5
Mose â Aroŋ jahe Farao dâŋ âzâcnepire fâri tâmiric ewec
1 Eme Mose â Aroŋ jahe juku Faraorao rarâ dâŋ ʒiŋuc âzâcnepic: “Wofuŋ, Israe ŋic jaŋere Anutu e ʒiŋuc mukac: ‘Go ŋicfâc‐nane râec‐jopatec mâreŋ tuhuo rarâ nore hombaŋ moc ŋenʒepieŋ.’ ”
2 Iŋuc mupire Faraozi muwec: “Mo Wofuŋ mo, irec no dâŋticne mana rereŋ erâ Israe ŋic ŋoŋe râec‐ŋopape raniŋmu? No Wofuŋ e kâuc bakopac, erâ Israe ŋic ŋoŋe mi râec‐ŋopape raniŋmu.”
3 Iŋuc mume mupic: “Hebiraio ŋic nâŋere Anutu e nâŋe fua‐nârewec, irec huc hâmoczi me ʒikazi sipiric‐nâpozacte mana‐nâretec ʒoaŋ jahec â moc raku mâreŋ tuhuo Wofuŋ Anutu‐nâŋec taha bâzi rikecnenʒepeneŋ.”
4 Aigita ŋicwofuŋzi ine jasawec: “Mose â Aroŋ, ŋohe wemocte ŋic jaŋe gie‐jeŋic beheniŋte mukopirec? Ŋohe kâpâcwâru gie‐ŋekic ra banic me!”
5 Farao e iŋuc murâ ʒiŋuc jasawec: “Manakopirec, jaŋe mâreŋ rune nâŋe biac siric‐nâpoŋgopieŋko wemocte gie‐jeŋic hetararâ hombaŋ ŋeniŋte mukopirec?”
6 Erâ Farao e ʒoaŋ ijaha gie soŋaŋfâc‐jeŋic â micnefâc‐jeŋic dâŋ ʒiŋuc mutâcne‐jarewec:
7 “Ŋoŋe ŋic sopâc uucne jarepie afehec bâsifuckehuc fic bapa qânâ baeŋgopieŋ i mocwâc mi jarenʒepieŋ, jaŋe jaŋac rarâ ro nusec enʒepieŋ.
8 Erâ juwicnao qânâ rikeniŋte mujarekicne ʒare i moc mi bawahahuc ijaha bâfuanʒepieŋ. I jaŋe ojoŋ juhuc ʒiŋuc muŋgopieŋte: ‘Nâŋe ra Anutu‐nâŋec bâzi rikecnenʒepeneŋ.’
9 Irec fai‐jeŋicko gie bâmâckehuc ŋemâcne jâmbâŋ râepie ferâ kihâmoc‐jopame burecdâŋte hazec mi râenʒepieŋ.”
10 Iŋuc mume ŋic jaŋere gie soŋaŋ â micne jaŋe ra ŋic jazambiŋ: “Farao e muac‐nâpohuc ʒiŋuc mukac: ‘Sopâc mocwâc mi jarezo.
11 Irec ŋoŋe ŋaŋac, ira me ira fokacko ra bâfuarâ ronʒepieŋ, ehame gie‐ŋeŋicte sâc ine moc mi wahazejec.’ ”
12 Eme ŋic jaŋe sopâc ro nusec eniŋte Aigita mâreŋ sâkoo râwiŋ qâwiŋne‐fârembiŋ.
13 Gie soŋaŋ jaŋe ine fafine ejarehuc mumbiŋ: “Sopâc uucne râe‐ŋarekicne dameŋ ira ʒoaŋne ʒoaŋne gie bambiŋ sâc ijaha wâc bâfuanʒepieŋ.”
14 Ehame Faraore soŋaŋfâc Israe gie soŋaŋ râec‐jopambiŋ jaŋe ʒiŋuc wio‐jarehuc jopambiŋ: “Ŋoŋe wemocte juwicnao qânâ gie muŋarepene bambiŋ sâc ijaha jacne â miŋecgac mi bâfuambieŋ?”
15 Eme Israe gie soŋaŋ jaŋe Faraorao rarâ mu huacbuc ehuc ʒiŋuc âzâcnembiŋ: “Kiŋaŋ qaqafâcge nâŋe iŋuc wemocte enârekomec?
16 Sopâc uucne mocwâc mi nârehuc sifu ʒiŋuc munâreŋgopieŋ: ‘Qânâ rikenʒepieŋ!’ Iŋuc muhuc kiŋaŋ qaqafâcge nâŋe nâpoŋgopieŋ wâc. Go ŋicfâcge nâŋe iŋuc enârehuc kiŋsâko hurekomec i!”
17 Eme eki muwec: “Ŋoŋe ŋic ojoŋne, ojoŋ juŋgopieŋ hâcne. Irec muŋgopieŋ, ‘Nâŋe ra Wofuŋ bâzi rikecnenʒepeneŋ.’
18 Ʒi ra gie‐ŋeŋic baniŋ, mâc sopâc uucne ine mi ŋarezo, erâ sifu qânâ ʒare muŋarekicne i jâmbâŋ bâfuarâ râepie warezejec.”
19 Eme Israe gie soŋaŋ jaŋe ʒiŋuc jazakicnere manapie boc ŋemâckewec: “Ŋoŋe ʒoaŋne ʒoaŋne qânâ bâfuaniŋte mukicne sâc i moc mi wahazejec.”
20 Eme Faraoraonec waharâ Mose â Aroŋ jahe woŋec domahapire bâfuac‐jofarâ
21 dâŋ ʒiŋuc jasambiŋ: “Wofuŋzi fua‐ŋacterâ okacne bazu‐ŋacteoc. Farao â ŋicfâcne jaŋe ŋohere erâ hâcne mana‐nârepie boc sâqorekac, ŋohe qâhâmoc‐nâponiŋte ʒika mejeŋicko râekopirec hâcne.”
22 Iŋuc mupie Mosezi Wofuŋ mu wâwâsic ecnehuc ʒiŋuc muwec: “O Wofuŋ, go wemocte ŋicguru ʒi wiac hâhâwicne iŋucne ejaremeŋ, wemocte sorecnutec warepo?
23 No Faraorao rarâ gore micte dâŋ âzâcnepo dameŋ ira hâcne fuŋkerâ ŋicguru ʒi mâsi repicne ejarehuc juweczi jukac jaha, eme goki ine gurufâcge moc mi batarac‐jopameŋ.”