9
Ŋic šâŋe tiŋtuŋ moc ere dâŋ
1 Jesu e hata rahuc ŋic moc neŋgoc bumaŋkonec tiŋtuŋ fuakicne e bâfuawec.
2 Eme motecfâcne jaŋe wiocnerâ mumbiŋ, “Qaqazu, more kiŋte tiŋtuŋ fuawec, e jahacne me neŋgoc mamac jahere?”
3 Mupie Jesuzi šiŋuc jazawec: “Irec aricne, e jahacne kiŋte me neŋgoc mamac jahere kiŋte mâcne, Anutu tâpiri-ticnere fuŋne erao taniŋkeocte iŋuc fuawec.
4 Nâŋâc sorecnuwec ere gie šoaŋkoa bahuc junšepeneŋ, ŋafe fuame gie bapane arictac eocmu.
5 No mâreŋko jupemu sâc šoctamac-nanezi âke tamae-ŋareocmu.”
6 Iŋuc murâ mâreŋko tâfeckerâ afe jârickerâ ŋic tiŋtuŋ šâŋene ruacnerâ
7 šiŋuc muhuc sorewec: “Go rarâ Siloam riqicko wânâŋge šurec.” (Siloam i nâŋâcne dâŋko sorekicne.(c) Eme ŋic e rarâ sahac-ticne šurehuc šâŋe fitâcnewec.
8 Iŋuc erâ risieme âgofâc-ticne jaŋe, â nânâre numu-jarehuc juwec ŋic i jaŋe mâmâc honerâ wiwioc erâ mumbiŋ: “Nânâre numu-nârehuc ŋeŋerâ juekac e hâcne me?”
9 Eme tucnezi mumbiŋ, “Ine hâcne.” Á tucnezi mumbiŋ, “Aricne, e tinac moc.” Iŋuc mupie e jahac muwec, “No hâcne ši `à
10 Eme wiocnerâ mumbiŋ, “Weniŋuc erâ šâŋe fitâcnekomec?”
11 Eme jazawec, “Ŋic moc šâŋene Jesu eki afe jârickerâ šâŋe-nane ruacnerâ šiŋuc nazajec: `Go Siloam riqicko rarâ sahacge šurec. Ž Eme no rarâ sahac-nane šurerâ šâŋe fifi epac.”
12 Iŋuc mume wiocnerâ mumbiŋ, “Ŋic e wena jukac?” Eme muwec, “No mi manakopac.”
Farisaio ŋic jaŋe ŋic tiŋtuŋ ere dâŋ mumbiŋ
13 Eme ŋic tiŋtuŋ ecnewec e farisaio jaŋerao jowa rambiŋ.
14 Eme Jesuzi afe jârickerâ šâŋene bâtâcnewec i sabata hombaŋko ewec.
15 Eme farisaio ŋic jaŋe iŋuc jaha wiocnerâ mumbiŋ, “Go weniŋuc erâ šâŋe fifi emec?” Mupie šiŋuc jazawec: “E šâŋe-nane afe ruacneme no ra sahac-nane šurerâ šâŋe fifi epac.”
16 Eme farisaio jaŋeraonec gâcnezi mumbiŋ, “Ŋic e Anuturaonec aricne, e hombaŋ-nâŋec qâsuakac.” Gâcnezi ine mumbiŋ, “E hehesic juhuc muzac mâsi iŋucne wemocko bazac.” Iŋuc muhuc qaqatarac embiŋ.
17 Ehuc ŋic tiŋtuŋ ecnewec e indiŋkerâ mumbiŋ, “Ʒâŋege bâtâcnejec, gahac ere weniŋuc mukic?” Eme muwec, “E porofete.”
18 Eme Judaŋic jaŋe ŋic e jâmbomac šâŋe tiŋtuŋ juku šâŋe fifi ejec, iŋuc muhuc maŋjahec erâ neŋgoc mamac jahec-ticne hefârec-jofarâ
19 wio-jacterâ mumbiŋ: “Ŋokâ-ŋekic tiŋtuŋ fuawec mukopirec šine hâcne? E weniŋuc erâ šâŋe fifi ejec?”
20 Eme neŋgoc mamac jahecne šiŋuc mupic: “E ŋokâ-nâhec, i manakoperec, â tiŋtuŋ fuawec, i wâc manakoperec.
21 Erâ weniŋuc erâ šâŋe fifi ejec, me mozi šâŋene bâtâcnejec, ine mi manakoperec. Wiac e soka-fârekicne, irec e jahacne wiocnepie fuŋne-ticne ŋazaoc.”
22 I Judaŋic jaŋere hâwic-jofame iŋuc mupic. Jaŋe dâŋ šiŋuc mujomirembiŋ: “Moc e Jesure Kristo mume miti sakarecnenšepeneŋ.”
23 Irec hâcne neŋgoc mamac jahec-ticne hâwic-jofame šiŋuc mupic: “E soka tarakicnere e jahacne wiocneniŋ.”
24 Eme ŋic šâŋe tiŋtuŋ ecnewec e mocwâc hefârerâ šiŋuc âzâcnembiŋ: “Go Anutu muteŋkehuc dâŋenšaŋ, nâŋe ŋic ere fuŋne manaŋgopeneŋ, e hehesicne.”
25 Mupie šiŋuc jazawec: “E ŋic hehesicne me mâcne, i mi manakopac. Á tiŋtuŋ jupozi šâŋe fifi epac, ine mana-jâmbâŋkekopac.”
26 Mume harierâ wiocnembiŋ, “Weniŋuc egarejec, weniŋuc erâ šâŋege bâtâcnejec?”
27 Mupie šiŋuc jazawec: “No ŋazapac i, ŋoŋe ine mi manambieŋ” wemocte hâsine ŋazape mananiŋte muŋgopieŋ? ŋoŋe motecfâcne ezo muŋgopieŋ me?”
28 Iŋuc mume haneckerâ mumbiŋ, “Go hâcne motec-ticne, nâŋe ine Mosere motecfâc.
29 Mose e Anutuzi dâŋ âzâcnewec, i manaŋgopeneŋ, â ŋic e irec me irec fuarâ warewec ine mi manaŋgopeneŋ.”
30 Mupie ŋiczi dâŋ šiŋuc bâtikie-jarewec: “Ʒâŋe-nane bâtâcnejec ere fufuare kâuc bapie warec-ŋopakopac.
31 Nâŋâc kecšiŋuc manaeŋgopeneŋ: Anutu e ŋic hehesicne mi bafic-jopaekac, moc e araŋ bacnehuc micne reŋkeme bafickeocmu.
32 Á ŋic moczi tiŋtuŋ fuakicne moc šâŋe fifi bawec, biŋe iŋucne mâreŋ fufuaonecteaŋ moc mi mana wefukicne.
33 Irec ŋic e Anuturaonec mi waharâ muzac, gie iŋucne wemocko bazac.”
34 Mume šiŋuc âzâcnembiŋ: “Sâqoc qaqocne fuakicne go iŋucnezi miti qazu-nârekomec me?” Iŋuc murâ tuŋkembiŋ.
Jesu mi manasiŋkehuc maŋ tiŋtuŋ juzo
35 Tuŋkepie Jesuzi manawec. Erâ bâfuarâ wiocnerâ muwec, “Go Ŋic Fâri Wâtuŋne e manasiŋkekomec?”
36 Eme ŋiczi muwec, “Wofuŋ go mukomec e mo? Nowatutec hone tararâ manasiŋkepe.”
37 Mume Jesuzi šiŋuc âzâcnewec: “Á go honemec, dâŋ gazakopac no hâcne ine.”
38 Eme ŋiczi muwec, “Wofuŋ, no manasiŋgukopac”, iŋuc murâ kikefuŋnao fodapewec.
39 Eme Jesuzi muwec, “No ŋic fuŋne-ŋeŋic bajaŋgeŋkepemurâ mâreŋko wahapo. Eme irec tiŋtuŋzi šâŋe fifi enšepieŋ â šâŋe fifizi tiŋtuŋ enšepieŋ.”
40 Iŋuc mume farisaio ŋic mâmâc domambiŋ jaŋe manarâ mumbiŋ, “Á nâŋe tiŋtuŋ me?”
41 Mupie Jesuzi jazawec “Ŋoŋe tiŋtuŋ jurâ muzac kiŋ tâmiric enšapiŋ. Ŋaŋac mueŋgopieŋ, `Nâŋe šâŋe fifi', irec kiŋ foŋareocmu.”