13
Babe haere bararuŋ dâŋ
1 Jesaja, Amozire ŋokâzi Babe haere bararuŋ dâŋ hone manac ewec ʒine hâcne:
2 Tiki burocnao qeŋ qajareniŋ,
owa ruruckerâ wira‐jareniŋ;
meoric qajarepie ŋicbomboŋ jaŋere motâc sâkoo raʒiniŋ.
3 Bâwosâec‐jopakicnefâc‐nane jaŋe
no nahac giedâŋ mujarepo,
qac momorifâc‐nane kiwac qawac boc eeŋgopieŋ,
jaŋe kimbeŋ‐nanere fârine bâfuaniŋte biac hefârec‐jopapo.
4 Mananiŋ! Tiki botâŋko ojowa sâko fuakac,
ŋic guru dindiŋ jaŋere micʒonʒoŋ iŋucne.
Mananiŋ! Ŋicwofuŋ â gurufâc‐jeŋic erâ ŋic gurune gurune
tumaŋnepie fânâŋ sâko fuakac.
Anutu Tâpiri Ɋuŋɋasaŋ Wofuŋ e momori guru hone manac ejarekac.
5 Jaŋe mâreŋ ʒorickonec ware fisiŋgopieŋ,
mâreŋ qaŋeŋnaonec hâcne.
Wofuŋ â kimbeŋ‐ticnere babaficfâc
jaŋe mâreŋ sâko mâreŋ bâsiroweniŋte fisiŋgopieŋ!
6 Kio owa eniŋ! Wofuŋte dameŋ bembeŋkekac i;
sisipiric tinac tâpiri runeraonec wareocmu hâcne.
7 Irec ŋic mejeŋic furu jaha betaŋke‐fâreocmu,
â ŋic sasawa maŋjeŋic omae‐fâreocmu.
8 Jaŋe bipic tatara ejareha me kike‐jeŋic râŋgeŋkeocmu
â ʒâic fua‐jareocmu;
ŋokac gozi kicjopame risimbiŋne qaeŋgopieŋ irec sâc eniŋmu,
jaŋe sasawa ʒâŋezi hohone eniŋmu,
ehuc ʒâŋe mai‐jeŋic i ʒocbâruŋ iŋucne eocmu.
9 Manaŋgopieŋ, Wofuŋ dameŋ‐ticne i qeŋ bipinehec,
aaric â kimbeŋ‐ticnere ʒocbâruŋhec fisiocmu,
ine mâreŋ ima bahuc,
fainao sâqocne bapa juŋgopieŋ jaŋe bâsirowec‐jopaocmu hâcne.
10 Sambâŋko bâpiŋ ŋeraŋgopieŋ
raru â demeŋ ɋafâc hawari fuŋne fuŋne
jaŋe tatamac‐jeŋic sakareniŋmu;
ʒoaŋ e wefu wefuhuc jaha gâpâreocmu
â mosa e tatamac‐ticne sakareocmu wâc.
11 Eme no mâreŋ sâko mâreŋ sindaŋ‐ticnere okacne râcnehuc
ŋic hehesicne jaŋe kiŋ bahac‐jeŋicte jopa bâtiŋ ejarepemu;
ŋic ʒaubacne pepec penaroŋ‐jeŋic qape omaeocmu,
â ŋic bâbâʒâic jaŋere sahac fefe i bawahapemu.
12 Noni mupe ŋiczi afecne sawa erâ
gol ematauckekicne fokac irec sâc mi juniŋmu,
â mâreŋŋiczi Ofiri mâreŋko gol forakac
irec sâc wâc mi bâfuaniŋmu.
13 No irec hâcne sambâŋ itiriŋkepemu,
â mâreŋ e qiriŋ qahuc ŋeŋe‐ticnaonec ŋerârieocmu,
i Anutu Tâpiri Ɋuŋɋasaŋ Wofuŋ ere aaric â kimbeŋ‐ticnere dameŋko fuaocmu.
14 Noniŋ hetâtiec‐jopakicne
â lama guru ŋic moczi ro qâzuc mi ejareekac,
irec sâcko juhuc moc e jahacne guruo ʒuhuckeocmu,
â moc e jahacne hae mâreŋko wiserâ raocmu.
15 Ehame bâfuac‐jopaniŋmu sâc âke hâmoc‐jopaniŋmu
â rocjopaniŋmu sâc ʒikare nânâ eniŋmu.
16 Â ɋiefâc‐jeŋic ine ʒâŋe fai‐jeŋicko henʒaŋ qanʒaŋ‐jopaniŋmu;
ficjeŋickonec mafa wiac fiuc rorâ bawiseniŋmu
â ŋokacfâc‐jeŋic bâsâqorec‐jopaniŋmu.
17 Manaŋgopieŋ, no Medeŋic qafeŋ‐jopape râsi ejarenʒepieŋ;
jaŋe siliware manapie fârimâc eekac
â gol irec aŋac wâc mi bajueŋgopieŋ.
18 Tepe‐jeŋiczi ŋicmotec muruc‐jopaniŋmu,
ɋâric jaŋe neŋgoc bumaŋkoa fohapie mi akic‐jopaniŋmu,
â ʒâŋe‐jeŋiczi naru motec honec‐joparâ busâqoc mi mana‐jareniŋmu.
19 Eme ŋic gurune gurune jaŋere femicne,
Kaldea ŋic jaŋere eri tatamac, Babe hae hâcne,
e Anutuzi Sodom â Gomora bâsirowec‐jofawec
irec sâc jaha fuacneocmu.
20 Mimiŋzi ɋâric tuhutac fohuc juocmu sanaŋ;
Araba ŋic moczi qoruc boze‐ticne ira moc mi fâreocmu,
â lama soŋaŋ jaŋe lamafâc‐jeŋic mâreŋ ira moc mi ejarepie waha fomananiŋmu.
21 Aricne, kâte qowi mimicne jaŋe ira waha fomananiŋmu,
â ficjeŋic i bioc bioc wipezi fusucmaniŋmu;
hae mâreŋ ira qera jaŋe juhapie kâpâ jaŋe gae woniŋmu.
22 Ŋicwofuŋ ficko kâte qâtozi qâŋkehuc juniŋmu,
â eri aŋac ficko qowi mimicne jaŋe juniŋmu;
wiac iŋuc fuaocte dameŋne bembeŋkezo ekac
â ʒoaŋ gie bapa‐ticne boc mi ʒoraha fisiocmu.