54
Wofuŋ e Israe kikefuŋ maŋjauŋ ejarehuc juocmu sanaŋ
1 “Ŋokac hufiŋne, motec mi roro go bubiaŋ manazemec,
â gozi mi kicguekac go ʒeri ehuc kiwaezemec.
Ŋokac ŋichec e ɋâric afecne fuacnehapie
ɋâri hozezi naru motec bocjaha rocjopaocmu hâcne,
Wofuŋzi iŋuc mukac.
2 Go qoruc bozegere hae bâsokac,
â ŋec juc eekic, irec qoruc mi sakarehuc qaratiec;
repage fâretec raoc â fâzâge qatec hurâ sanaŋkeoc.
3 Go fâreopec mecne â qanaopec mecne qaratiehaŋtec
ɋâricfâcge jaŋe ŋicne ŋicne rauc‐jopaniŋmu,
ehuc hae behekicne i heɋârerâ ira ŋec juc eniŋmu.
4 “Mi hâwicguoc, go mi qurutuacmu;
jaŋe mimi qaqa mi egareniŋmu,
irec go mimi gaŋgaŋ mi ezemec,
go socɋâri juhaŋtec mimi qaqa egarekicne irec nikecguzejec
â hozec erâ busâqoc faio jumeŋ irec mocwâc mi manasuzemec.
5 Manakic, mamac bâbâfuagezi ŋowege jukac,
ʒâŋe‐ticne ‘Anutu Tâpiri Ɋuŋɋasaŋ Wofuŋ’;
Israere Tiri runezi fifiruege jukac,
ʒâŋene ‘Mâreŋ sâko mâreŋ irec Anutu’.
6 Wofuŋzi hâcne ŋokac behekicne iŋucne
busâqoc faio juhaŋtecne hefârecguwec;
ŋic moc e socɋâri juhuc ŋokac bawec
i wemocko qaisockeocmu, Anutugezi iŋuc mukac.
7 No dameŋ ŋondeŋ bembeŋne mac behecgupo,
ʒi ine buuruc fekicne egarehuc hefârecgukopac.
8 Dameŋ ŋondeŋ mac moc kimbeŋ‐nanezi fâfâcnehec fahareme
ʒâŋe mai‐nane jâmbomac bâsoŋke‐garepo,
ʒi ine maŋjauŋ fofo sanaŋhec maŋuruc qagarekopac,
Wofuŋ bâbâpiaŋgezi iŋuc hâcne mukac.
9 “No ʒi manape Noarao ekicne irec sâc ekac:
Opâ rumi sâkozi mâreŋne mâreŋne
mocwâc mi qâuruckeocte mupaŋkepo,
iŋuc hâcne kimbeŋ mocwâc mi qagarezo
â mumu hehec wâc mi egarezo mupaŋkekopac.
10 Tiki jaŋe râriezo murâ rârienʒepieŋ,
mâreŋ facne jaŋe ŋeŋe‐jeŋic behezo murâ behenʒepieŋ,
nore aki anonoczi ine moc mi rârie‐garezejec,
â wamare ʒâʒâfic‐nanezi moc mi ŋeŋgoroŋkezejec,
Wofuŋ maŋuruc qagareekaczi iŋuc hâcne mukac.
Jerusalem hae ɋâricnere dâŋ
11 “O hae imacgukicne, go hoe mâŋâŋzi sipiricgukac,
â bâbâmiriŋ moc mi fua‐garekac.
Manakic, sacgere qânâ i simeŋzi basarickepemu,
â hobeteŋge buse sanaŋzi râepemu.
12 Sacgere qenʒoŋne i qânâ sâsârekicnezi ba akic epemu,
motâc sâkoge i qânâ bâbâroŋzi erickepemu,
â sac fârine i wâc qânâ furi sâkozia bafârezo.
13 Motecfâcge sasawa Wofuŋzi mamana qazu‐jarezejec,
eme wama fofo dunduŋ fojarezejec.
14 Go bâbâpiaŋ dâŋko basanaŋguzo;
fific guguriŋzi taicko foha
â sisipiriczi wâc mi maicguha
hâhâwic tâmiric juzemec.
15 Manakic, ʒika moc fuaocmuo i nore micte aricne;
moc e râsi egarehuc guocmu e ʒikagere nânâ eocmu.
16 Manakic, aeŋzi wiac bapa ŋic e ʒocmimiŋ ficneme
ʒaha eebapa‐ticnere sâcko ʒikare wiac ba akic eekac
e noni hâcne bâfuapo,
â sisipiric ŋic e sisipiric gie baocte nonizia bâfuapo.
17 Go râsi egarehuc ʒikare wiac bakicne
i fâri tâmiric efâreocmu;
â dâŋko râecguniŋmu sasawa
jaŋere fuŋne dâŋgieo rituzemec.
Wiac izi hâcne Wofuŋ kiŋaŋŋicfâc‐ticne jaŋere merâfâc eekac
â noraonec bâbâpiaŋ‐jeŋic fua‐jareekac,
Wofuŋzi iŋuc mukac.”