8
Qaqec fuambiŋ
1 Eme Wofuŋzi Mose ʒiŋuc âzâcnewec: “Faraorao rarâ âzâcnec, ‘Wofuŋzi ʒiŋuc mukac: “Go ŋicfâc‐nane râec‐jopatec ra kiŋaŋ qanarenʒepieŋ.
2 Me raniŋte qatara‐jarecmuo ine mupe qaqec fuarâ hae mâreŋge ŋefacke‐fâreniŋmu.
3 Erâ Nilu opâ fusucma sâqorehuc wefurâ ficgao ferâ guŋficko mecne fofogao mecne sâcke‐fârerâ raku kiŋaŋ qaqafâcge â ŋicfâcge jaŋere fic sasawa fusucma‐fâreniŋmu wâc. Erâ ʒafeo â oto gomba wiacko qaqec sasawa ŋeniŋmu.
4 Erâ i sawa mâcne, gahacne sahacko mecne, ŋicfâcge jaŋere sahacko mecne, kiŋaŋ qaqafâcge sasawa jaŋere sahacko mâmâc ferâ bohotaniŋmu.” ’ ”
5 Eme Wofuŋzi Mose ʒiŋuc âzâcnewec: “Go Aroŋ âzâcnec, ‘Go gunuge bahuc mege bâfeŋnerâ opâ sâko â opâ hata â opâ ʒâkâŋ irapec sicnerâ mutec qaqec wefurâ Aigita mâreŋ ŋefacke‐fârenʒepieŋ.’ ”
6 Eme Aroŋzi meticne Aigita mâreŋte opâopec sicneme qaqaeczi wefurâ Aigita mâreŋ ŋefacke‐fârembiŋ.
7 Qaŋgec bapa jaŋe ine mâsi soŋne iŋuc jaha bapie qaqeczi Aigita mâreŋ sâcke‐fârembiŋ.
8 Iŋuc fuame Faraozi Mose â Aroŋ hefârec‐jofarâ ʒiŋuc jasawec: “Ŋohe Anutu‐ŋekic numucnepire qaqec wiac no â ŋicfâc‐nane nâŋeraonec bârârieme no ŋoŋe râec‐ŋopape ra Anutu‐ŋeŋic bâzi rikecnenʒepieŋ.”
9 Mosezi Farao dâŋ ʒiŋuc bâtikiecnewec: “No wezimucko go â kiŋaŋ qaqafâcge â ŋicfâcge ŋoŋere erâ numupe qaqec i gorao mecne â fic ŋerakac sâc ira mecne arictac ehapie Nilu opâo sawa foniŋmu, irec ʒâfo i go gahac banarec.”
10 Eki muwec: “Tomâcko.” Eme Mosezi muwec: “Mukomec iŋuc fuazejec. Fuame ine ʒiŋuc mana tarazemec: Wofuŋ, Anutu‐nâŋec e iŋucne moczi moc mi jukac.
11 Qaqec jaŋe gorao mecne, ficge ŋerakac ira mecne, kiŋaŋ qaqafâcge â ŋicfâcge jaŋerao mecne mâmâc arictac efârenʒepieŋ, mâc Nilu opâo sawa ine junʒepieŋ.”
12 Eme Mose â Aroŋ jahe Faraoraonec waharâ Mosezi Farao mupaŋkecnewec irec sâcko qaqec rârieniŋte Wofuŋ numucnewec.
13 Eme Wofuŋ e Mosezi numucnewec sâc manacnerâ mume qaqec ficko mecne, hae ʒoŋao mecne, gieo mecne hâmo‐fârembiŋ.
14 Eme ofaŋne guruc epie âsunezi hae mâreŋ sâcke‐fârewec.
15 Qaqec arictac eme honerâ Farao sahac‐ticne firieme mocwâc maŋsanaŋ erâ mi mana‐jactewec. Wofuŋzi qanaŋ muwec iŋuc hâcne ewec.
Neŋgec fuambiŋ
16 Eme Wofuŋzi Mose ʒiŋuc âzâcnewec: “Go Aroŋ âzâcnetec gunu‐ticne bâfeŋnerâ mâreŋko rufe fokac i qazejec, eme Aigita mâreŋ sâkoo rufezi neŋgec efârezejec.”
17 Eme jahe iŋuc hâcne epic. Aroŋ e meticnezi gunu bawec i bâfeŋnerâ mâreŋko rufe fowec i qâiŋneme neŋgec qâŋhec fuarâ ŋic â qowi mâmâc nâcjopawec. Mâreŋko rufe fowec i sasawa neŋgec efârerâ Aigita mâreŋ sâcke‐fârewec hâcne.
18 Eme qaŋgec bapa jaŋe neŋgec jaha fuaocte qaŋgec bahuc bâipiembiŋ. Iŋuc epie neŋgeczi ŋic â qowi nâcjopawec hâcne.
19 Eme qaŋgec bapa jaŋe Farao âzâcnembiŋ: “Ʒi Anuture tâpiri jâmbâŋ.” Farao e ine maŋsanaŋ erâ mi mana‐jarewec. Wofuŋzi qanaŋ muwec iŋuc hâcne fuawec.
Mâkâc mimiŋ fuambiŋ
20 Eme Wofuŋzi Mose ʒiŋuc âzâcnewec: “Go tomâc furicte Faraozi opâo raocte rahame fuacnerâ âzâcnezemec, ‘Wofuŋzi ʒiŋuc mukac: “Go ŋicfâc‐nane râec‐jopatec ra kiŋaŋ qanarenʒepieŋ.
21 Manakic, ŋicfâc‐nane mi râec‐jopacmuo mâkâc mimiŋ ejarepe go mecne, kiŋaŋ qaqafâcge mecne, ŋicfâcge mecne ŋoŋerao mâmâc fuaniŋmu. Ehuc Aigita ŋic ŋoŋere fic wiac mâkâczia fusucmaniŋmu â fic ŋerakac hae mâreŋ i mâmâc sâocke‐fâreniŋmu.
22 No ʒoaŋ ira ŋicfâc‐nane Goseŋ mâreŋko juŋgopieŋ jaŋerao ine mâkâc wiac moc mi fuaniŋte mupe, no hâcne mâreŋ ʒirec Wofuŋ jukopac i mana tarazemec.
23 Erâ nore ŋicfâc â gore ŋicfâc jaŋere ŋondeŋko aka moc âkendâŋnepemu. Ma i tomâcko hâcne fuazejec.” ’ ”
24 Eme Wofuŋ e iŋuc hâcne ewec. Irec mâkâc mimiŋzi Faraore fic, ŋicfâcne jaŋere fic â Aigita mâreŋ sasawa fusucma‐fârerâ mâreŋ sipiricke‐fârembiŋ.
25 Eme Faraozi Mose â Aroŋ jahe hefârec‐jofarâ jasawec: “Ajoc, ŋoŋe Anutu‐ŋeŋic mâreŋ ʒi jaha bâzi rikecneniŋ.”
26 Mosezi ine muwec: “Iŋuc misac, nâŋe Wofuŋ Anutu‐nâŋec bâzi rikecnepene Aigita ŋic jaŋe honepie mamakâcne eekac. Eme Aigita ŋic jaŋe bâzi‐nâŋecte manapie mamakâc eekac i mana‐bipiehuc sifu jaŋere maio rikehapene qânâzi mi hecnâponiŋmu me?
27 Nâŋe Wofuŋzi nâzâ mutâc ewec sâc mâreŋ tuhuo rakupene ʒoaŋ jahec â moc eha Wofuŋ Anutu‐nâŋec bâzi rikecnepene sâckeocmu.”
28 Eme Faraozi muwec: “Wofuŋ Anutu‐ŋeŋic bâzi rikecnezore mâreŋ tuhuo raniŋte sâcne mana‐ŋarepemu, mocjaha, ʒoricko boc mi ranʒepieŋ. Erâ wâc nore erâ numunʒepieŋ.”
29 Mosezi muwec: “No ʒi behecgu hurâ Wofuŋ numucnepe tomâcko mâkâc mimiŋ i gorao mecne, kiŋaŋ qaqafâcge â ŋicfâcge jaŋerao mâmâc omaezejec. Mocjaha, go eatuc‐nâpohuc ŋicguru jaŋe Wofuŋ bâzi rikecnezo raniŋte mupie mocwâc mi sakarec‐jopazemec.”
30 Mose e iŋuc muhuc Farao beherâ Wofuŋ wira wâwâsic ecnewec.
31 Eme Wofuŋ e Mosere dâŋ manarâ mume mâkâc wiaczi Faraorao â kiŋaŋ qaqafâcne â ŋicfâcne jaŋerao omae‐jâmbâŋkerâ moc mi fohuŋgaŋkewec.
32 Faraozi ine dameŋ ira iŋuc jaha maŋne bâzickeme ŋic mi râec‐jopawec.