere kikefuŋ, Israe kikefuŋ hâcne ʒacŋopaocmu,
ehame moczi moc sâcne mi qâhâpoocmu.
7 Jei, ŋoŋe mumutiŋ dâŋ bârisiepie dâŋ hâtâne eekac,
â tiŋne juju i behe qaisoc ecneeŋgopieŋ!
8 Bâpiŋ ʒâŋe‐jeŋic demeŋ ɋafâc â bobiri bâfuac‐jopawec,
erâ dapâc qisiricte mume hae furic baekac,
â ʒoaŋ tatamac herisieme hae ŋafeekac,
erâ hâwec opâne wiracneme
mâreŋte faio qaratiewec fokac,
e ʒâŋe‐ticne Wofuŋ hâcne.
9 Eki hâcne mume ŋic tâpirihec jaŋe sisipiric ututuŋ fua‐jareekac,
ehame ficsanaŋ wiac ima bajarepie omaeekac.
10 Hae ʒoŋao ŋehuc mumutiŋ gie baeŋgopieŋ
jaŋe râsi ejareeŋgopieŋ,
â dâŋ fâri qizecne mueŋgopieŋ
jaŋe qaisoc‐jopaeŋgopieŋ.
11 Ŋoŋe ŋic qarâ suriŋne ro waha âte ejarehuc
padi jacgoŋ‐jeŋic i takisire biŋe muhuc jowac roeŋgopieŋte
qânâ fasaekicnezi fic bambiŋ ira ŋeŋe juju mi enʒepieŋ;
erâ waiŋ gie biaŋne he sarac embiŋ
i fârine fuame opâne mi nânʒepieŋ.
12 No manakopac, qaqatara‐ŋeŋic i guru sâko,
â kiŋŋeŋic i bocjaha;
ŋoŋe ŋic tiŋne fific guguriŋ ejareeŋgopieŋ,
â bâbâmiriŋ moneŋ rohuc dâŋgieo
hapetac jaŋere dâŋ muhasickeeŋgopieŋ.
13 Dameŋ ʒi ŋemâcne,
irec maŋɋârâŋheczi dameŋ iŋucnao niniŋkerâ juzac.
14 Ŋoŋe sâqocnere mâcne, biaŋnere henʒiriŋnehuc junʒepieŋ,
iŋuc ehuc juniŋmu,
eme Anutu Tâpiri Ɋuŋɋasaŋ Wofuŋ eki mumbiŋ
irec sâcko ŋoŋehec juocmu.
15 Ŋoŋe sâqocne qaisockehuc biaŋnere eŋarezejec,
ehuc hae ʒoŋao ŋic jaŋere dâŋ muhuc
mumutiŋ gie bâhâmonʒepieŋ.
Iŋuc epie Anutu Tâpiri Ɋuŋɋasaŋ Wofuŋ e
Josefere kikefuŋ nâfocne akic‐jopaocmu mecne.
16 Irec Anutu Tâpiri Ɋuŋɋasaŋ Wofuŋ eki hâcne ʒiŋuc mukac:
“Hae ʒoŋa sâc ki soŋgâŋ fuaocmu,
â hae hata sâc dâŋ ʒiŋuc muhuc kio wâwâsic eniŋmu:
‘Jei, jei!’
Hesarac ŋic jaŋe ki mamakuc eniŋte hefârec‐jopaniŋmu,
â ki soŋgâŋte fuŋne mamana jaŋe kigae heniŋte
jazapie fisiniŋmu.
17 Eme waiŋ gie forakac sâc ira ki soŋgâŋ eniŋmu wâc;
no ŋondeŋ‐ŋeŋicko fotâcne rapemu,
irec wiac i fua raocmu.”
Wofuŋte dâŋ iŋuc.
18 Jei ŋoŋe, Wofuŋ dameŋ‐ticnere maŋhâhâŋ eŋareekac!
Wofuŋte dameŋzi wemo wiac moc bâfua‐ŋareocmu?
Dameŋ izi tatamac mâcne,
dapâc bâfua‐ŋareocmu hâcne.
19 Ŋic moc e laioŋte wisehame
qowi mimicne moc ʒâŋene bea eki bâfuaocmu,
me ficko ferâ meticnezi sâpeo bâsiŋnehame
homazi kiocmu, irec sâc jaha fua‐ŋareocmu.
20 Jâmbomac, Wofuŋte dameŋ i tatamac aricne,
dapâcnehec fuaocmu,
dapâc qisiric fuame
ʒoaŋ ʒâziriŋ‐ticne basaniŋmu hâcne.
21 “No hombaŋ wiac‐ŋeŋic qaisockehuc hone suŋgiŋ ecneekopac,
â hombaŋ tutumaŋ‐ŋeŋicte mi aŋacnuekac.
22 Qowi bâzi me taha bâzi rike‐narepie
sifu manape mi biaŋkeocmu,
â bulimakaofâc‐ŋeŋic biuc sâkohec i
taha bâzire rike‐narepie hone takirepemu wâc.
23 Gae‐ŋeŋicte fânâŋ i mai‐naneo omaezejec,
â woŋgâŋ fânâŋ‐ŋeŋic manazore takicnuekac.
24 Mumutiŋ dâŋzi ine opâ fusinehec iŋucne rahuc fozejec,
â tiŋne jujuzi ine opâ fifisine iŋucne fohuc juzejec.
25 “Israe kikefuŋ, ŋoŋe jara 40 sâko mâreŋ sawao juhuc qowi bâzi me taha bâzi moc rike‐nare jumbieŋ me?
26 Ŋoŋe nemu‐ŋeŋic Sakutu â bâpiŋ nemu‐ŋeŋic Kaiwaŋ jahere hawari ba akic erâ bacjofa jueŋgopieŋ.
27 Eme no irec hâcne Damasko hae ocniŋucnao kâpâcwâru ficko râec‐ŋopape junʒepieŋ.” Wofuŋ, ʒâŋene Anutu Tâpiri Ɋuŋɋasaŋ Wofuŋ e iŋuc mukac.