2
Mâreŋ burocnao juhapie jara 40 tarawec
1 “Eme nâŋâc risierâ, Wofuŋzi nazawec irec sâc ehuc mâreŋ burocnao ranaŋte Hâwec Bâbâroŋkopec rambeŋ, ehuc dameŋ ʒora Seiri tiki mâreŋ râreckehuc jumbeŋ.
2 Ehame Wofuŋzi kecʒiŋuc nazawec:
3 ‘Ŋoŋe tiki mâreŋ ʒira dameŋ ʒora râreckehuc jumbiŋ, irec ʒi faic mâreŋkopec raniŋ.
4 Erâ ŋic ŋokac ʒiŋuc jazac: Ŋoŋe qomâfâc‐ŋeŋic, Esaure ɋâricfâc jaŋere mâreŋ fotâcnezo eŋgopieŋ; jaŋe Seiri mâreŋko juŋgopieŋ hâcne, ehuc ŋoŋere hâwic‐jopakac. Irec ŋoŋe rucjari‐ŋeŋic bahuc
5 jaŋehec qaqac mi enʒepieŋ. No Esau Seiri tiki mâreŋ râcnepe ro rauc ewecte jaŋere mâreŋ dâkâne piicne jâmbâŋ, kike tapezi ââtenere sâc i moc mi ŋare‐jâmbâŋkepemu.
6 Ŋoŋe jaŋeraonec nânâ opâ moneŋzi furine barâ nânʒepieŋ.
7 No Wofuŋ Anutu‐ŋeŋiczi wiac ebac ehuc jumbiŋ sasawa i jambuŋke‐ŋarepo, ehuc mâreŋ burocne ʒi fotâcnehuc juhapie hone manac eŋareekopac wâc; no Wofuŋ Anutu‐ŋeŋiczi jara 40 sâko ŋoŋehec juhape wiac moc mi basambiŋ.’
8 Wofuŋzi iŋuc nâzâme hata ʒuhuckerâ rambeŋ, ehuc qomâfâc‐nâŋec, Esaure ɋâricfâc Seiri tiki mâreŋko juŋgopieŋ jaŋe behec‐joparâ Araba wâneŋko hata sâko fokac i mecne erâ Elata â Ezioŋ‐Gebe hata i mâmâc jâururâ rambeŋ.
“Rahuc hata bâŋorierâ Moabi mâreŋ burocnaopec rambeŋ.
9 Ehame Wofuŋzi kecʒiŋuc nazawec: ‘Ŋoŋe Moabi ŋic maŋbâiŋ ejarehuc ʒika mi qanʒepieŋ; no Ari hae Lotire ɋâricfâc jaŋe jarepe ro rauc embiŋ, irec Moabi ŋic jaŋere mâreŋ dâkâne ŋarepe moc mi rauckeniŋmu.’
10 (Emimŋic jaŋe mârâc jaha ira jumbiŋ, jaŋe ŋic kâcɋene â guru sâko; jaŋe Anaka ŋic jaŋere sâc ŋic ʒoricne jaha.
11 Anaka ŋic jaŋere ʒâŋe Refaim ŋic mumbiŋ iŋuc jaha wâc jaŋere ʒâŋe mumbiŋ, mâc Moabi ŋic jaŋe ine Emimŋic mujarembiŋ.
12 Horiŋic jaŋe mârâc jaha Seiri tiki mâreŋko jumbiŋ wâc, ehame Esaure ɋâricfâc jaŋe ine mâreŋ‐jeŋic jowac rorâ ŋic jopa jâpec ejarehuc sipiric‐jopambiŋ. Ehuc rune jaŋere jujutacko ŋec juc embiŋ; ine Wofuŋzi Israe ŋic mâreŋ jareme ro rauc ehuc rune jopa bâtâtiec ejarembiŋ irec sâc embiŋ hâcne.)
13 ‘Irec ŋoŋe ʒi faharerâ raku Ʒerede opâ fotâcneniŋ.’ Wofuŋzi iŋuc nâzâme nâŋâc raku Ʒerede opâ fotâcnembeŋ.
14 Eme Kadesi‐Baranea hae beherâ rahuc juku Ʒerede opâ fotâcnehapene jara 38 ewec. Erâ rahuc juhapene Wofuŋzi momori ŋic mupaŋke‐jarewec irec sâc fua‐jareme hâmo sipiric efârembiŋ.
15 Wofuŋ e râsi ejarehuc teuŋkonec bâsirowec‐jopakume omae‐fârembiŋ hâcne.
16 “Eme momori ŋic jaŋe ŋic ŋokac guru‐jeŋicko omae‐fârepie
17 Wofuŋzi kecʒiŋuc nazawec:
18 ‘Ŋoŋe miŋecgac jaha Moabi mâreŋte ma Ari haeo fokac i jâurunʒepieŋ.
19 Jâururâ raku Amoŋŋic jaŋere mâreŋ bâqiŋkerâ maŋbâiŋ ejarehuc ʒika mi qanʒepieŋ; no mâreŋ‐jeŋic Lotire ɋâricfâc jaŋe jarepe ro rauc embiŋte Amoŋŋic jaŋere mâreŋ dâkâne ŋarepe ro rauc moc mi eniŋmu.’
20 (Mâreŋ irec ʒâŋe i Refaim mâreŋ mueŋgopieŋ wâc, mârâc jaha Refaim ŋic jaŋe ira jumbiŋ irec. Amoŋŋic jaŋe ine Ʒamaʒumim ŋic mujareeŋgopieŋ.
21 Jaŋe ŋic kâcɋene erâ guru sâko, Anaka ŋic jaŋere sâc ŋic ʒoricne jaha. Wofuŋzi ine jopa jâpec ejarehame Amoŋŋic jaŋe mâreŋ‐jeŋic ro rauc erâ jujutac‐jeŋicko ŋec juc embiŋ.
22 Wofuŋ e mârâc jaha Esaure ɋâricfâc, Seiri tiki mâreŋko juŋgopieŋ jaŋere erâ iŋuc jaha ewec. E jaŋere ʒâŋe faio Horiŋic jopa sipiric ejareme jaŋe mâreŋ‐jeŋic jowac rorâ jujutac‐jeŋicko ŋec juc embiŋzi eeŋgopieŋ.
23 Awimŋic hae piic piicko Gaza hae râreckehuc jurambiŋ jaŋe sâc ijaha wâc ejarekicne, Kafatori ŋic jaŋe hâcne mâreŋ‐jeŋickonec fisirâ jopa sipiric ejarehuc jujutac‐jeŋicko ŋec juc embiŋ.)
24 ‘Ajoc, ŋoŋe faharerâ hata ʒuhuckerâ raku Aronoŋ opâwâc qaniŋ. Manaŋgopieŋ, no Hesiboŋ haeonec Amori ŋicwofuŋ Sihoŋ e jahacne â mâreŋ‐ticne i ŋoŋere meo râekopac, irec ŋoŋe fuŋkerâ ʒika qahuc mâreŋ‐ticne ro rauc enʒepieŋ.
25 No miŋecgac hâcne fuŋkerâ, sambâŋ rurumaŋnao ŋic gurune gurune juraŋgopieŋ jaŋe ejarepe ŋoŋere hâwic‐jopaha bipic tatara ejarezejec. Jaŋe ŋoŋere biŋe manarâ ɋarac ɋarac qahuc maŋjeŋic gâckezejec.’
Israe ŋic jaŋe Sihoŋ â ŋicfâc‐ticne qâmiziec‐jopambiŋ
(Ʒar 21:21–30)
26 “Eme Kedemoti mâreŋ burocnao juhuc kiŋaŋŋic sorec‐jopape Hesiboŋ ŋicwofuŋ Sihoŋtao wamadâŋ kecʒiŋuc barambiŋ:
27 ‘Go mana‐nârehaŋ mâreŋge fotâcnenʒepeneŋ. Nâŋe fâreopec me qanaopec mâcne, hata sâkooa ranaŋte muŋgopeneŋ.
28 Erâ nânâ opâ râe‐nâretec moneŋzi furine banʒepeneŋ.
29 Esaure ɋâricfâc Seiri tiki mâreŋko juŋgopieŋ â Moabi ŋic Ari haeo juhuc mana‐nârembiŋ, iŋuc jaha mana‐nârehaŋ mâreŋge kikezi fotâcnerâ raku Jordaŋ opâ qarâ Wofuŋ Anutu‐nâŋeczi mâreŋ nâre tahac ekac ira raʒinʒepeneŋ.’
30 Hesiboŋ ŋicwofuŋ Sihoŋ eki ine hecke‐nârewec, erâ i Wofuŋ Anutu‐nâŋeczi menâŋecko râeocte maŋmutuc bahuc maŋrâŋgeŋ bâfuacnewecte iŋuc ewec. Irec fuŋne miŋecgac taniŋkekac hâcne.
31 Eme Wofuŋzi kecʒiŋuc nazawec: ‘Manakic, no Sihoŋ â mâreŋ‐ticne i meŋeŋicko râezo ekopac, irec ŋoŋe fuŋkerâ mâreŋ‐ticne ro rauc enʒepieŋ.’
32 Sihoŋzi ine râsi enârehuc momorifâc‐ticne sasawa jaŋehec waharâ Jahazi haeo ʒika fuŋkembiŋ.
33 Wofuŋ Anutu‐nâŋec eki ine menâŋecko râec‐jopame Sihoŋ e jahacne â ŋokâfâc‐ticne sasawa jopa‐fârembeŋ.
34 Erâ domarâ fic hae wiac‐ticne ro rauc ehuc ŋic ŋokac naru motec qâmiziec‐jopambeŋ.
35 Bulimakao jaŋe sawa ʒikare mateŋ‐nâŋec rocjopambeŋ, erâ haeo ʒikare merâfâc wiac gâcne fowec i mâmâc rombeŋ.
36 Aroe hae Aronoŋ wâneŋ qaŋeŋnao ŋekac ira fuŋkerâ raku Gileade mâreŋko tarakac, ŋondeŋ ira hae sacnehec ŋerawec ira wâc mi quŋkembeŋ, Wofuŋ Anutu‐nâŋeczi menâŋecko râe‐fârewec hâcne.
37 Amoŋŋic jaŋere mâreŋ ine mi bâqiŋkembeŋ, Wofuŋ Anutu‐nâŋeczi dâŋ nâzâ mutâc ewec i reŋkehuc Jaboko opâ qaŋeŋnao me tiki mâreŋko hae ŋerawec ira moc mi rambeŋ.