12
1 Eferaim e wiac fârimâc irec aŋackeekac,
â ʒoaŋ wewefunaonec wiac sisipiricnehec bâjâpeekac,
ehuc ʒoaŋne ʒoaŋne burec â bâbâʒâic bâsokaekac.
Jaŋe Asiria jaŋehec ʒâʒâfic ehuc
Aigita mâreŋko oliwa wokemaŋ râepie raekac.
2 Irec hâcne Wofuŋzi Judaŋic jaŋe dâŋko râec‐jopaocmu,
â Jakobo juju bapa‐ticnere erâ bâtiŋneocmu,
ehuc eebapa‐ticnere sâcko okacne bazucneocmu.
3 E neŋgocte bumaŋko fohuc hahacne biac eatuckewec,
juku ŋic tâpirihec eme Anutuhec juju gie bapic.
4 E aŋelohec juju gie baku sanaŋkewec,
e kiorâ busâqoc manacneocte numucnewec.
E Anutu Bete haeo bâfuame dâŋ âzâcnewec.
5 Wofuŋ e Anutu Tâpiri Ɋuŋɋasaŋ Wofuŋ,
ʒâŋe‐ticne Wofuŋ hâcne.
6 “Go Anutugezi baficguha risiezemec,
go maŋjauŋ â mumutiŋ dâŋ paŋʒâic bajuzemec,
ehuc dameŋ sâc Anutugere mamanac juzemec.”
7 Eferaim e furi bapa ŋiczi sigeli burecne moc meticnao badomahuc
ŋic wiac sâctiri jowac roocte aŋackeekac.
8 Ehuc ʒiŋuc muekac: “Aija, no mafa mâririhec,
nahacne biŋe wiac bocjaha hure hemârec epo,
eme wiac fonarekac sasawa irec
ŋiczi ʒiŋuc sâcne mi muniŋmu:
‘Jâiŋko hotâckeme kiŋnehec ewec.’ ”
9 No Aigita mâreŋko fuŋkerâ Wofuŋ Anutuge juwarepozi jukopac,
no hâcne mugarepe qoruc bozeo mocwâc ŋec juc ecmu,
ine mârâc jaha tutumaŋ dameŋko ehuc jumeŋ irec sâc.
10 No porofete dâŋ jazahuc jupo,
no hâcne maŋbâwiŋ bocjaha ejarepo,
erâ porofete jaŋere micko kesaic dâŋ râepe mutaniŋkembiŋ.
11 Jaŋe Gileade haeo wiac hehesicne ejumbieŋte sipirickenʒepieŋ,
â Giligali haeo bulimakao nemu bâzi rike‐jare jumbieŋte
alata wiac‐jeŋic ima bapie giegaŋko qânâ guruckepie
ŋeekac irec sâc ezejec.
12 (Jakobozi Aram mâreŋko wisewec,
Israe e ira ŋokacte erâ kiŋaŋ qaqa ewec,
ŋokacte erâ qowi soŋaŋ juwec hâcne.)
13 Eme Wofuŋzi porofete moc ecneme
eki Israe ŋic Aigita mâreŋkonec jowac‐jopame wefumbiŋ,
â porofete moc ecneme soŋaŋ‐jopahuc juwec.
14 Eferaim ŋic jaŋe Wofuŋ bunao bahuc maŋbâiŋ ecnembiŋ,
irec mume socte kiŋ fai‐jeŋicko feocmu;
ehame Wofuŋ e mimi qaqa ecnembiŋte okacne bazu‐jareocmu.