26
Nânâ bâbâsu â teŋkonec wâŋ rârâe irec sâcmutâc
1 “Ŋoŋe Wofuŋ Anutu‐ŋeŋiczi mâreŋ moc ro rauc epie ŋoŋere biŋe eha ira juniŋte ŋare tahac eocmu.
2 Eme ŋoŋe ira fisirâ juhuc he sarac epie fârine fuame gie ɋâricnaonec nânâ wiac gâcne heo ro ŋiec erâ Wofuŋ Anutu‐ŋeŋic e ʒâŋe‐ticne foocte hae mâreŋ moc bâwosâeocmu ira baranʒepieŋ.
3 Ehuc dameŋ ira taha bapa moczi gie bahame erao rarâ ru sâc ʒiŋuc âzâcnenʒepieŋ: ‘No miŋecgac Wofuŋ Anutuge ere maio ʒiŋuc mupaŋkekopac: Wofuŋzi mâreŋ nâre tahac eocte mamacfâc‐nâŋec mupaŋke‐jarewec mâreŋ ira hâcne ware fisipo.’
4 Iŋuc mupie taha bapazi nânâ wiac ŋowac rorâ Wofuŋ Anutu‐ŋeŋicte alata maŋfuŋko râezejec.
5 “Ehame ŋoŋe Wofuŋ Anutu‐ŋeŋicte maio dâŋ kecʒiŋuc munʒepieŋ: ‘Mamac‐nâŋec e Aramea ŋiczi hahata jujujec. Juku Aigita mâreŋko hurâ ira jaba juwec. E kikefuŋfâc‐ticne jaŋe ŋic afecne mac. Eme ira juhuc ine sawe mâririackerâ ŋic guru sâko embiŋ.
6 Ehame Aigita ŋic jaŋe bomac‐nâpohuc bâʒâic‐nâporâ fai‐nâŋecko tagi ŋemâcne râepie fewec.
7 Iŋuc enârepie mamacfâc‐nâŋec jaŋere Wofuŋ Anutu e wira wâwâsic ecnepene mana‐nârehuc fific guguriŋ â ʒâic busâqoc erâ ʒârâ hâriŋ faio jumbeŋ i hone‐fârewec.
8 Hone‐fârerâ tâpiri mesanaŋ‐ticnezi mâsi wiac hâhâwicne fuŋne fuŋne bâfuahuc Aigita mâreŋkonec bacnâpo wahawec.
9 Ehuc hae mâreŋ susu â baŋac fusucmarâ qâmbâriŋkeekac ʒira hâcne râec‐nâpowec.
10 O Wofuŋ, ʒi ine mâreŋ nâre tahac emeŋ irec fârine bâsuhuc baware‐gareŋgopeneŋ.’ Ŋoŋe iŋuc muhuc nânâ wiac‐ŋeŋic i Wofuŋ Anutu‐ŋeŋicte maio râepie foha Wofuŋ Anutu‐ŋeŋic mai ecnenʒepieŋ.
11 Ehuc ŋaŋacne mecne, garikiŋfâc‐ŋeŋic mecne, Lewiŋic mecne â ŋondeŋ‐ŋeŋicko ŋic jabane juŋgopieŋ jaŋe mecne mâmâc Wofuŋ Anutu‐ŋeŋiczi ehâmo‐ŋarewec irec ʒeri enʒepieŋ.
12 “Ŋoŋe jufekupie jara jahec â moc eha gie‐ŋeŋicko wiac fuaekac irec fârine teŋkonec wâŋ i Lewiŋic mecne, ŋondeŋ‐ŋeŋicko ŋic jabane jueŋgopieŋ mecne, erâ hozec bekâ jaŋe mâmâc jare‐fârepie hae‐ŋeŋicko juhuc nâ gapec enʒepieŋ.
13 Ŋoŋe iŋuc ehuc Wofuŋ Anutu‐ŋeŋicte maio ʒiŋuc munʒepieŋ: ‘Nâŋe nânâ wiac bâtirikicne i ficnâŋeckonec bârârierâ sâcmutâc nâzâ mutâc emeŋ irec sâcko Lewiŋic â ŋic jabane erâ hozec bekâ jaŋe jare‐fârembeŋ. Nâŋe sâcmutâc dâŋge pitic siŋsiŋne moc mi qâsuambeŋ, me irec wâc mi nikec‐nâpowec.
14 Nâŋe ki busâqoc ehuc wiac teŋkonec wâŋ moc mi nâmbeŋ, me wâwânâŋhec juhuc moc mi bârâriembeŋ, me gâcne hâmokicne jaŋere taha bâzi wâc mi râembeŋ. Nâŋe Wofuŋ Anutu‐nâŋec gore dâŋ mana rereŋ ehuc dâŋ nâzâ mutâc emeŋ irec sâc wiac efârembeŋ.
15 Irec go tiri haegao sambâŋ hâcne, ira juhuc ʒâŋe fitec wahame Israe ŋicgurufâcge nâŋe jambuŋ‐nâpohuc mâreŋ susu â baŋac fusucmarâ qâmbâriŋkeekac i nârezo mamacfâc‐nâŋec mupaŋke‐jaremeŋ i mâmâc jambuŋkezemec.’
Israe ŋic jaŋe Wofuŋte tiri ŋicguru
16 “Ŋoŋe dâŋsanaŋ â mumutâc dâŋ ʒi mana rereŋ eniŋte Wofuŋ Anutu‐ŋeŋiczi miŋecgac mutâcne‐ŋarekac; irec ŋoŋe maŋ â mamanasu‐ŋeŋic i erao furu jaha râepie foha aimuŋ mana rereŋ enʒepieŋ.
17 Ŋoŋe miŋecgac Wofuŋ e Anutu‐nâŋec jukac muhuc ere kike hata bâjâperâ dâŋsanaŋ‐ticne â sâcmutâc â mumutâc dâŋticne bajuhuc dâŋticne reŋkeniŋte musanaŋkembieŋ hâcne.
18 Ehame Wofuŋzi mupaŋke‐ŋarewec irec sâc e jahacne ŋicfâc erâ juniŋte â sâcmutâc dâŋticne reŋke‐fâreniŋte miŋecgac mupaŋke‐ŋarekac wâc.
19 Ehuc bafaharec‐ŋopame, ŋic gurune gurune bâfuac‐jopawec jaŋere sâc siricke‐fârehuc ʒâŋe biŋe sâkohec erâ juhapie muteŋ‐ŋopahuc sâsecŋopanʒepieŋ. Ehame mupaŋkewec irec sâc Wofuŋ Anutu‐ŋeŋicte tiri ŋicguru erâ junʒepieŋ.”