44
Jeremia e Judaŋic Aigita mâreŋko jumbiŋ jaŋe findaŋdâŋ jazawec
1 Judaŋic sasawa Aigita mâreŋko Migidoli â Tapanese â Memfisi haeo erâ Patarosi mâreŋko jumbiŋ jaŋere dâŋ Jeremiarao kecʒiŋuc fuawec:
2 “Anutu Tâpiri Ɋuŋɋasaŋ Wofuŋ, Israere Anutu e ʒiŋuc mukac: Jerusalem hae â Juda mâreŋko hae gâcne sâko ŋerakac jaŋe wiac hâhâwicne mupe fua‐jare‐fârewec i ŋoŋe ŋaŋec hone manac embiŋ. Erâ manaŋgopieŋ, jaŋe ima bacjopakicne miŋecgac sesuctac foraŋgopieŋ jaha.
3 I hehesic‐jeŋicte iŋuc ejarekicne; jaŋe ra nemu furune, jaŋe mecne ŋoŋe mecne â mamacfâc‐ŋeŋic jaŋe mecne mi manac‐jopambiŋ, jaŋe hosâc âsu rike‐jarerâ kiŋaŋ qajarehuc bâiŋnumbiŋ hâcne.
4 No kiŋaŋŋicfâc‐nane sasawa, porofete hâcne, jaŋe dameŋ sâc ʒiŋuc ŋazaniŋte sorec‐jopa jupac: ‘Ŋoŋe wiac mamakâcne qaisockeekopac i moc mi enʒepieŋ.’
5 Jaŋe ine dâŋnane mi manambiŋ â hazec‐jeŋic wâc mi râembiŋ, irec hehesic‐jeŋic mi behehuc ʒuhuckerâ nemu hosâc âsu rike‐jare jumbieŋ.
6 Eme irec hâcne kimbeŋ â aaric‐nanere ʒocbâruŋzi Juda hae ŋerawec ira mecne â Jerusalem haeo mecne mâmâc bâruŋkewec; ehame hae wiac ʒaŋkerâ tuhune qarâ foweczi miŋecgac fokac jaha.
7 “Ʒi ine Anutu Tâpiri Ɋuŋɋasaŋ Wofuŋ, Israere Anutu hâcne, no ʒiŋuc mukopac: Judare ɋâricfâc, ŋoŋe wemocte guru‐ŋeŋicko ŋic ŋokac naru motec â ɋie jaŋe sirowe‐fâreniŋte wiac hâhâwicne sâko iŋucne bâfuaŋgopieŋ?
8 Ŋoŋe wemocte sipirickeniŋte â mâreŋko ŋicne ŋicne jaŋere ŋondeŋko sâwecte biŋe â mimi busâqocte biŋe eniŋte Aigita mâreŋko juzore fisirâ nemu hosâc âsu rike‐jareŋgopieŋ, ehuc eebapa‐ŋeŋic izi hâcne no bâiŋnuŋgopieŋ?
9 Ŋoŋe mamacfâc‐ŋeŋic â Juda ŋicwofuŋfâc â ŋonâŋfâc‐jeŋic jaŋe hehesic embiŋ irec mecne erâ ŋoŋe ŋaŋac â ŋokacfâc‐ŋeŋic Juda mâreŋko â Jerusalem haeo hehesic bâfuambiŋ irec mâmâc biac nikec‐ŋopawec me?
10 Ŋoŋe ine irec busâqoc moc mi manambiŋ erâ mi manahuc juŋgopieŋ; ŋoŋe nore mi hâwic‐ŋopawec â nore sâcmutâc â dâŋsanaŋ ŋoŋe â mamacfâc‐ŋeŋic ŋarepo irec sâcko wâc mi jumbiŋ.
11 “Irec Anutu Tâpiri Ɋuŋɋasaŋ Wofuŋ, Israere Anutu no ʒiŋuc mukopac: Manaŋgopieŋ, no Judaŋic bâsirowec‐ŋopa‐fârepemurâ râsi eŋarepe sisipiric fua‐ŋarezejec.
12 Eme Judaŋic ʒanʒaŋne Aigita mâreŋko rarâ juniŋte mumbiŋ jaŋe bâsirowec‐jopapemu, jaŋe Aigita mâreŋko sipiricke‐fâreniŋmu, ʒikare â rorocte hâmo sipiric eniŋmu; fekicne mecne wahakicne mecne jaŋe mâmâc ʒikare nânâ eniŋmu â nânâre hâmo sipiric eniŋmu hâcne, eme ŋic gâcnezi jaŋerao qâqiŋ qahuc sâwecdâŋ â sosopec dâŋ â mu hâhâwic dâŋ â mumusâqoc dâŋ muniŋmu.
13 Ehame Aigita mâreŋko juŋgopieŋ jaŋe Jerusalem hae rune ejarepo irec sâc jaha ejarehuc ʒika â roroc â huc hâmoc izi bâtiŋ‐jopapemu.
14 Eme Judaŋic ʒanʒaŋne Aigita mâreŋko juniŋte fisimbiŋ jaŋeraonec moczi moc Juda mâreŋko risieocte sâcne mi wiserâ ra juocmu; jaŋe risierâ ira ŋec juc eniŋte maŋhâhâŋ ejare‐bipieha mi risieniŋmu hâcne, jahecmaczi sawa wiserâ risieniŋmu.”
Sawa qânikiŋte ŋokac wofuŋ kiŋaŋ qacnembiŋ
15 Ŋonâŋfâc‐nâŋec jaŋe nemu hosâc âsu rike‐jare jumbieŋ, iŋuc manambiŋ ŋic i jaŋe mecne, â ŋokac guru sâko domambiŋ jaŋe mecne, erâ ŋic ŋokac Aigita â Patarosi mâreŋko jufârembiŋ jaŋe mâmâc Jeremia dâŋ ʒiŋuc bâtikiecnembiŋ:
16 “Go Wofuŋte micte dâŋ nâzâmec i mana rereŋ mi enaŋmu.
17 Aricne, nâŋe dâŋ mupaŋkembeŋ sâc irec fârine bâfuanaŋmu hâcne, ine kecʒiŋuc: Sawa qânikiŋ irec ŋokac wofuŋ e nâŋe mecne, mamacfâc‐nâŋec mecne, ŋicwofuŋfâc‐nâŋec mecne â kâcɋenefâc‐nâŋec mecne Juda mâreŋko hae ŋerakac ira â Jerusalem haeo ejumbeneŋ irec sâc jaha hosâc âsu rikecnehuc waiŋzi taha râcnenaŋmu. Nâŋe dameŋ ira nânâ fonârewecte nâ gapec embeŋ, ehuc sâcne juhapene wiac hâhâwicne moc mi fua‐nârewec.
18 Sawa qânikiŋ irec ŋokac wofuŋ hosâc âsu ririkecne â waiŋzi taha hohoŋkecne i behembeŋ dameŋ ira hâcne fuŋkerâ wiacte wiac basahuc juhapene ʒika â roroczi sipiric‐nâpoekac.”
19 Erâ ʒuhuckerâ mumbiŋ, “Nâŋe sawa qânikiŋ irec ŋokac wofuŋ hosâc âsu rikecneeŋgopeneŋ â waiŋzi taha hoŋkecneeŋgopeneŋ, ehuc nânâ poroŋzi hawari‐ticne bahuc rikeeŋgopeneŋ â waiŋzi taha hoŋkecneeŋgopeneŋ i ŋowefâc‐nâŋec jaŋe kâuc bahapie eeŋgopeneŋ me?”
20 Iŋuc mupie Jeremia e ŋicguru ʒeŋgoma, ŋic â ŋokac erâ gâcne sâko dâŋ iŋucne bâtikiecnembiŋ jaŋe ʒiŋuc jazawec:
21 “Macne, ŋoŋe mecne, mamacfâc‐ŋeŋic mecne, ŋicwofuŋfâc‐ŋeŋic mecne, fekicnefâc‐ŋeŋic mecne â ŋic ŋokac gâcne jaŋe mecne Juda mâreŋko hae ŋerakac ira â Jerusalem haeo hosâc âsu rike jumbieŋ, Wofuŋ e irec manasurâ bune ʒâʒâfic qawec.
22 Wofuŋ e juju â eebapa‐ŋeŋic hehesicne â mamakâcne i ʒuhuckerâ hone manac eocte takickewec. Eme irec hâcne mâreŋ‐ŋeŋic i tuhutac fuawec; ehame ŋiczi honepie bipic tataranehec â sâwechec ewec. Eme tuhutac fuarâ foweczi miŋecgac iŋucnea fokac.
23 Ŋoŋe hosâc âsu rikehuc Wofuŋ bunao bambiŋ, ehuc dâŋticne mana rereŋ mi embiŋte â sâcmutâc dâŋticne â dâŋsanaŋ‐ticne erâ mumutaniŋ dâŋticne irec sâcko mi jumbiŋte wiac hâhâwicne kecizi fai‐ŋeŋicko fewec i miŋecgac fokac jaha.”
24 Erâ Jeremia e ŋicguru ʒeŋgoma â ŋokac sasawa jaŋe ʒuhuckerâ ʒiŋuc jazawec: “Juda mâreŋkoneczi Aigita mâreŋko jufâreŋgopieŋ ŋoŋe Wofuŋte dâŋ ʒi mananiŋ:
25 Anutu Tâpiri Ɋuŋɋasaŋ Wofuŋ, Israere Anutu e kecʒiŋuc mukac: Ŋoŋe â ŋokacfâc‐ŋeŋic micŋeŋiczi dâŋ ʒiŋuc mupaŋkerâ meŋeŋiczi irec fârine bâfuaeŋgopieŋ: ‘Nâŋe sawa qânikiŋte ŋokac wofuŋ hosâc âsu rikecnenaŋte â waiŋzi taha hoŋkecnenaŋte dâŋ mupaŋkembeŋ i soŋaŋkehuc junʒepeneŋ.’ Sâcne, murâ iŋuc eniŋ, ehuc mumupaŋ dâŋŋeŋicte fârine bâfua‐jâmbâŋkeniŋ!
26 Irec Juda mâreŋkoneczi Aigita mâreŋko jufâreŋgopieŋ ŋoŋe Wofuŋ nore dâŋ mananiŋ: No ʒiŋuc mukopac hâcne: Manaŋgopieŋ, no ʒâŋe sâko‐naneo ɋetickehuc ʒiŋuc mupaŋkekopac: Juda mâreŋkoneczi Aigita mâreŋko juŋgopieŋ ŋoŋeraonec moczi ʒâŋe‐nane mu bâuac ehuc ʒiŋuc mocwâc mi muzejec, ‘Wofuŋ Anutu e jujâmbâŋkekac.’
27 Jâmbomac, bâbâpiaŋ mâcne, sisipiric fua‐ŋareocte ruc bahuc jukopac; ehame Juda mâreŋkonec Aigita mâreŋko juŋgopieŋzi ʒikare â nânâre hâmo sipiric enʒepieŋ, iŋuc eku arictac efârenʒepieŋ.
28 Â ʒika maŋnaonec wiseniŋmuzi ine Aigita mâreŋkonec Juda mâreŋko risieniŋmu, erâ i afecne maczi sawa eniŋmu; ehuc Juda mâreŋkoneczi Aigita mâreŋko juniŋte rambiŋ irec ŋic ʒanʒaŋne jaŋe nore dâŋzi me jaŋacne dâŋzi fârinehec ewec i mana tara‐fâreniŋmu.
29 Eme irec maqâreŋ kecʒiŋuc fua‐ŋarezejec: No hae mâreŋ ʒira hâcne bâtiŋ‐ŋopapemu; eme uŋdâŋ ŋazapo i jâmbomac fârio qaocmu, iŋuc mana taranʒepieŋ, Wofuŋ nore dâŋ iŋuc.
30 Erâ ʒuhuckerâ ʒiŋuc ŋazakopac: Manaŋgopieŋ, no Farao Hofara, Aigita ŋicwofuŋ hâcne, e râsifâc‐ticne â juju‐ticne sipirickezo muŋgopieŋ jaŋere meo râepemu, ine Juda ŋicwofuŋ Zedekia e Babe ŋicwofuŋ Nebukaneza ere meo râepo irec sâc, e hâcne râsi ecnehuc juju‐ticne sipirickezo muwec.”