3
Ŋic jahec â moc ʒocbâruŋkonec rocjopakicne
1 Ŋicwofuŋ Nebukanezazi mume ŋic jaŋe ɋâŋ qâqâtâc moc golzi bambiŋ, ʒoricne‐ticnere sâc i kubi 60 â otecne‐ticnere sâc i kubi 6. Erâ mume Babe hae mâreŋte wâneŋ ʒâŋene Dura ira âkendâŋnembiŋ.
2 Erâ mu jambuŋ ecneniŋte ŋicwofuŋzi ŋic kecʒiŋuc hefârec‐jopawec: Kia sâko â hae soŋaŋ kâcɋene, momori micne â dâŋte babafic ŋic, moneŋ soŋaŋ â mamana ŋic erâ soŋaŋ micne gâcne gâcne.
3 Eme ŋic i jaŋe fisi‐fârerâ tumaŋnehuc ŋicwofuŋ Nebukanezare ɋâŋ qâqâtâc mu jambuŋ ecneniŋte maŋfuŋnao domambiŋ.
4 Ehame mumutâc ŋic e hahaŋne bahuc kecʒiŋuc muwec: “O ŋic gurune gurune, â mâreŋ sâc dâŋne dâŋne mueŋgopieŋ ŋoŋe mutâcne‐ŋarepe mananiŋ:
5 Ŋoŋe qeŋ me mimi ŋokac me gita me kulele me goŋgoŋ me woŋgâŋ me musi wiac gâcne jaŋe fânâŋkepie manarâ izia ŋicwofuŋzi mume ɋâŋ qâqâtâc golzi barâ âkendâŋnembiŋ i dapecnehuc numucnenʒepieŋ.
6 Â moc e mi fodapecnehuc numucneocmu e ine bâruŋ jaha ʒocko sârockepie hurâ ʒazejec.”
7 Irec musi wiac sasawa i jaŋe fânâŋkepie ŋic ŋokac tumaŋnembiŋ sâc jaŋe mana manahuc izia fodape‐fârerâ ɋâŋ qâqâtâc ŋicwofuŋ Nebukanezazi mume âkendâŋnembiŋ i numucnembiŋ.
8 Eme dameŋ ira Kaldea ŋic gâcne jaŋe fuarâ Judaŋic boc qoric‐jopambiŋ.
9 Ehuc ŋicwofuŋ Nebukaneza dâŋ ʒiŋuc âzâcnembiŋ: “O ŋicwofuŋ, go dameŋ tâmiric jufezemec.
10 Goki hâcne dâŋ ʒiŋuc mutâcnemeŋ: Qeŋ me mimi ŋokac me gita me kulele me goŋgoŋ me woŋgâŋ me musi wiac gâcne gâcne jaŋe fânâŋkepie manarâ izia ɋâŋ qâqâtâc golzi bakicne i fodapecnehuc numucnenʒepieŋ.
11 Â moc e mi fodapecnehuc numucneocmu e ine ʒocko sârockepie hurâ ʒazejec.
12 Eme Judaŋic kecʒiŋuczi Babe hae mâreŋko guriŋ bapa gie baniŋte go gahac mujaremeŋ, Sadaraka, Mesaka â Abenego. O ŋicwofuŋ, ŋic i jaŋe hâcne dâŋge mana rereŋ moc mi eeŋgopieŋ; jaŋe nemufâcge kiŋaŋ mi qajareeŋgopieŋ â ɋâŋ qâqâtâc golzi bakicne, go gahac mutec âkendâŋnembiŋ i wâc mi numucneeŋgopieŋ.”
13 Iŋuc mupie Nebukanezazi aaric sâko manahuc Sadaraka, Mesaka â Abenego jaŋe erao bacjopa fisiniŋte muwec. Eme bacjopa fisimbiŋ.
14 Fisipie Nebukanezazi ʒiŋuc muhuc wio‐jarewec: “O Sadaraka, Mesaka â Abenego, ŋoŋe nemufâc‐nane kiŋaŋ mi qajareeŋgopieŋ â ɋâŋ qâqâtâc golzi bakicne i no nahac mupe âkendâŋnembiŋ i mi numucneeŋgopieŋ, dâŋ i jâmbomac me burec?
15 Irec mananiŋ, ŋoŋe qeŋ me mimi ŋokac me gita me kulele me goŋgoŋ me woŋgâŋ me musi wiac gâcne gâcne jaŋe fânâŋkepie manarâ afeckehuc ɋâŋ qâqâtâc golzi bakicne no nahac mupe âkendâŋnembiŋ i numucneniŋmuo ine manape taraocmu, iŋuc mi eniŋmuo ine mupe bâruŋ jaha ʒocko sâroc‐ŋopapie hupie ʒacŋopaocmu. Ehame mo Anutuzi nore meonec moc batarac‐ŋopaocmu?”
16 Ŋicwofuŋzi iŋuc mume Sadaraka, Mesaka â Abenego jaŋe dâŋ kecʒiŋuc bâtikiecnembiŋ: “O Nebukaneza, nâŋe dâŋ okacne bâtikie‐garenaŋte mi enârekac.
17 Me gore dâŋzi sanaŋkeocmuo ine Anutu‐nâŋec kiŋaŋ qacnehuc jueŋgopeneŋ eki ʒockonec me gore meonec batarac‐nâpozo murâ sâcne batarac‐nâpoocmu.
18 Mi batarac‐nâpoocmuo ine ŋicwofuŋ go sifu ʒiŋuc manazemec: Nâŋe gore nemufâc kiŋaŋ mi qajarenaŋmu â ɋâŋ qâqâtâc golzi bakicne go gahac mutec âkendâŋnembiŋ i wâc mi numucnenaŋmu.”
19 Eme Nebukaneza e aariczi maŋne fusucmame Sadaraka, Mesaka â Abenego maic‐jopahuc ʒâŋe mai‐ticnezi sâqore‐jâmbâŋkewec. Eme mume ʒoc ʒaza kuʒi sâkoo ʒoc ruqembiŋ izi dameŋ gâcnao ruqepie fâroroc fua jujec irec sâc i boc sirickehuc fâroroc sâkonehec ewec.
20 Eme momorifâcne jaŋeraonec ŋic tâpiri sâkohec gâcne jaŋe Sadaraka, Mesaka â Abenego niŋgiŋ‐joparâ ʒoc ʒaza kuʒi sâkoo behec‐jopaniŋte mujarewec.
21 Eme jaŋe ŋic i hâcne ŋaqi‐jeŋic maŋne â sahacne erâ dujeŋic â wiac gâcne rojumbiŋ ihec bândeŋ‐joparâ ʒoc ʒaza kuʒi sâkoo ʒoc ʒawec ira behec‐jopapie humbiŋ.
22 Ŋicwofuŋ ere mumupaŋ sanaŋ qaŋqaŋne fowecte â ʒoc ʒaza kuʒi hâhâwicne fârorockewecte Sadaraka, Mesaka â Abenego ʒoc ʒaza kuʒi mecnao bacjopa fembiŋ ŋic i jaŋe ʒocbâruŋzi ʒâhâmoc‐jopawec.
23 Eme ŋic jahec â moc hâcne, Sadaraka Mesaka â Abenego, jaŋe niŋgiŋhec ʒocmaŋko humbiŋ.
24 Eme ŋicwofuŋ Nebukaneza e warecke sâqorerâ ʒocnehec faharerâ micnefâc‐ticne wio‐jare muwec, “Hâc, nâŋâc ŋic jahec â moc me wezimuc ʒocko behec‐jopambeneŋ?” Jaŋe ŋicwofuŋ âzâcnembiŋ, “O ŋicwofuŋ, iŋuc hâcne!”
25 Eki muwec, “No ine ŋic 4 niŋgiŋ tâmiric ʒocmaŋko rac warec epie honec‐jopakopac, erâ ʒoczi mi ʒâtâc‐jopakac. Â moc i honepe nemure motec hawari ekac.”
26 Eme Nebukaneza e ʒoc ʒaza kuʒi sâko motâc‐ticne ra bâqiŋkerâ muwec, “Sadaraka, Mesaka â Abenego, Anutu Femicne ere kiŋaŋ qaqafâc, ŋoŋe wefurâ ʒira wareniŋ.” Mume Sadaraka, Mesaka â Abenego ʒockonec wefumbiŋ.
27 Eme kia sâko â hae soŋaŋ kâcɋene â momori micne erâ ŋicwofuŋ dâŋte baficke jumbieŋ ŋic i jaŋe ture‐fârerâ honembiŋ: Ʒoczi ŋic i sahac‐jeŋicko sisipiric moc mi bâfuawec, qizec susuc‐jeŋic moc mi qeraŋkewec, ŋaqi‐jeŋic moc mi ʒâtâcnewec â sahac‐jeŋicko qeraŋ âsu moc mi fiwec.
28 Eme Nebukanezazi muwec: “Sadaraka, Mesaka â Abenego jaŋere Anutu muteŋkezo. Jaŋe Anutu manasiŋkehuc ŋicwofuŋte mumupaŋ qâsuambiŋ, ehuc sahac‐jeŋicte mana mezac mi ee nemu jabane qikiŋ‐jopa‐fârerâ jaŋacne Anutu mocjaha kiŋaŋ qacnehuc numucnembiŋ. Iŋuc epie Anutuzi aŋelo‐ticne soreme kiŋaŋ qaqafâc‐ticne ŋic sisipirickonec batarac‐jopajec.
29 Nemu moczi mâsi keciŋuc ehuc sisipirickonec babatarac‐jopa i mi fokac. Irec ŋicne ŋicne â mâreŋne mâreŋne â dâŋne dâŋne jaŋeraonec moczi Sadaraka, Mesaka â Abenego Anutu‐jeŋic musoriŋkeocmu e hefâuckepie dâkâne dâkâne fuazejec â ficticne imackepie sesuctac fuazejec.”
30 Ŋicwofuŋ e dâŋ iŋuc murâ Sadaraka, Mesaka â Abenego mutara‐jareme juwicnao Babe mâreŋko gie fekicne bajumbieŋ ijaha mocwâc ʒuhuckerâ bambiŋ.