27
Israe ŋic batarac‐joparâ mocwâc hetumaŋ‐jopakicne
1 Dameŋ ira Wofuŋ e ʒika‐ticne sanaŋne â kâcɋene â tâpirihec izi Lewiataŋ, homa wiwisene hâcne, â homa qaqaharicne ʒâŋene Lewiataŋ jaha, jahe okacne bazu‐jacteocmu, erâ hâwecko oâ jukac e qâhâmoocmu.
2 Dameŋ ira dâŋ ʒiŋuc fuaocmu:
“Waiŋ gie biaŋne i gae hecneniŋ!
3 Wofuŋ no hâcne soŋaŋ‐ticne;
no gâbâ jaha opâ ruacneekopac,
sisipiric wiac moc fuacnezacte
ŋafe furec soŋaŋkehuc juekopac.
4 No aaric mi bajukopac;
mâc fâpâ uupic â sopâc fuame honerâ
râsi ecnehuc turuŋkepe ʒafâreocmu!
5 Nore dapeŋko soŋkehuc wama qanare‐jâmbâŋkeniŋmuo
ine iŋuc mi epemu.”
6 Juku Jakobozi gâtâ baocmu
â Israezi gitec herâ fiehuc âri qaocmu,
eme fârine fuarâ mâreŋ sâko mâreŋ sâcke‐fâreocmu.
7 Wofuŋ go kisâfâc‐jeŋic jopameŋ
irec sâc Israe ŋic moc jopameŋ me?
Me râsifâc‐jeŋic qâhâmoc‐jopameŋ
irec sâc moc qâhâmoc‐jopameŋ me?
8 Aricne, behec‐jopatec kâpâcwâruo bacjopa rambiŋ
izi okacne bazu‐jaremeŋ ewec,
ehame kagu mâŋâŋ fuawec ʒoaŋ ira
micrombâŋge sanaŋnezi ficnec‐jopahuc jâpec‐jopameŋ.
9 Iŋuc fuawecte Jakobore kiŋtofa tarakac,
eme kiŋ babatara irec fârine wiac kecʒiŋuc fuaocmu:
Alatare qânâ sasawa qâfâuckeme
qorac qanʒaŋnekicne iŋucne eocmu,
â Asera ɋâŋ qâqâtâc‐ticne â nemure wâtuŋ wiac
i mocwâc mi âkendâŋnepie domaocmu.
10 Hae sanaŋ i niniŋ siarereŋ fokac,
fic hae behekicne i mâreŋ burocne iŋucne tuhutac fokac,
ehame bulimakao jaŋe ira ju fofo ehuc jâc dutu rehacne nâfâreeŋgopieŋ.
11 Eme tieŋne hâmo‐fâreme ŋic jaŋe bazuniŋmu,
ehame ŋokac jaŋe fisirâ ʒoc ruqepie ʒaocmu.
Jaŋe ŋicguru maŋ mamanasu tâmiric,
irec bâbâfua‐jeŋiczi busâqoc mi mana‐jareocmu
â bâfuac‐jopaweczi aki anonoc mi ejareocmu.
12 Eme dameŋ ira Wofuŋzi Eufrata opâonec fuŋkerâ padi hândâŋne qâmârâŋke ware raku Aigita mâreŋte opâo qâmârâŋke taraocmu. Israere ɋâricfâc ŋoŋe ine buc buc ro nusec eŋarezo.
13 Dameŋ ira qeŋsâko qapie dâŋeocmu, eme Asiria mâreŋko qac qâsoric ekicne jaŋe mecne â jopa jâpec ejarepie Aigita mâreŋko rambiŋ jaŋe mâmâc fisirâ Jerusalem ira tiri tikio Wofuŋ dapecneniŋmu.