5
Me moc sâpeo fuarâ dâŋ qâreŋkewec
1 Ŋicwofuŋ Belesaza e ŋicfâc‐ticne fekicne 1 tauseŋ jaŋere erâ tiwâ bâzi sâko moc qame fisime mai‐jeŋicko waiŋ opâ nâwec.
2 Erâ waiŋ opâ nâku maŋticne sifuckezo eha, mamac‐ticne Nebukanezazi Jerusalem taha ufuŋkonec râqâc wiac gol â siliwazi bakicne rowec i bawareniŋte muwec. E ŋicwofuŋ e jahacne â fekicnefâc‐ticne â ŋonâŋfâc‐ticne erâ ŋonâŋ ocfâc‐ticne jaŋe râqâc irecnec nâniŋte iŋuc ewec.
3 Eme râqâc wiac gol â siliwazi bakicne â Jerusalem taha ufuŋkonec, Wofuŋte fickonec hâcne rokicne i bawarembiŋ. Bawarepie ŋicwofuŋ mecne, fekicnefâc‐ticne mecne, ŋonâŋfâc‐ticne â ŋonâŋ ocfâc‐ticne mecne jaŋe mâmâc râqâc irecnec waiŋ nâmbiŋ.
4 Ehuc nemuɋâŋ gol me siliwa me aeŋ bâbâroŋ me aeŋ jâmbâŋ me jâc me qânâzi ba akic ekicne i muteŋkembiŋ.
5 Iŋuc ehapie izia mi ŋicmezi fuarâ ŋicwofuŋte ficko lambe dodoma ŋifecnao sâpeo dâŋ qâreŋkezejec i! Qâreŋkehame ŋicwofuŋzi me râpene honewec.
6 Honerâ weaŋkewec, erâ maŋ kukumbuc ecneme fâfârehuc me kikene ɋarac ɋarac qawec.
7 Iŋuc fuacneme qaŋgec bapa â Kaldea ŋic â bâpiŋte fuŋne mamana ŋic erao bacjopa raniŋte owa ruruckewec. Eme Babe haeonec mamana ŋic jaŋe fisipie ŋicwofuŋzi ʒiŋuc jazawec: “Moc e dâŋ keci woserâ fuŋne naza mutâc eocmu e ŋaqi furi sâko hecnepe huocmu, erâ qoqonaŋ golzi bakicne i qonaŋkecnepemu, ehuc mupe nore uucmaŋko guriŋ bapa ŋic namba 3 erâ juocmu.”
8 Eme ŋicwofuŋte mamana ŋic jaŋe erao rafârembiŋ, ehuc qâreŋ i woserâ irec fuŋne mutâcnecneniŋte ine eipiembiŋ.
9 Iŋuc epie ŋicwofuŋ Belesaza e maŋ kukumbuc kâcɋene ecneme weaŋkewec. Ehame fekicnefâc‐ticne jaŋe bipic tatara ejarewec.
10 Eme ŋokac wofuŋ e ŋicwofuŋte dâŋ manarâ nânâficko raʒirâ kecʒiŋuc muwec: “O ŋicwofuŋ, go dameŋ tâmiric jufezemec, go maŋge mi gâckezejec â mi weaŋkezemec.
11 Manakic, gore uucmaŋko ŋic moc jukac e nemu tirine jaŋere mamana focnekac. Mamacge juwec dameŋ ira maŋ mamanasu â maŋɋârâŋ erâ mamana sâko i ŋic erao bâfuakicne. Irec mamacge ŋicwofuŋ Nebukaneza eki qaŋgec bapa â fuŋne qaqa â mamana ŋic â bâpiŋte fuŋne mamana ŋic jaŋere micne âkendâŋnewec.
12 Ŋic e ʒâŋene Danie, erâ ŋicwofuŋzi ʒâŋe‐ticne moc Beletesaza muwec. E guŋte fuŋne â muqâqiŋ dâŋ mutâcneocte â dâŋ ŋemâcne muafeckeocte mamana tara â maŋɋârâŋ erâ maŋ mamanasu focnekac. Irec go Danie wiracnetec warerâ wiac irec fuŋne gaza mutâc ezejec.”
13 Eme Danie ŋicwofuŋtao jowa warembiŋ. Iŋuc epie ŋicwofuŋzi Danie dâŋ ʒiŋuc âzâcnewec: “Mamac‐nane, ŋicwofuŋ hâcne, eki Judaŋic kâpâcwâru bacjopa warewec jaŋeraonec moc Danie go hâcne.
14 Eme no gore fuŋne ʒiŋuc mupie manapo: E nemu tirine jaŋeraonec mamana focnekac, erâ maŋ mamanasu â mamana tara â maŋɋârâŋ i wâc focnekac.
15 Eme ʒi ŋic maŋɋârâŋhec â mamanahec jaŋe qâreŋ keci woserâ fuŋne naza mutâc eniŋte jowac‐jopa warembiŋ, jaŋe ine iŋuc eniŋte eipiembiŋ.
16 Gore ine ʒiŋuc mupie manapo: Eki wiac irec me irec fuŋne sâcne mutaniŋkeocmu â wiac ŋemâcne irec dâŋ wâc sâcne muafeckeocmu. Irec go qâreŋ keci woserâ fuŋne sâcne naza mutâc ecmuo ine mupe ŋaqi furi sâko hegarepie huocmu â qoqonaŋ golzi bakicne qonaŋke‐gareniŋmu. Eme uucmaŋ‐naneo guriŋ bapa ŋic namba 3 erâ juzemec.”
17 Iŋuc mume Daniezi ŋicwofuŋ dâŋ ʒiŋuc bâtikiecnewec: “Bubiaŋ wiac i fogareoc, me ŋic moc râcnezo murâ râcnec; no ine sifu qâreŋ keci wose‐garerâ fuŋne gaza mutâc epemu.
18 O ŋicwofuŋ, Anutu Femicne sâkozi mamacge Nebukaneza manacneme sâckehame uucmaŋ‐ticnao tâpiri â ʒâŋe biŋe erâ ɋuŋɋasaŋ sâkohec juwec.
19 Eme Anutuzi tâpiri sâko râcnewecte ŋic gurune gurune â ŋicne ŋicne erâ dâŋne dâŋne jaŋe ere maio ɋarac ɋarac qahuc hâwic‐jopawec; eki ŋic e me e qazo murâ qawec, me akickezo murâ akickewec, ehuc e me e bafaharezo murâ bafaharewec, me bawahazo murâ bawahawec.
20 Mâc maŋfefe erâ maŋrâŋgeŋ bâfuahuc penaroŋ eme ŋicwofuŋ ŋeŋe‐ticnaonec tuŋkekicne â ʒâŋe biŋe‐ticne jâoc rokicne.
21 E ŋicguruonec jâpekicne â maŋticne i qowimaŋ tinac ewec, erâ kâte doŋgi jaŋehec ŋeŋe juju ewec; e bulimakao iŋucne kecɋaŋ gumembiŋ â maniŋ titikuczi fuame sahac‐ticne bânâŋke‐fârewec. Iŋuc fuacnekume ʒiŋuc mana tarawec: Anutu Femicne sâko e mâreŋ ŋicwofuŋ jaŋere Wofuŋ jukac, irec uucmaŋ‐jeŋic i ŋic mocte meo râezo murâ râeocmu.
22 Eme ŋokâ‐ticne Belesaza goki ine wiac i sasawa mana‐bipiehuc maŋge moc mi bârisiemeŋ.
23 Aricne, go sambâŋte Anutu penaroŋ ecnehuc ufuŋ‐ticnere râqâc wiac mutec bafisipie go gahacne mecne, fekicnefâcge mecne, ŋonâŋfâcge erâ ŋonâŋ ocfâcge ŋoŋe mâmâc râqâc irecnec waiŋ opâ nâmbiŋ. Erâ i sawa mâcne, go ɋâŋ qâqâtâc maŋ mamanasu tâmiric gol me siliwa me aeŋ bâbâroŋ me aeŋ jâmbâŋ me jâc me qânâzi bakicne jaŋe hâcne muteŋ bâteŋ ejaremeŋ. Juju bâfua‐garehuc hatage sasawa soŋaŋkeekac Anutu e ine araŋ moc mi bacnehuc jumeŋ.
24 “Eme irec hâcne qâreŋ kecʒi eraonec fuawec.
25 Sâpeo qâreŋ fuawec ine kecʒiŋuc: ‘Mene, Mene, Teke Ufasiŋ.’
26 Dâŋ qâreŋ irec fuŋne kecʒiŋuc fokac: Mene irec fuŋne kecʒiŋuc: Anutuzi uucmaŋgere ʒoaŋ gie bapa wose biric erâ bârâriewec.
27 Teke irec fuŋne ʒiŋuc: Sigelio râecgupie ŋemâcge afecne sawa fuawec.
28 Ufasiŋ irec fuŋne ʒiŋuc: Uucmaŋge kâdoc qarâ Medeŋic â Perisia ŋic jarekicne.”
29 Eme Belesazazi mume Danie ŋaqi furi sâko hecnepie huwec â qoqonaŋ moc golzi bakicne qonaŋkecnembiŋ. Ehuc Daniezi ŋicwofuŋte uucmaŋko guriŋ bapa ŋic namba 3 juocte mutâcnecnewec.
30 Ŋafe ijaha ine Kaldea ŋicwofuŋ Belesaza e qâhâmombiŋ.
31 Ehame Medeŋic ʒâŋene Dariusi eki jara 62 bazurâ tucticne qawec.