30
Aigita ŋic jaŋerao maŋgâŋ roweckembiŋ
1 Wofuŋzi dâŋ ʒiŋuc mukac:
“Jei, naru motec maŋrâŋgeŋhec
ŋoŋe dâŋ manasu biric eeŋgopieŋ
i nore mamana biri aricne,
ehuc no mi mana‐ŋarehape ʒâʒâfic eeŋgopieŋ;
ŋoŋe iŋuc ehuc sâqocne fainezi faine bahuc jueŋgopieŋ.
2 Ŋoŋe no mi wio‐narehuc Aigita mâreŋko huzo eŋgopieŋ,
ira Faraore tâpirio roweckeniŋte
â Aigita mâreŋte mumucko soŋkeniŋte.
3 Irec Faraore tâpirizi ŋerisierâ
mimi qaqa eŋarezejec,
â Aigita mâreŋte mumucko sosoŋke
izi wâc ŋerisierâ mimi busâqoc bâfua‐ŋarezejec.
4 Fekicnefâc‐ŋeŋic jaŋe Zoaŋ haeo humbiŋ
â sorec‐jopakicnefâc‐ŋeŋic jaŋe Hanesi haeo
fifisi i sâcne fisimbiŋ;
5 erâ ine ŋicguru i jaŋerao bafic moc mi bâfuahuc
mâc qurutua‐fâreniŋmu,
kime dopec mi eŋarehapie
mimi busâqoc â mu âke sisic sawa fua‐ŋareocmu hâcne.”
6 Negebe mâreŋte qowi mimicne irec okac dâŋ:
Laioŋ ŋicne â ŋokacne,
qotâ â oâ furuc furuc qaqane juŋgopieŋko,
ʒâic serereŋ â hâhâwic mâreŋ hâcne,
ira mafa wiac‐jeŋic doŋgi faio,
â moneŋ boreŋ‐jeŋic kamele faio râerâ baraŋgopieŋ,
i ŋicguru sâcne mi babafic‐jopane jaŋerao hâcne.
7 Aigita ŋic jaŋere bafic i racne â fâri tâmiric.
No irec hâcne ʒâŋe‐jeŋic ʒiŋuc mupo:
“Jaŋe pepec penaroŋheczi mâc fâsâerâ ŋeŋgopieŋ.”
8 Go ine ʒiŋuczia rarâ dâŋ i ʒâŋe fai‐jeŋicko tafeo râec,
erâ papia qizecne moc ira wâc qâreŋkec,
eme dameŋ mocte mumutaniŋ dâŋ fohuc juzejec sanaŋ.
9 Jaŋe ŋicguru maŋrâŋgeŋhec
â naru motec kekeporicne hâcne,
jaŋe Wofuŋte mumutâc dâŋ mananiŋte mi ejareekac.
10 Jaŋe findaŋdâŋ mumuŋic ʒiŋuc jazaeŋgopieŋ:
“Ŋoŋe findaŋdâŋ mi munʒepieŋ!”
 porofete ʒiŋuc jazaeŋgopieŋ:
“Ŋoŋe dâŋ fârine aricne, bâbâmiriŋ dâŋ
hazecte nâpene sawa nâzânʒepieŋ.
11 Hata sanaŋ beheniŋ â hata fâretiŋ râpeckeniŋ,
ehuc Israere Tiri rune ere dâŋ mocwâc mi mupie mananʒepeneŋ.”
12 Irec hâcne Israere Tiri runezi ʒiŋuc mukac:
“Ŋoŋe dâŋ ʒi qikiŋnerâ hata hehesicne â sisifucnere
manapie biaŋkeha ira âte raeŋgopieŋ.
13 Irec kiŋŋeŋiczi ficsâko moc wâtuŋne gâreckekicne
ututuŋ hericke ʒaŋ erâ rândiŋkeocmu
irec sâc eŋareocmu.
14 Me ŋic moczi manabâc mi ehuc kuʒi moc hefâc qâfâuckeme
dâkâne piic piic eocmu,
eme dâkâne izi me izi ʒafeonec ʒoc uuc roro
me nombâŋkonec opâ fifia irec sâc mi eocmu,
ŋoŋe irec sâc hâcne henʒaŋ‐ŋopazo.”
15 Wofuŋ Anutu, Israere Tiri rune e kecʒiŋuc muwec hâcne:
“Ŋoŋe maŋŋeŋic bârisierâ niniŋkepie bafic‐ŋopazo;
niniŋkerâ norao roweckehuc juju izi tâpiri‐ŋeŋic eocmu.”
Ŋoŋe ine takic‐ŋopame mumbiŋ:
16 “Aricne, nâŋe becâsic faio gasackerâ ranʒepeneŋ!”
Irec sâcne gasackerâ ratâmireniŋ;
erâ moc ʒiŋuc mumbiŋ:
“Becâsic gagasac sâkohec jaŋere faio ranʒepeneŋ,”
irec jâpec‐ŋopaniŋmuzi gasackehuc siric‐ŋopanʒepieŋ.
17 Ŋic wâŋ tauseŋ jaŋe
ŋic mocjahazi aŋara heme wiseniŋmu,
ŋoŋe ine ŋic 5 jaŋe aŋara hepie
manahuc wise tâmirepie
ʒanʒaŋnefâc‐ŋeŋic jaŋe tiki botâŋko jâmâ moc domakac
me mâreŋ facnao wâtuŋzi ma domakac
irec sâc afecne sawa domaniŋmu.
Anutu e ŋicfâc‐ticne aki anonoc ejareocte mupaŋkewec
18 Irec Wofuŋ e aki anonoc eŋareocte woŋec jukac,
e ŋoŋere busâqoc manaocte afeckekac,
Wofuŋ e mumutiŋ Anutu hâcne;
irec ere woŋec jueŋgopieŋ jaŋere manape ʒerine ekac.
19 O Zioŋ ŋic ŋokac, Jerusalem haeo ŋeŋe juju eeŋgopieŋ, ŋoŋe mocwâc mi kionʒepieŋ; Wofuŋ e jâmbomac wira wâwâsic‐ŋeŋicte busâqoc mana‐ŋareocmu, e manarâ izia bafic‐ŋopaocmu.
20 Erâ Wofuŋ e fific guguriŋte â ʒârâ hâriŋte nânâ opâ gumec‐ŋopaocmu; eme qaqazu‐ŋeŋiczi sifu mocwâc mi soŋkeha ʒâŋe‐ŋeŋiczi e honehuc juniŋmu.
21 Ehuc fâreopec me qanaopec razo epie râpefuŋ‐ŋeŋicko dâŋ ʒiŋuc fuame hazec‐ŋeŋiczi mananiŋmu: “Hata ʒi fokac, ira raniŋ!”
22 Eme ŋoŋe nemu hawari â ɋâŋ qâqâtâc‐ŋeŋic siliwa â golzi foŋkekicne irec manapie wiac wâwânâŋnehec eocmu; erâ wiac mamakâcne muhuc hetâtierâ ʒiŋuc muniŋmu: “Ratâmirec!”
23 Eme mâreŋko wiac sara mama ecmu i Wofuŋzi mume hoezi bâgunuckeocmu eme gieo wiac nânâne fuaocmu i mâriri â wokemaŋnehec sasawa. Ehame lama bulimakaofâcge jaŋe dameŋ ira mâreŋ qaratiekicnao kecɋaŋ nâhuc juniŋmu.
24 Erâ bulimakao ŋicne â doŋgi mâreŋ bâbâfâuc gie baniŋmu jaŋe ine kecɋaŋ sapac â saraczi hec hetikic ehuc hâwechec bâsifuckekicne i hâcne nânʒepieŋ.
25 Eme ʒika sâko fuame ficsanaŋ waha qanʒaŋneocmu dameŋ ira tiki ʒorao â mâreŋ facnao sasawa opâ piticne â kâcɋene fuarâ foocmu.
26 Ehame mosare tatamac i ʒoaŋte tatamac iŋucne eocmu, â ʒoaŋte tatamaczi fehuc ʒoaŋ gie bapa 7 irec tatamacte sâc eocmu. Wofuŋ e ŋicfâc‐ticne ʒikao ʒâpâ jopakicne jaŋe ʒure foŋ ejarehuc ʒika‐ticnere micrâfâc bâsomie‐jareocmu dameŋ ira iŋuc hâcne fuaocmu.
Wofuŋzi Asiria ŋic dâŋ mutara‐jarekac
27 Manaŋgopieŋ, Wofuŋ e jahac ʒorickonec ware fisikac,
ehame kimbeŋ‐ticne bâruŋkekac
â bu ʒaʒamaŋ‐ticne fâuckekac
micbipic‐ticnao kimbeŋ fusucmarâ fokac
â nameŋ‐ticne i ʒocbâruŋ iŋucne wiac ʒa ʒâtâc eene irec sâc.
28 Micrombâŋ‐ticne i opâzi rumi fisiha
ŋic jaŋe âtepie upe‐jeŋicko qaekac irec sâc,
i ŋicne ŋicne sisipiricte sajazi wosâec‐jopaocte;
erâ ŋic gurune gurune qac qâsoric eere micko kiki râe‐jareocte fisikac hâcne.
29 Eme ŋoŋe hombaŋ ŋehuc ŋafeo gae heeŋgopieŋ irec sâc jaha gae heniŋmu, â ŋiczi Israere qânâ sanaŋ, Wofuŋte tiki hâcne, ira mimi ŋokac ficnehuc raeŋgopieŋ, irec sâc jaha maŋzi ʒeri bari eniŋmu.
30 Eme Wofuŋ marac fânâŋ‐ticne qeŋ bipinehec fuame mananiŋmu, â meticne i kimbeŋ wânʒâŋnehec â ʒocbâruŋ ʒa ʒâtâc eene iŋucne â mâŋâŋ hâhâwicne â hoe micsâko â hoe sanaŋ aisihec irec maŋnao wahame honeniŋmu.
31 Eme Wofuŋ e ɋaruc‐ticnezi Asiria ŋic jopame marac fânâŋ‐ticnere ɋarac ɋarac qaniŋmu.
32 Eme ʒiŋuc fuaocmu: Wofuŋ e bâbâtiŋ ɋaruc‐ticnezi jopaocmu sâc woŋgâŋ dâŋeha â kulele fânâŋkeha mene bâfeŋnerâ fotariehuc jopaocmu hâcne.
33 Ʒoc ʒaza nombâŋ i mârâc jaha ro bâmoc ekicne, ehuc ŋicwofuŋte manasuhuc ʒoricne â kâcɋene rokicne wâc; maŋnao ʒocfiki bakicne i hâhâwicne, eme Wofuŋte micrombâŋzi paura sâqocne rikepene bâruŋkeekac irec sâc ficneme bâruŋkeocmu.