14
Hâmoc fuame wiac fuŋne fuŋne mi enʒepieŋ
1 “Ŋoŋe Wofuŋ Anutu‐ŋeŋicte naru motecfâc, irec hâmoc fuame busâqoc manahuc sahac‐ŋeŋic he qânʒiŋ mi enʒepieŋ, erâ mai‐ŋeŋicko qizec susuc‐ŋeŋic mi bâtâcnenʒepieŋ.
2 Ŋoŋe Wofuŋ Anutu‐ŋeŋicte maio ŋic tirine juŋgopieŋ, Wofuŋ eki hâcne e jahacnere biŋe erâ juniŋte ŋic gurune gurune mâreŋko juraŋgopieŋ jaŋeraonec rowosâec‐ŋopawec.
Qowi wâwânâŋhec â wâwânâŋ tâmiric irec dâŋ
(Tah 11:1–47)
3 “Ŋoŋe wiac mamakâcne moc mi nânʒepieŋ.
4 Qowi kecʒiŋuc jaŋe ine sâcne nâcjopaniŋmu: Bulimakao ŋicne, lama, noniŋ,
5 kâte bulimakao, kâte noniŋ fuŋne fuŋne erâ tiki lama.
6 Qowi kike‐jeŋic sosohoc â nânâ ŋâc hepie wefume nâeŋgopieŋ i jaŋe sasawa sâcne nâcjopaniŋmu.
7 Mâc nânâ ŋâc hepie wefume nâeŋgopieŋ â kike‐jeŋic sosohoc jaŋeraonec qowi kecʒiŋuc jaŋe ine mi nâcjopanʒepieŋ: Kamele â qowi moc ʒâŋene hea â moc ʒâŋene roki beʒe. Jaŋe nânâ ŋâc hepie wefume nâeŋgopieŋ, mâc kike‐jeŋic sosohoc mi efârekicnere mana‐jarepie qowi wâwânâŋhec enʒepieŋ.
8 Ehuc bec jaŋe kike‐jeŋic sosohoc, erâ ine nânâ nâhuc ŋâc mi heeŋgopieŋte mana‐jarepie wâwânâŋhec jaha enʒepieŋ. Ŋoŋe biuc‐jeŋic mi nânʒepieŋ â qâŋɋâŋ‐jeŋic ba bâuac wâc mi enʒepieŋ.
9 “Opâo qowi juŋgopieŋ jaŋeraonec gâcne kecʒiŋuc nâcjopazo murâ nâcjopanʒepieŋ: Dipa â garac‐jeŋichec sasawa sâcne nâcjopaniŋmu.
10 Ehuc opâ qowi dipa â garac tâmiric juŋgopieŋ jaŋe ine mi nâcjopanʒepieŋ, jaŋe wâwânâŋhec hâcne.
11 “Ŋoŋe wipe wiac wâwânâŋ tâmiric jaŋe nâcjopazo murâ nâcjopa‐fârenʒepieŋ.
12 Mâc wiac kecʒiŋuc jaŋe ine mi nâcjopanʒepieŋ: Tucwipe, qeri, keŋ,
13 mebâroŋ â bicqâreŋ,
14 kâec kâec,
15 qera, wioc, kâte kaiŋɋaŋ, piʒu piʒu,
16 bioc bioc, qâoŋ, opâ baro,
17 baro gâgâpâc, gafu hâro, gara raweŋ,
18 qeʒo, baro qaŋqaŋ, bikuaŋ â mindi mindi.
19 Erâ gisic wiac fakec‐jeŋichec jaŋere manapie wâwânâŋhec eme mi nâcjopanʒepieŋ.
20 Wiac fakec‐jeŋichec gâcne biaŋne ine nâcjopanʒepieŋ.
21 “Qowi wiac i me i e jahac hâmo sipiric eocmu i mi nânʒepieŋ. Hae‐ŋeŋicko ŋic jaba juŋgopieŋ jaŋe ine jarezo murâ jarepie nânʒepieŋ, me ŋic furune jaŋe jarezo murâ jarepie furine ŋarenʒepieŋ.
“Ŋoŋe lama motecne neŋgocnere susuhec mi rikenʒepieŋ.
Wiac teŋkonec wâŋ rârâe irec sâcmutâc
22 “Ŋoŋe jarane jarane gie wiac he sarac epie fârine fuame irecnec teŋkonec wâŋ bârârienʒepieŋ.
23 Eme Wofuŋ Anutu‐ŋeŋic e ʒâŋe‐ticnere ŋeŋe hae moc bâfuaocte hae mâreŋ bâwosâeocmu ira ere maio padi jacgoŋ me waiŋ me oliwa wokemaŋ me lama bulimakaofâc‐ŋeŋic mârâc fufua irec teŋkonec wâŋ nânʒepieŋ; ehuc dameŋ sâc Wofuŋ Anutu‐ŋeŋic araŋ babacne irec fuŋne mana taranʒepieŋ.
24 Me Wofuŋ Anutu‐ŋeŋiczi giegaŋ‐ŋeŋic jambuŋkeme nânâ wiac‐ŋeŋic teŋkonec wâŋ i hata ʒoricnere Wofuŋ Anutu‐ŋeŋic ʒâŋe‐ticnere ŋeŋe hae bâfuaocte mâreŋ bâwosâeocmu ira baraniŋte eipieniŋmuo
25 ine moneŋte erâ qikiŋnehuc moneŋ rorâ Wofuŋ Anutu‐ŋeŋiczi hae mâreŋ bâwosâeocmu ira ranʒepieŋ.
26 Ra fisirâ aŋac‐ŋeŋiczi muocmu irec sâc moneŋ izi wiac kecʒiŋuc furine banʒepieŋ: Lama bulimakao, me waiŋ me opâ sanaŋ me wiac gâcne gâcne. Ehuc ŋaŋacne â wiacfâc‐ŋeŋic ŋoŋe ira hâcne wiac i Wofuŋ Anutu‐ŋeŋicte maio nâ bac ehuc ʒeri enʒepieŋ.
27 Ehuc Lewiŋic jaŋe merâfâc hae mâreŋ tâmiric ŋoŋehec jueŋgopieŋ jaŋere mi nikec‐ŋopazejec.
28 “Ŋoŋe jara jahec â moc tarame sâc wiac fua‐ŋareocmu irecnec teŋkonec wâŋ hae‐ŋeŋicko bâtumaŋnenʒepieŋ.
29 Ehame Lewiŋic jaŋe ŋoŋehec merâfâc mâreŋ mi rauckeniŋmu jaŋe mecne erâ ŋic jabane me hozec bekâ hae‐ŋeŋicko mâmâc juraniŋmu jaŋe fisirâ nâ gapec enʒepieŋ. Iŋuc epie Wofuŋ Anutu‐ŋeŋiczi gie baniŋmu sâc i jambuŋke‐ŋareocmu.