11
1 “No ine Mede ŋic Dariusi e ŋicwofuŋ jume jara 1 eha faharerâ (Mikae) bafickehuc basanaŋkepo wâc.
Mâreŋ faic â juwic jahere ŋicwofuŋ
2 “Ʒi dâŋ fârine gaza mutâc epemu. Manakic, Perisia mâreŋko ira ŋicwofuŋ jahec â moc ʒuhuckerâ fuaniŋmu. Eme ŋicwofuŋ namba 4 fuaocmu ere mafa mâriri izi ŋic gâcne jaŋere siricke‐fâreocmu. Eme moneŋ mafa wiac‐ticne bocjaha fuacneme tâpirihec erâ ŋicne ŋicne jaŋe Grik ŋicwofuŋ râsi ecneniŋte qafeŋ‐jopaocmu.
3 Irec faicnao ine ŋicwofuŋ moc tâpiri sâkohec fuarâ uucmaŋ kâcɋenere guriŋ bapa gie baocmu, ehuc e jahacne maŋte wiac i me i ezo murâ mi quŋkeocmu.
4 Eme uucmaŋ‐ticne izi fua ɋârâŋkerâ foha qâjâpecfâc‐ticne jaŋe bâfâuckerâ mâreŋ qaŋeŋne 4 ira kâdoc qapie rafâreocmu. Ɋâricfâc‐ticne jaŋe ine moc mi jarepie rauckeniŋmu. Eki uucmaŋ rauckerâ bajuwec irec sâc qâjâpecfâc‐ticne jaŋe mi bajuniŋmu. Uucmaŋ‐ticne bâfâucke‐jâmbâŋkerâ qâjâpecfâc‐ticne jaŋacne â ŋic gâcne ro rauc eniŋmu.
5 “Eme juwic mâreŋkonec ŋicwofuŋ e tâpiri sâkohec eocmu, mâc fekicnefâc‐ticne jaŋeraonec moczi sirickerâ guriŋ bapa gie jaha baocmu, ehame uucmaŋ‐ticne i mâretec fua ɋârâŋkeocmu.
6 Eme jahe jara wezimuc tarame ʒâʒâfic enicmu, ehame juwic mâreŋkonec ŋicwofuŋ ere otâzi faic mâreŋte ŋicwofuŋ erao fisime ŋonâŋ‐ticne rome ʒâʒâfic‐jekic i basanaŋkenicmu. Mâc ʒâʒâfic irec fârine biaŋne mi fuarâ foocmu â ɋâricfâc‐jekic jaŋe mâreŋ ira wâc mi jusanaŋkeniŋmu. Aricne, ŋokac mecne, jume jujufâc‐ticne mecne, ɋâric‐ticne mecne erâ ŋowe‐ticne mecne jaŋe mâmâc doc bacjopahuc behec‐jopaniŋmu.
7 “Dameŋ ira ŋokacte soctofa moczi fuarâ ŋicwofuŋte tuc qaocmu, ehuc faic mâreŋkonec ŋicwofuŋ ere momorifâc râsi ejarehuc hae sanaŋ‐jeŋicko raʒirâ sanaŋkehuc ima bacjopaocmu.
8 Erâ nemuɋâŋfâc‐jeŋic â râqâc wiac furi sâko gol me siliwazi bakicne, i Aigita mâreŋko barâ raocmu. Ehuc jara gâcnao faic mâreŋte ŋicwofuŋ ehec rârâsi mi enicmu.
9 Eme irec faicnao faic mâreŋte ŋicwofuŋzi juwic mâreŋko râsi fisirâ juku mocwâc e jahacne mâreŋko risieocmu.
10 “Eme juku ŋokâfâcne jaŋe ʒika bâiŋnehuc momori guru sâko hetumaŋ‐jopaniŋmu. Ehame jaŋeraonec moczi momorifâcne rocjopame rumi wânʒâŋnehec iŋucne mâreŋ fotâcne raku râsifâc‐jeŋic jaŋere hae sanaŋko fisiniŋmu.
11 Iŋuc fuame juwic mâreŋte ŋicwofuŋ e aaricke sâqoreme fisirâ faic mâreŋte ŋicwofuŋ ehec qaqac enicmu. Eme faic mâreŋte ŋicwofuŋ e momori guru sâko hetumaŋ‐jopame sifu juwic mâreŋte ŋicwofuŋ ere meo fefâreniŋmu.
12 Fefârepie juwic irec ŋicwofuŋ e penaroŋ ehuc ŋic tauseŋ guru bocjaha qâhâmoc‐jopaocmu. Erâ e sifu sanaŋkerâ mi juocmu.
13 I faic mâreŋte ŋicwofuŋ eki mârâc momori guru rocjopawec irec sâc sirickehuc rocjopaocmu hâcne. Erâ juku dameŋ‐ticne maickeme momori guru sâko â ʒikare wiac sasawa‐ticnehec ware fisiocmu.
14 “Dameŋ ira ŋic bocjahazi faharerâ juwic mâreŋte ŋicwofuŋ râsi ecneniŋmu. Ehame gahacne guruonec ŋic ʒâʒâicne gâcne jaŋe findaŋdâŋ mocte fârine bâfuaniŋte giene baniŋmu wâc, erâ irec fârine mi bâfuahuc waha jopaocmu.
15 Eme faic mâreŋkonec ŋicwofuŋzi fisirâ somâ bahuc hae sanaŋ roocmu. Ehame juwic mâreŋkonec momori guru jaŋe sâcne mi sanaŋkecneniŋmu, â momori rowosâec‐jopakicne jaŋe sanaŋkecneniŋte tâpiri basaniŋmu wâc.
16 Irec juwic mâreŋte ŋicwofuŋ râsi ecnehuc fisiocmuzi e jahacne maŋte iŋuc me iŋuc ezo murâ eocmu, ehame moczi moc mi sanaŋkecneocmu. E mâreŋ biaŋnao jusanaŋkehuc mâreŋ i furu jaha ro rauc eocmu.
17 Ehuc juwic mâreŋte ŋicwofuŋ ere uucmaŋ i wâc ro rauc efâreocte maŋne domaocmu. Ehuc juwic mâreŋ sipirickeocte ŋicwofuŋhec ʒâʒâfic burec burec ehuc otâ‐ticne e ŋonâŋ‐ticne eocte qikiŋnecneocmu. Erâ sifu wiac manasu biric ewec i fârio mi qaocmu.
18 Eme irec faicnao hâwec heririŋko ŋic juraŋgopieŋ jaŋerao wâc ra fisirâ bocjaha kâpâcwâru bacjopaocmu. Ehame momori micne moczi sanaŋkerâ pepec‐ticne bawahahuc okacne bazucneocmu.
19 Erâ irec faicnao e jahacne mâreŋte fic hae sanaŋkopec risiezo ehame sisipiriczi maickeme mocwâc mi honeniŋmu.
20 “Eme ere âkehoc ŋicwofuŋ moc fuaocmu e kia moc soreme ra mâreŋ biaŋ i fotâcnehuc takesi moneŋ roocmu; ŋicwofuŋ eki ine dameŋ bembeŋne sawa juhame tâtâcko qaqac ehuc mâcne, soŋsoŋko kosa qâhâmoniŋmu.
21 Ere âkehoc ŋic moc behe qaisoc ecnekicne â eri ŋeŋeo ŋeocte mi manacnekicne eki hâcne fua tâcneocmu. E ututuŋ fisirâ ŋic mu bâdoc ejarehuc ŋicwofuŋ gie rauckeocmu.
22 Eki hâcne râsifâc‐ticne rumi iŋucne fisi‐jarehuc jopa qâhâmoc ejareocmu, ehuc ʒâʒâfic eere ŋic fekicne e sâc ijaha ecneocmu.
23 Ehuc ʒâʒâfic embiŋ ŋic i jaŋe hâcne dameŋ ira fuŋkerâ eatuc‐jopaocmu, ehuc ŋic afecne rocjoparâ ʒika qahuc sanaŋkeocmu.
24 Eme ŋiczi mi manahapie ututuŋ jaha mâreŋ biaŋne guec‐ticnehec ira fisirâ mamac ŋosafâcne jaŋe mâsi moc mi embiŋ i hâcne ehuc mafa mateŋ â wiac gâcne fiuckekicne i ŋicfâc‐ticne kâdoc qajareocmu. Ehuc hae basanaŋ‐jopakicne jaŋe imac‐jopaocte irec dâŋ i dameŋ bembeŋne sawa mana biric eocmu.
25 E tâpirihec erâ hâbi‐ticne rohuc momori guru sâko rocjoparâ juwic mâreŋte ŋicwofuŋ râsi fisicneocmu. Eme juwic mâreŋte ŋicwofuŋ e iŋuc jaha momori guru kâcɋene sâko jâmbâŋ rocjopame qaqac eniŋmu. Mâc ŋicfâc‐ticne gâcne jaŋe doc bapie sâcne mi sanaŋkeocmu.
26 Ehame nânâ nâ gumec ejareocmu jaŋe hâcne eki sipirickeocte giene baniŋmu, erâ râsi jaŋe momorifâc‐ticne jâpec‐jopahuc bocjaha qâhâmoc‐jopaniŋmu.
27 Ŋicwofuŋ jajahec jahe ine jahackoaŋ eeatuc ehuc mamana gie banicmu, ehuc tebo ijaha ŋehuc burecdâŋ nazaŋ gazaŋ enicmu, mâc dameŋ‐jekic bakicne i biac mi maickeocmure irec fârine wâc biac mi fuaocmu.
28 Eme faic mâreŋte ŋicwofuŋ e mafa mâriri sâkohec mâreŋ‐ticnao risieocmu. Mâc maŋticnezi tiri ʒâʒâfic râsi ecnehuc wiac mana biric ewec irec fârine bâfuarâ mâreŋ‐ticnao risieocmu hâcne.
29 “Eme juku dameŋ bakicne i maickeme juwic mâreŋ mocwâc râsi fisicneocmu, mâc juwicnao sanaŋke‐jarewec irec sâc mi eocmu.
30 Kitim mâreŋkonec woke jaŋe râsi fisicnepie hâwickeme risieocmu. Risiehuc aaricke sâqoreme tiri ʒâʒâfic râsi ecneocmu. Erâ risierâ tiri ʒâʒâfic qikiŋnembiŋ ŋic i jaŋere dâŋte hazec rârâe juocmu.
31 Eme momorifâc‐ticne jaŋe fuarâ taha ufuŋ â ficsanaŋ‐ticne wâwânâŋ ecnehuc ʒoaŋne ʒoaŋne taha bâzi rikeeŋgopieŋ jaŋe aka hejareniŋmu, ehuc wiac mamakâcne sisipiric‐ticnehec i âkendâŋnepie domaocmu.
32 Eme ʒâʒâfic hetâcneniŋmu jaŋe eatuc‐jopahuc bâdoc‐jopame erao qohotaniŋmu, Anuturao qohotaniŋmu jaŋe ine sanaŋkerâ okacne bârisiecneniŋmu.
33 Guru‐jeŋicko maŋɋârâŋhec juŋgopieŋ jaŋe ŋic bocjaha qazu‐jarepie mamanahec eniŋmu, mâc dameŋ gâcnao ʒikare â ʒocte biŋe eniŋmu me kâpâcwâru bacjopahuc mafa wiac‐jeŋic fiuckeniŋmu.
34 Waha jopame bafic piticne moc fua‐jareocmu, ehame ŋic bocjahazi eatuc‐jopahuc jaŋerao ʒuhuckeniŋmu.
35 Eme mamanahec jaŋeraonec gâcne jaŋe dameŋ gâcnao waha jopaocmu wâc, i dameŋ tataranao sanaŋkerâ nanaŋ ʒurec ʒurec jaha domaniŋte iŋuc hâcne fua‐jareocmu. Anutuzi ʒâfo bawec i biac mi maickewec irec iŋuc fuaocmu.
36 “Eme ŋicwofuŋ e maŋticnere wiac kosa eocmu, ehuc sahac‐ticne bafehuc muteŋkerâ nemu bawahac‐jopa‐fâreocmu. E nemu jaŋere fekicne, Anutu hâcne, ere dâŋ qacne gâpâcne muocmu wâc. Eme iŋuc me iŋuc eme fârine tinac ehame kimbeŋ dameŋ taraocmu, ehame wiac fuaocte mupaŋkekicne i fua taraocmu hâcne.
37 E mamacfâc‐ticne jaŋere nemu araŋ mi bajareocmu, me ŋokac jaŋere joroc nemu me nemu i me i jaŋe wâc mi sâsec‐jopaocmu, aricne, jaŋe sasawa mana wahac‐jopahuc e jahacnere mocjaha maname fefene eocmu.
38 E hae sanaŋ sasawa irec nemu mocjaha araŋ bacneocmu, mamacfâc‐ticne kâuc bambiŋ nemu i hâcne gol, siliwa â qânâ furi sâko erâ taha wiac fekicne i râcne tahac eocmu.
39 Ehuc nemu furune araŋ bajareniŋmu ŋic i jaŋe hâcne hae sanaŋ‐ticne ŋerakac irec soŋaŋ râec‐jopaocmu; erâ e jahacnere manapie feocmu ŋic i jaŋe bafaharec‐jopahuc ŋic bocjaha soŋaŋ‐jopaniŋte âkendâŋ‐jopaocmu, ehuc furire erâ mâreŋ kâdoc qajareocmu.
40 “Dameŋ tataranao juwic mâreŋkonec ŋicwofuŋzi râsi ecneocmu. Faic mâreŋkonec ŋicwofuŋ eki ine mâŋâŋ ɋicwânʒâŋ qaekac irec sâc keretac â becâsicko rara ŋic erâ woke wiachec fisicneocmu. Ehuc rumi iŋucne mâreŋ dâkâne dâkâne fotâcne rahuc sâcke‐fâreocmu.
41 Erâ mâreŋ biaŋnao wâc fisiocmu, ehame ŋic 10 tauseŋ gurune gurune jaŋe hâmoniŋmu. Ŋic kecʒiŋuc jaŋe ine ere meonec batarac‐jopazo: Edom â Moabi erâ Amoŋŋic nâfocne jaŋe hâcne.
42 E meticne sicnehuc mâreŋne mâreŋne râsi ejare raku Aigita mâreŋ wâc mâmâc ecneocmu.
43 E Aigita mâreŋte gol â siliwa â mafa wiac gâcne furi sâko i mâmâc raucke‐fâreocmu; ehame Libia â Etiopia ŋic jaŋe e bâjâpeniŋmu.
44 Mâc ʒoaŋ wewefunaonec â faic mâreŋkonec biŋe bâroŋ gâcne fisime mana fâfârerâ kimbeŋ aaric sâko manahuc ŋic bocjaha jopa sipiric ehuc bâsirowec‐jopaocte fahare raocmu.
45 Ehuc ŋicwofuŋ qoruc boze‐ticne i hâwec â tiri tiki biaŋne ŋondeŋ‐jekicko fâreme ŋeocmu, ehame moczi moc mi bafickehapie hâmoocmu.