21
Kiŋaŋ qaqa jaŋere sâcmutâc dâŋ
(Sâc 15:12–18)
1 “Sâcmutâc dâŋ kecʒiŋuc mutâcne‐jarezemec:
2 Go Hebiraio kiŋaŋ qaqa ŋic moc furine bacmu ine kiŋaŋ qagarehuc juhame jara 6 tarazejec, jara namba 7 ira ine mâc râetec ra rambaŋ juzejec.
3 E bucticne warewecko buc jaha râetec ra juzejec, me ŋonâŋ‐ticnehec warepicko ŋonâŋnehec mâmâc râec‐jofatec ra juzepirec.
4 Me bomboŋ‐ticnezi ŋokac moc râcneme naru motec rocjopaocmuo ine ŋokac mecne naru motec mecne jaŋe mâmâc bomboŋte biŋe ehapie ŋic e bucticne ra juzejec.
5 Me kiŋaŋŋiczi ʒiŋuc muocmu, ‘Maŋnanezi bomboŋ‐nane mecne, ŋonâŋ naru motecfâc‐nane mecne jaŋerao domakacte no bucnane rambaŋ mi jupemu,’
6 iŋuc mume bomboŋ‐ticnezi Anuture maio râeme domazejec. Eme motâcko me motâc wâtuŋko râeme domaha bomboŋ‐ticnezi hazecne bâmârâŋkezejec; iŋuc eme kiŋaŋ qaqa‐ticne jusanaŋkezejec.
7 “Ŋic moc e otâ‐ticnezi kiŋaŋ qaqa juocte manasuhuc furire erâ qikiŋneocmu ine juku bomboŋ‐ticnezi kiŋaŋ qaqa ŋic jaŋere sâcko râeme mi razejec.
8 Me bomboŋ‐ticnezi e jahacne biŋe qarâ juku ere takickeocmuo ine ŋic moctao furire jaha râezejec. E ŋic furune jaŋerao furire râeocte mi manacnekicne, e eatuckewec irec.
9 Me ŋokâ‐ticnere biŋe qaocmuo ine e jahacne otâfâc ejareekac sâc ijaha ecnezejec.
10 Ŋokac moc ʒuhuckerâ roocmuo ine bâbâni rokicne e nânâ me ŋaqi qoruc me sahac‐ticne mi sakarecnezejec.
11 Wiac jahec â moc i mi ecneocmuo ine ŋokaczi tofa mi bazucnehuc mâc beherâ rambaŋ juzejec.
Ʒika qaqa ŋic jaŋere akadâŋ
12 “Ŋic moczi moc ŋic âgo‐ticne moc qâhâmome e jahacne wâc qâhâmozo
13 Me hâmocne mâcne, ʒâpâ qaocte qame Anutuzi manaha hâmoocmuo ine ʒika qaqa ŋic e mâreŋ moc mutâcnepe ira sâcne wiserâ ra juzejec.
14 Me ŋic moczi âgo‐ticne somâckerâ ututuŋ qâhâmoocmu e alata‐nane maicke‐bipieha sifu bârârietec hâmozejec.
15 “Ŋic moczi neŋgoc mamac jahec‐ticne jofaocmu e wâc qâhâmozo.
16 “Ŋic moczi âgo‐ticne fiuc rorâ furi roocte ŋic gâcne qikiŋne‐jareocmu me e jahacne kiŋaŋ qaqa juocte fiuc roocmu ŋic iŋucne hâmocko râezo.
17 “Moc e neŋgoc mamac jahec‐ticne sâwec‐jofaocmu e wâc hâmocko râezo.
18 “Ŋic jaŋe dâŋ mumuc ehuc moczi ŋic âgo‐ticne qânâzi me mehuhuŋzi heme mi hâhâmo mâc puriŋ erâ
19 juku mocwâc biaŋkerâ gunuo sâcne juocmuo ine ʒika qawec ŋic e okac tâmiric juzejec. Mâc âgo‐ticnere gie dameŋ sipirickekicnere furine râcnezejec, ehuc dotazi erao gie baocte wâc furine mâmâc râezejec.
20 “Ŋic moc e kiŋaŋ qaqa‐ticne ŋic me ŋokac qaha qaha hâmoocmuo ine bâbâtiŋko râezo.
21 Me kiŋaŋ qaqazi ʒoaŋ 2 me 3 ʒuhuckerâ juocmu ine ŋic e bâbâtiŋko mi râezo, e jahacne moneŋzi kiŋaŋ qaqa furine bawec irec.
22 “Ŋic jaŋe ʒika kosa qahuc ŋokac kiwechec moc qa hetuŋ ecnepie kogoc hâmocne rome faicnao huc ʒâic mi fuacneocmuo ine ŋokac qa hetuŋ ecnewec ŋic eki okacne moneŋ râcneme tarazejec. Ine ŋokac ŋowenezi kogoc hâmocnere furi muocmu sâc râezejec, erâ i mumutara ŋic jaŋe mutâcnehapie râezejec.
23 Me huc ʒâic me hâmoc fuacneocmuo ine okacne ŋic e wâc hâmozejec,
24 ʒâŋere okacne ʒâŋe jaha, micsiecte okacne micsiec jaha, mere okacne me jaha, kikere okacne kike jaha,
25 ʒocte okacne ʒoc jaha, wicte okacne wic jaha, ʒâpâre okacne ʒâpâ jaha râezemec.
26 “Ŋic moczi kiŋaŋ qaqa‐ticne ŋic me ŋokac ʒâŋenao qahuc ʒâŋe‐ticne sipirickeocmuo ine ʒâŋe‐ticnere erâ mâc râeme ra rambaŋ juzejec.
27 Me kiŋaŋ qaqa‐ticne ŋic me ŋokac ere micsiec moc hemârâŋkeme wahaocmuo ine micsiec‐ticnere erâ mâc râeme rambaŋ juzejec.
Qowizi ŋic hehâmoocmu irec sâcmutâc
28 “Bulimakao moczi ŋic me ŋokac moc ʒuŋenezi heme hâmome bulimakao e qânâzi hehâmorâ biuc‐ticne mi nânʒepieŋ, bulimakao rune ine okacnere mi mucnezo.
29 Me bulimakao e ʒuŋenezi ŋic hecjopaku biac maŋne eha rune uŋdâŋ âzâcnepie mana‐bipiehuc mi soŋaŋkeha ŋic me ŋokac moc hehâmome ine bulimakao qânâzi hehâmorâ rune mâmâc qâhâmonʒepieŋ.
30 Me moneŋzi juju‐ticne kitâcneocte mucnepie ine jaŋe juju‐ticnere okacne moneŋ ʒare muniŋmu sâc râezejec.
31 Me ŋic mocte naru me motec moc hehâmoocmuo ine sâc ijaha ecnezo.
32 Kiŋaŋ qaqa ŋic me ŋokac moc hehâmoocmuo ine bulimakao runezi kiŋaŋ qaqare bomboŋ siliwa moneŋ 30 râcnezejec, bulimakao ine qânâzi hehâmozo.
33 “Ŋic moczi nombâŋ beheme aaŋ foocmu me nombâŋ rorâ mi qofackeme bulimakao me doŋgi moczi huocmuo
34 ine nombâŋ runezi okacne râezejec, ine qowi rune moneŋ hâcne râcnezejec, â qowi hâmocne izi nombâŋ rune e jahacne biŋe ezejec.
35 “Ŋic mocte bulimakaozi ŋic mocte bulimakao heme hâmoocmuo ine bulimakao ɋâricne juocmu e râepie moneŋ kitâcneme moneŋ i sâckoa bâtâc bazepirec, â bulimakao hâmocne i hezurâ iŋuc jaha bârâwiŋnezepirec.
36 Me bulimakao e râŋgeŋne, runezi fuŋne‐ticne iŋuc biac juwicnao manarâ sifu mana‐bipiehuc sapao mi râewecko ine bulimakao hâmocnere okacne bulimakao jaha râezejec, â hâmocnezi e jahacne biŋe ezejec.