65
Qaqatara ŋic okacne fisi‐jareocmu
1 Nore mu wioc mi ejumbieŋzi
wira basac enareniŋte mana‐jarepo,
â wira basac mi enare jumbieŋ
jaŋe bâfuacnuniŋte mana‐jarepo.
Ŋicguru moc ʒâŋe‐nane mi riwasecke jumbieŋ
jaŋe ʒiŋuc jazapo: “No ʒi, no ʒi!”
2 No ŋicguru maŋrâŋgeŋhec jaŋe hata biaŋnao mi juhuc
jaŋacne maŋte hata âtembiŋ
jaŋe dameŋ ʒora meoric qajarehuc jupo.
3 Jaŋe dameŋ sâc tâtâcko sâke kiki enarehuc
jufu gieo taha baeŋgopieŋ
â qânâ faio hosâc âsu rikeeŋgopieŋ.
4 Jaŋe ʒâŋeruŋko ŋeeŋgopieŋ
â ŋafeo qânâ hawecko ŋec foc eeŋgopieŋ;
jaŋe bec nâeŋgopieŋ â wiac mamakâcnere
sic oto‐jeŋicko foekac.
5 Jaŋe mueŋgopieŋ: “Go jukomecko juc,
go nore manatec ŋic furune eha mi bâqiŋnuc.”
Iŋuc eeŋgopieŋ jaŋe dameŋ sâc ʒoc ʒahuc
hosâcnezi gapec‐ŋopaekac irec sâc enareeŋgopieŋ.
6 Manaŋgopieŋ, nore maio dâŋ kecʒiŋuc qâreŋkekicne fokac:
“No dâŋemâc mi jupemu, aricne,
okacne bazu‐jare‐jâmbâŋkepemu.
7 Jaŋe tiki faio hosâc âsu rikembiŋte
â mâreŋ facnao ʒaubac enarembiŋte
jaŋacne sâqocne mecne
â mamacfâc‐jeŋic jaŋere sâqocne irec okacne
i mâmâc bazu‐jarepemu. Jâmbomac, eebapa‐jeŋic raŋɋanere
okacne bazu‐jare‐jâmbâŋkepemu,” Wofuŋzi iŋuc mukac.
8 Wofuŋ e ʒiŋuc mukac: “Waiŋ hândâŋne opâne foha
honerâ mueŋgopieŋ, ‘Maŋnao jambuŋ fokacte mi sipirickezo,’
eme no kiŋaŋŋicfâc‐nane jaŋere erâ
sâc ijaha ehuc ŋic ʒeŋgoma mi sipiric‐jopazepac.
9 Noni mupe Jakoboraonec ɋâric fua sawec enʒepieŋ
â Judaraonec moczi tiki wiac‐nane rauckeocte fuazejec.
Bâwosâec‐jopakicnefâc‐nane
jaŋe hâcne rauckenʒepieŋ
â kiŋaŋŋicfâc‐nane jaŋe ira ŋec juc enʒepieŋ.
10 Eme ŋicfâc‐nane wira basac enareeŋgopieŋ
jaŋe Saroŋ wâneŋ rauckepie lamafâc‐jeŋic
jaŋere hae mâreŋ ezejec â Akoro wâneŋzi
bulimakaofâc‐jeŋic jaŋere juju fofo hae ezejec.
11 Ŋoŋe ine Wofuŋ no râpecnueŋgopieŋ
â tiri tiki‐nanere nikec‐ŋopaekac,
ehuc Gade nemu nânâ opâ râe bâmoc ecneeŋgopieŋ
â Meni nemu waiŋ opâ qoŋgiŋkecneeŋgopieŋ.
12 Irec no râec‐ŋopape ʒikare biŋe enʒepieŋ,
ehuc ʒika kiniŋte ʒeŋgoma dunduŋ dadape enʒepieŋ,
i ŋoŋe wira‐ŋarepe micnaneo mi rombiŋte
â dâŋ ŋazape mi manambiŋte;
ŋoŋe nore maio wiac sâqoreekac i hâcne embiŋ,
â mana aŋac mi eekopac i hâcne bâwosâembiŋ.”
13 Irec hâcne Wofuŋ Anutuzi ʒiŋuc mukac:
“Jei, kiŋaŋŋicfâc‐nane jaŋe nânâ fojareha
ŋoŋe nânâ basanʒepieŋ,
jei, kiŋaŋŋicfâc‐nane jaŋe opâ nahapie
ŋoŋe opâre hâmonʒepieŋ,
jei, kiŋaŋŋicfâc‐nane jaŋe ʒeri bari ehapie
ŋoŋe qurutuanʒepieŋ.
14 Jei, kiŋaŋŋicfâc‐nane jaŋe maŋzi ʒeri ehuc
kiwac qawac ehapie
ŋoŋe ine ki busâqoc ehuc
bu heheric eŋareha kio huse enʒepieŋ.
15 Ʒâŋe‐ŋeŋic i bâwosâec‐jopakicnefâc‐nane
qikiŋne‐jarepie jaŋe sâwecdâŋ muniŋte bajunʒepieŋ,
kecʒiŋuc: ‘Wofuŋ Anutuzi mume hâmozemec’.
Kiŋaŋŋicfâc‐nane jaŋere ʒâŋe ine moc muzo.
16 Eme moc e mâreŋko e jahacnere manasuhuc
jambuŋdâŋ muocmu e Anutu fârine nore ʒâŋe muzejec,
â moc e mâreŋko mumupaŋ dâŋ muocmu
e Anutu fârine norao ɋetickehuc muzejec;
mârâc ʒârâ hâriŋ fowec irec ninikecne fuawec
â mai‐naneonec râriewec hâcne.
Anutuzi sambâŋ â mâreŋ ɋâricne bâfuac‐jofaocte mukac
17 “Manaŋgopieŋ, no sambâŋ â mâreŋ ɋâricne bâfuac‐jofapemu;
eme mârâc wiac fowec irec mocwâc mi manasuzo
â irec dâŋ maŋzi manatâc qâtâc mocwâc mi ezo.
18 Wiac bâfuapemu irec dameŋ sâc bubiaŋ manahuc
ʒeri bari erahuc junʒepieŋ;
no mupe Jerusalemzi ʒeri hae erâ ŋezejec
â ŋicfâc‐ticne jaŋere erâ bubiaŋ fuazejec.
19 Ehame no Jerusalemte ʒeri bari ehuc
ŋicfâc‐nane jaŋere bubiaŋ manazepac,
eme hae maŋnao kifânâŋ me mu mamakuc
i mocwâc fuame mi manazo.
20 Hae irec maŋnao ɋie moc fuarâ ʒoaŋ jahecmac sawa jurâ
hâhâmo i mocwâc mi fuazejec,
me ŋicqizec moc e jara dameŋ‐ticne mi jutarahuc hâhâmo
i wâc mi fuazejec; aricne,
moc e jara‐ticne 100 bazurâ hâmoocmu ere muzo, e motec;
â moc e jara 100 mi bâfuahuc hâmoocmu ere muzo, e sâweckekicne.
21 Jaŋe fic barâ maŋnao ŋec foc eniŋmu,
â waiŋ gie he sarac erâ fârine fuame nâniŋmu.
22 Jaŋe fic bapie ŋic gâcne jaŋe maŋnao ŋec foc ee i aricne,
me gie he sarac epie fârine fuame gâcne jaŋe nânâ i wâc aricne;
ŋicfâc‐nane jaŋere juju dameŋ i jâcte dameŋ iŋucne ezejec;
â bâwosâec‐jopakicnefâc‐nane
jaŋe mejeŋiczi gie bambiŋ
irec fârine jaŋac ro nâc enʒepieŋ.
23 Jaŋe gie maŋgâŋ mi banʒepieŋ
â naru motec rocjopapie ututuŋ hâhâmo i mi fuazejec;
Wofuŋzi jambuŋ‐jopawec jaŋere ɋâricfâc jaŋe hâcne;
eme apa ŋosafâc‐jeŋic fuapie mâmâc juniŋmu.
24 Eme ʒiŋuc fuaocmu: Jaŋe mi wirahapie no biac mana‐jarepemu,
erâ jaŋe dâŋ muha muhapie okacne bâtikie‐jarepemu.
25 Kâte qâto â lama jahe ââgo ehuc nânâ wirec nânicmu,
laioŋ e bulimakaozi kecɋaŋ nâekac iŋuc jaha nâocmu,
â gâc wândoczi homare nânâ eocmu.
Jaŋe wiac busâqoc me sisipiricnehec
i nore tiri tikio ira me ira moc mi bâfuaniŋmu,”
Wofuŋzi iŋuc mukac.