8
Sisipiricte hawari moc fuame honewec
1 Wofuŋ Anutuzi wiac kecʒiŋuc nowatuwec: Sasac mocko jâchândâŋ quecne ŋeme honepo.
2 Eha ʒiŋuc wio‐narewec: “Amosi, go wemo wiac honekomec?” Mume mupo: “No sasac mocko jâchândâŋ quecne ŋeme honekopac.” Eme Wofuŋzi ʒiŋuc nazawec:
“Israe ŋicgurufâc‐nane jaŋere dameŋ qosackekac hâcne,
irec no mocwâc jowaruhuc mi akic‐jopapemu.
3 Ŋokac naru ŋicwofuŋte ufuŋko gae heeŋgopieŋ
jaŋe dameŋ ira kio uu eniŋmu,
ehame qâŋɋâŋ bocjaha fuame
ira me ira kosa behec‐jopapie
niniŋ siarereŋ fuarâ foocmu.”
Wofuŋ Anuture dâŋ iŋuc.
4 Ŋic hapetac ro waha âte ejareeŋgopieŋ,
â mâreŋ ʒirec ŋic qarâ suriŋne sipiric‐jopaeŋgopieŋ
ŋoŋe dâŋ ʒi mananiŋ.
5 Ŋoŋe ʒiŋuc muhuc wiac i eeŋgopieŋ hâcne:
“Mosa ɋâricne wahaekac
irec hombaŋ i wezimucko tarame
padi jacgoŋ wiac furi bapa fuaocmu?
Me sabata hombaŋ ŋeŋe i mo dameŋko tarame
padi rowaŋficte motâc ronaŋmu,
ehuc padi sâcticne bawahahuc furi‐ticne fehuc ronaŋmu,
â sigeli bâsifuckerâ ŋic eatuc‐jopanaŋmu?
6 Erâ ŋic qarâ suriŋne jaŋe siliwazi furi bacjopanaŋmu,
â hapetac jaŋe kikehuhu jajaheczi furi‐jeŋic banaŋmu,
erâ padi jawane râehuc moneŋ jaha ronaŋmu?”
7 Jakobore kikefuŋ jaŋe Wofuŋte manapie feha
Wofuŋ e jahacnao ɋetickehuc ʒiŋuc mupaŋkewec:
“No eebapa‐jeŋicte moc mi nikecnu‐jâmbâŋkeocmu.
8 Mâreŋ e wiac iŋucnere erâ mi ɋiɋiteckeocmu me?
 ŋecjucfâc‐ticne jaŋe ki busâqoc mi eniŋmu me?
Me Nilu opâ sâkozi siwiŋnerâ feku mocwâc fâre wahaekac
irec sâc mâreŋzi huhuckerâ feku mi uruŋkerâ huocmu me?”
9 Wofuŋzi kecʒiŋuc mukac:
“Eme no dameŋ ira ʒoaŋ ecnepe guŋpiticko gâpâreme
mâreŋ i ʒoaŋ ɋaɋackoa dapâc eocmu.
10 No ʒeri hombaŋ‐ŋeŋic hetikiepe
busâqoc hombaŋ eocmu,
â ʒeri gae‐ŋeŋic hetikiepe
ki makuc gae efâreocmu.
No mateŋ qonaŋke‐ŋare‐fârepemu â mupe
ŋic sasawa jaŋe qizec‐jeŋic ropie
utu pârâc fua‐fâreocmu.
Ki mamakuc fuaocmu,
i motec mocsâkoazi juku hâmome
ki mamakuc fuaekac irec sâc.
Ʒoaŋ irec tataranao busâqoczi ŋemâckerâ hâtâne eocmu.”
11 Wofuŋ Anutuzi ʒiŋuc mukac:
“Manaŋgopieŋ, dameŋ moc maickeocmu
ira mupe roroc fuaocmu,
erâ i nânâ opâ jahere roroc aricne,
Wofuŋ dâŋticnere roroc fuame
mananiŋte eipieniŋmu.
12 Jaŋe hâwec ŋifeckoneczi hâwec ŋifecko,
â mâreŋ faickonec ʒoaŋ wewefunao rahuc domaniŋmu,
ehuc Wofuŋte dâŋ bâfuaniŋte
rac warec ehuc basa‐bipieniŋmu.
13 “Dameŋ ira naru ʒeŋoŋ sahac hawari biaŋ,
â motec ʒeŋoŋ jaŋe opâre hâmohuc
marac‐jeŋic kereŋkeme rândiŋkeniŋmu.
14 Eme ‘Daŋ, go nemuge jujâmbâŋkekac’
erâ ‘Bere‐Seba hae, go joroc nemuge jujâmbâŋkekac,’
iŋuc muhuc Samariare nemu ŋokac ʒâŋene Asima
erao ɋetickehuc dâŋ mupaŋkeeŋgopieŋzi
waha jopame mocwâc mi faharenʒepieŋ.”