43
Wofuŋ e mocjahazi fifirue jukac
1 Ʒi ine Jakobo go bâfuacguwec â Israe go bacguwec
Wofuŋ eki ʒiŋuc mukac: “No hâcne firuecgupo
irec mi hâwicguzejec;
no ʒâŋege muhuc wira hefârec egarepo:
Go nore biŋe.
2 Go opâ fotâcnehaŋte no gohec jupemu,
eme opâzi mi qâurucguzejec;
go ʒoc huckehaŋtec ʒoczi mi ʒacguzejec
â ʒocbâruŋzi mi ʒâseŋguzejec.
3 No hâcne Wofuŋ gore Anutu,
no Israere Tiri rune, fifiruege.
No Aigita gore erâ behehuc kiwiricge rokopac,
erâ Etiopia â Sebe mâreŋ jahe gore okacne qikiŋ‐jofakopac.
4 No honecgupe furi sâko â ʒâŋe biŋehec ekomec
erâ maŋnanezi go ʒâficgukopacte
gore erâ ŋic gâcne behec‐jopakopac
â jujuge fuaocte manasuhuc
ŋic gurune gurune qikiŋ‐jopakopac.
5 No gohec jukopacte mi hâwicguzejec;
no ɋâricfâcge ʒoaŋ wewefunaonec jowac‐jopa warepemu
â ʒoaŋ huhunaonec hetumaŋ‐ŋopapemu.
6 Faic mâreŋkonec jaŋe jazapemu: ‘Râec‐jopaniŋ,’
â juwic mâreŋkonec jaŋe wâc jazapemu: ‘Mi sakarec‐jopaniŋ’;
ŋoŋe ŋokâfâc‐nane ʒorickonec jowac‐jopa warenʒepieŋ
â otâfâc‐nane mâreŋ qaŋeŋnaonec jaŋe mâmâc.
7 Nore ʒâŋe bajuŋgopieŋ, â ʒâŋe biŋe‐nane fuaocte bâfuac‐jopapo
erâ menanezi bacjopapo, jaŋe hâcne ware‐fârenʒepieŋ.”
8 Ŋicguru ʒâŋe‐jeŋic foipiehame wiac mi honeeŋgopieŋ
â hazec‐jeŋic foipiehame dâŋ mi manaeŋgopieŋ
jaŋe ejarepie fua taniŋkenʒepieŋ!
9 Ŋicne ŋicne jaŋe heâckerâ fisi‐fârenʒepieŋ
â ŋic gurune gurune jaŋe tumaŋne‐fârenʒepieŋ.
Eme mana honenaŋ, jaŋeraonec mozi dâŋ ʒi sâcne mutâcne‐nâreocmu
â mârâc jaha wiac fuawec irec fuŋne mutaniŋkeme sâcne mananaŋmu?
Jaŋe mumutaniŋ ŋicfâc‐jeŋic jowac‐jopa warepie
fuŋne‐jeŋic bataniŋkenʒepieŋ,
eme manarâ muzo: “Dâŋ i fârine.”
10 Wofuŋzi ʒiŋuc mukac: “Ŋoŋe mumutaniŋ ŋicfâc‐nane,
â kiŋaŋŋicfâc‐nane bâwosâec‐ŋopapo,
eme, no hâcne Wofuŋ, ŋoŋe iŋuc manarâ
mana ʒakiehuc mana taranʒepieŋ.
No juwarehuc jupo dameŋ irec juwicnao
nemu moc mi bâfuakicne,
â no jupemu irec faicnao
iŋuc jaha moc mi fuarâ juocmu.
11 No mocjahazi Wofuŋ fârine,
no iŋucne bâbâpiaŋ moc mi jukac.
12 No iŋuc hâcne mufua‐ŋarepo â bafic‐ŋopahuc ŋazapo,
no ŋondeŋ‐ŋeŋicko jaba moc mi jupo;
eme ŋoŋe mumutaniŋ ŋicfâc‐nane juŋgopieŋ.”
Wofuŋzi iŋuc mukac.
13 “No hâcne Anutu fârine juwarehuc jupozi
miŋecgac sâc ijaha jukopac;
ŋic moczi nore meonec ŋic babatarac‐jopane mi fokac;
no gie baekopac i mozi aka moc heocmu?”
14 Wofuŋ, fifirue‐ŋeŋic â Israere Tiri rune, e ʒiŋuc mukac:
“No ŋoŋere erâ Babe haeo kiŋaŋ sorepe raocmu,
ehame kâpâcwârure babasanaŋ sasawa batarape wahaocmu,
eme Kaldea ŋic jaŋere ʒeri bubiaŋzi ŋerisieme ki busâqoc fuaocmu.
15 No Wofuŋ ŋoŋere Tiri rune,
no Israere bâbâfua â Wofuŋ Sâko‐ŋeŋic.”
16 Hâwecmaŋko hata bawec
â opâ sâkoo gâŋ bâfuawec,
17 keretac â becâsic, momori â tâpirihec
jaŋe ejareme ʒikao rambiŋ,
ehuc guruhec waha jopame mocwâc mi faharembiŋ,
lambe iŋucne gâkowarâ hâpo‐jâmbâŋkembiŋ,
Wofuŋ e hâcne ʒiŋuc mukac:
18 “Mârâc wiac fuawec irec mocwâc mi manasunʒepieŋ
â esecne fowec irec manatâc qâtâc wâc mi enʒepieŋ.
19 Manaŋgopieŋ, no wiac ɋâricne moc bâfuazo ekopac,
eme ʒi biac fuazo eha hone ʒâŋitac mi eŋgopieŋ me?
No mâreŋ tuhuo hata bapemu
â mâreŋ burocnao opâ mupe fuarâ foocmu.
20 No ŋicfâc‐nane bâwosâec‐jopakicne
jaŋe opâ gume qiŋjopapemurâ mâreŋ tuhuo opâ ʒâkâŋ
â mâreŋ burocnao opâ sâko bâfuapemu,
irec kâte qowi qera â kâte qâto jaŋe mumbiaŋnuniŋmu hâcne.
21 Ŋicguru ʒi nore biŋe erâ juniŋte baʒawiec‐jopapo
jaŋe ʒâŋe biŋe‐nane musokanʒepieŋ!
22 “O Jakobo, go wira hefârec mi enaremeŋ
â Israe go nore erâ gie sâko moc mi bameŋ, aricne!
23 Go lamafâcge hâcbuc ririkere biŋe
i nore manasuhuc mi râemeŋ,
erâ taha bâzigezi mi sâsecnumeŋ;
no taha rârâere tagi faigao mi râepe fewec,
erâ hosâc âsu biaŋte micneneŋ mi egarepo.
24 Go moneŋzi wiac âsu biaŋhec furine mi banaremeŋ
â taha bâzigere wokemaŋzi mi gume qiŋnumeŋ.
Sâqocnegezi ine gie sâko bâfua‐naremeŋ
â hehesicgezi maŋbâiŋ enaremeŋ.
25 “Noni hâcne nahacnere erâ qaqatarage bâtâmirehuc jukopac,
erâ hehesicgere mocwâc mi manasupemu.
26 Go manasu‐naretec dâŋgie banaŋ;
go dâŋge sasawa wose biric ec,
eme bahacmâc jukomec irec fuŋne taniŋkezejec.
27 Apagezi sâqocne bawec,
erâ dâŋ mumuŋicfâcge jaŋe nore dâŋ qatarambiŋ.
28 Eme no irec erâ furuficte micne gie‐jeŋic jowac rope
ŋic omane embiŋ erâ Jakobo e sisipiricte biŋe qahuc
Israe ere mupe mimi busâqoczi fainao fewec.