12
Jeremiazi Wofuŋ wiracneme micnao rowec
1 O Wofuŋ, go tiŋne rune,
irec no gohec dâŋgie bape go dâŋ tiŋne sasawa mucmu;
eme no sifu dâŋ mocjaha gohec muzo ekopac.
Ŋic hehesicne jaŋe wemocte juhâmoeŋgopieŋ,
â doc bapa ŋic jaŋe wemocte wiac sasawa mâririhec fua‐jareekac?
2 Goki jâc iŋucne sarac‐jopaekic,
eme jaŋe gâtâ barâ fua sokac erâ fârine bâfuaeŋgopieŋ.
Jaŋe micjeŋiczi sâsecguhuc
maŋjeŋiczi ine qikiŋgueŋgopieŋ.
3 O Wofuŋ, go nore fuŋne manakic,
go honecnuekic â maŋnane gorao domaekac me mâcne
irec fuŋne bataniŋkeekic.
Go lama qa hezuc ejareniŋte rocjopaeŋgopieŋ
irec sâc ŋic keci jaŋe rocjopazemec,
ehuc qa hezuc dameŋte woŋec bâtâcko râec‐jopazemec.
4 Mâreŋ hahaŋkeekac â gieo wiac rehacnehec hâmo ɋaŋac efâreekac
i mo dameŋko moc taraocmu?
Mâreŋ ŋecjucfâc‐ticne jaŋere hehesicte erâ
qowi mecne, wipe mecne omaeeŋgopieŋ.
Ŋiczi ʒiŋuc mueŋgopieŋ hâcne:
“Nâŋe hata âteeŋgopeneŋ i eki mi honeekac.”
5 Eme Wofuŋzi muwec:
“Go ŋic kikezi rarâ jaŋehec hata raku betaŋkecmuo
ine weniŋuc erâ becâsic jaŋehec sisiric gie bacmu?
Me mâreŋ moc wama fokacko ira sawa hâhâwicmâc jucmuo
ine Jordaŋ kâte uupicko weniŋuc ecmu?
6 Qomâfâcge â mamacgere kikefuŋ jaŋe doc bacgueŋgopieŋ wâc,
jaŋe râpefuŋgao hahaŋne bahuc wira owa egareeŋgopieŋ.
Jaŋe âgodâŋ gazapie dâŋjeŋic sifu mi manazemec.
7 “No ficnane behepo â biŋefâc‐nane qikiŋ‐jopapo,
erâ joroc biaŋ‐nane e râsifâc‐ticne jaŋere meo râepo.
8 Biŋefâc‐nane jaŋe nore maio kâte laioŋ iŋucne embiŋ,
jaŋe dâŋmarac‐jeŋic bafehuc owacke‐narembiŋ;
no irec hâcne qaisoc‐jopakopac.
9 Biŋefâc‐nane jaŋe wipe qâqâreŋ iŋucne me?
Irec tucwipe jaŋe rârec rârec tumaŋnehuc ruc bacneeŋgopieŋ?
Ajoc, kâte qowi sasawa ŋoŋe tumaŋneniŋ,
erâ ware qowi nâniŋ!
10 Lama soŋaŋ bocjahazi waiŋ gie‐nane sipirickembiŋ,
ehuc nore giegaŋ fowec i âtenʒaŋnembiŋ
â gie biaŋ‐nane i ima bajâmbâŋkembiŋ.
11 Jaŋe mâretec imackembiŋ,
ehame nore maio sesuctac fuawec fokac;
mâreŋ sasawa imacke‐fârekicne
ŋic jaŋe ine irec busâqoc moc mi manaŋgopieŋ.
12 Sisipiric ŋic jaŋe mâreŋ burocnere facne facne bazurâ wahambiŋ,
i Wofuŋtaonec ʒika hâcne,
eme izi mâreŋ qaŋeŋne mockonec fuŋkerâ
gie‐ticne baware raku qaŋeŋne mocko batarakac;
ehame wiac jujune i me i wama moc mi fuacnekac.
13 Jaŋe padi hândâŋne tiembiŋzi
wiac ʒârânehec qa roro embiŋ;
jaŋe ʒâic gie sawa bambiŋ,
fârine ine mi rombiŋ.
Jaŋe Wofuŋ kimbeŋ‐ticne hâhâwicne
irec erâ nânâ bâbâsu‐jeŋicte qurutuambiŋ.”
Wofuŋzi Israe diguracfâc‐jeŋic bâsirowec‐jopaocte mukac
14 Diguracfâc‐nane repicne jaŋe Israe ŋicfâc‐nane mâreŋ biŋe qajarepo i ba bâuac embiŋte Wofuŋzi jaŋere ʒiŋuc mukac: “Manakic, no mâreŋ‐jeŋickonec qâfiec‐jopapemu â Juda kikefuŋ jaŋe ŋondeŋ‐jeŋickonec unuc‐jopapemu wâc.
15 Unuc‐joparâ ʒâhec ine mocwâc busâqoc mana‐jarerâ ru sâc apa ŋosa mâreŋ‐jeŋicko jowac‐jopape risieniŋmu.
16 Jaŋe ŋicfâc‐nane Baali ere ʒâŋeo ɋetickehuc mumupaŋ dâŋ muniŋte hatane qazu‐jare jumbieŋ, sâc ijaha ŋicfâc‐nane jaŋere hata âtepie maŋjeŋic eocmuo, â nore ʒâŋeo ɋetickehuc, ‘Wofuŋ e jujâmbâŋkekac’, iŋuc muniŋmuo ine ŋicfâc‐nane jaŋere ŋondeŋko ŋec juc ehuc soka biaŋ enʒepieŋ.
17 Dâŋ mi mananiŋmu ŋicguru i jaŋe ine unuc‐jopa‐jâmbâŋkerâ bâsirowec‐jopapemu. Wofuŋ nore dâŋ iŋuc.”