19
Ŋeŋezic hae jaŋere dâŋ
(Ʒar 35:9–28; Jos 20:1–9)
1 “Ŋoŋe Wofuŋ Anutu‐ŋeŋiczi ŋic gurune gurune bâsirowec‐jopahuc mareŋ‐jeŋic ŋare tahac eme ro rauc erâ hae‐jeŋicko ŋec juc eniŋmu.
2 Ehuc Wofuŋ Anutu‐ŋeŋiczi mâreŋ ŋare tahac eme ro rauc eniŋmu ira hae sâko jahec â moc bâwosâec‐jopanʒepieŋ.
3 Erâ hata wiac‐jeŋic barâ, Wofuŋ Anutu‐ŋeŋiczi mâreŋ ŋare tahac eocmu i bâfâuckepie dâkâne jahec â moc ezejec; ehame ʒika qaqa ŋic jaŋe ira wiserâ razo murâ ranʒepieŋ.
4 “Ŋoŋe iŋuc epie ʒika qaqa ŋic jaŋe hae ira wiserâ rahuc juju‐jeŋic sâcne ŋezickeniŋmu. Ŋic moczi ŋic âgo‐ticne râsi mi ecneocmu me qâhâmoocte mi mecne manasuocmu.
5 Ehuc âgo‐ticnehec kâteo rarâ jâc qahuc râric qâunuckeme rarâ âgo‐ticne hehâmome ine ŋic e hae kecira wiserâ ra soŋkezo murâ soŋkezejec.
6 E okac babazu ŋiczi aarickeme jâpe raku hata ʒoricnere dockeme qâhâmozacte iŋuc ezejec. Ŋic iŋucne e juwicnao ŋic âgo‐ticne râsi mi ecnewecte hâmocte biŋe mi ekac.
7 No irec hâcne ʒiŋuc mutâcne‐ŋarekopac: Ŋoŋe hae jahec â moc bâwosâenʒepieŋ.
8-9 Erâ ŋoŋe miŋecgac sâcmutâc ŋaza mutâc ekopac i aijakic jaha mana rereŋ ehuc Wofuŋ Anutu‐ŋeŋic maŋzi ʒâfickerâ kike hata‐ticne bâjâpeniŋmuo ine eki mamacfâc‐ŋeŋic mupaŋke‐jarewec irec sâc mâreŋ‐ŋeŋicte ma bâskoahuc mamacfâc‐ŋeŋic mâreŋ jareocte mupaŋkewec i sasawa ŋoŋe ŋareme hae iŋucne jahec â moc ʒuhuckerâ bâwosâenʒepiaŋ.
10 Ŋoŋe Wofuŋ Anutu‐ŋeŋiczi mâreŋ ŋare tahac eme ro rauc eniŋmu ira ŋic bahacmâc ere soc hoŋkepie irec kiŋzi fai‐ŋeŋicko fezacte iŋuc hâcne enʒepieŋ.
11 “Me moczi ŋic âgo‐ticne râsi ecnerâ somâ bacnehuc qarâ qâhâmohuc wiserâ ra ŋeŋezic hae moc ira fisirâ soŋkeocmu mecne.
12 Iŋuc eme e jahacne hae soŋaŋfâc jaŋe ŋic gâcne sorec‐jopapie ra rorâ okac babazu ŋic ere meo râepie eki qâhâmozejec.
13 Ŋoŋe ŋic e honerâ ere busâqoc mi mananʒepieŋ, aricne, e qâhâmopie ŋic bahacmâc socticne maŋgâŋ hoŋkekicne irec kiŋ i Israe ŋondeŋ‐ŋeŋicko omaezejec. Ŋoŋe iŋuc erâ juhâc qâhâmoniŋmu.
14 “Ŋoŋe Wofuŋ Anutu‐ŋeŋiczi mâreŋ ŋare tahac eme ro rauc eniŋmu ira juhuc mamacfâc‐ŋeŋic jaŋe diguracfâc‐ŋeŋic jaŋere mâreŋte ma bambiŋ i mi bârârienʒepieŋ.
Mumutaniŋ giere sâcmutâc
15 “Ŋic moczi wiac hâhâwicne me wiac hehesic i me i bâfuame ŋic mocjahazi fuarâ fuŋne‐ticne mi muzejec, aricne, ŋic jajahec me jahec â moc jaŋe fuŋne‐ticne mutaniŋkepie dâŋticne mutaranʒepieŋ.
16 Me ŋic sindaŋne moczi fuarâ ŋic âgo‐ticne dâŋgieo râezo mume
17 ine jahe mâmâc jaha Wofuŋte maio mecne erâ taha bapa â mumutara ŋic dameŋ ira mumutara gie baniŋmu jaŋere maio mâmâc fuazepirec.
18 Ehame mumutara ŋic jaŋe fuŋne‐jekic mananiŋte aijakic jaha mu wioc ejactenʒepieŋ. Eme mumutaniŋ ŋic burecnezi ŋic âgo‐ticne maŋgâŋ qorickewec, fuŋne iŋuc taniŋkeme
19 ine âgo‐ticne wiac ecneocte manasuwec i hâcne e ecnenʒepieŋ. Ŋoŋe iŋuc ehuc wiac hehesicne ŋondeŋ‐ŋeŋickonec bâsuepie razejec.
20 Eme ŋic gâcne sâko jaŋe wiac i hone manac erâ hâwic‐jopame wiac hehesic iŋucne ŋondeŋ‐ŋeŋicko mocwâc mi enʒepieŋ.
21 Ŋoŋe ŋic iŋucne honerâ busâqoc mi manacnenʒepieŋ, aricne, eki ŋopame okacne qanʒepieŋ, me moczi ʒâŋe‐ŋeŋic âke hâpome okacne âke hâpocnenʒepieŋ, me moczi micsiec‐ŋeŋic hezume okacne hezucnenʒepieŋ, me moczi me kike‐ŋeŋic qazume okacne qazucnenʒepieŋ jaha.