6
Wiac hâhâwicne fisi‐jareocte mukicne
1 Faic mâreŋkonec wiac hâhâwicne
â sisipiric sâko wareocte faharekac,
irec Benjamiŋte ɋâricfâc ŋoŋe
Jerusalem hae maŋnaonec wiseniŋ!
Tekoa haeo qeŋ qaniŋ
â Bete‐Kerem haeo ira hosâc heniŋ.
2 No Zioŋte otâ hone jauŋ ecnehape aŋac faio
soka sanaŋ ewec e hâcne sipirickepemu.
3 Lama bulimakao soŋaŋ jaŋe
qowifâc‐jeŋic jaŋehec fisicneniŋmu,
ehuc hae rârec rârec qoruc boze‐jeŋic fâreniŋmu,
â ru sâc qowifâc‐jeŋic ejarepie
nânâ nâhuc juniŋmu.
4 Jaŋe ʒiŋuc muniŋmu: “Zioŋ rune jaŋehec
ʒika qanaŋte sowa juhuc ʒawienaŋ!
Ajoc, ʒoaŋ ɋaɋackoa ferâ jopanaŋ me!”
Iŋuc murâ muniŋmu: “Jei, ʒoaŋ biac huzo ekac â mumuc biac ʒorakac.
5 Ajoc, ŋafeo fenaŋ,
erâ erific ŋerakac sâc ima banaŋ!”
6 Anutu Tâpiri Ɋuŋɋasaŋ Wofuŋ e ʒiŋuc mukac hâcne:
“Jâc wiac qafaraniŋ, ehuc Jerusalem haere
somâ râehuc mâreŋ facne moc baniŋ.
Jei, hae sâko irec maŋnao bâbâʒâic sasawa fokacte
okacne fuacnezejec hâcne.
7 Opâ ʒâŋeonec opâ wefuekac
irec sâc jaha hae ira sâqocnezi fuaekac,
hae maŋnao bâbâʒâic â sisipiric
irec dâŋ fohuc juekac;
erâ ʒârâ ʒâpâ â ʒika dameŋ sâc
mai‐naneo fuame honeekopac.
8 O Jerusalem, go uŋdâŋ manac!
Maŋnanezi behecgurâ ima bacgupe
hae sesuctac fuarâ fozicte.”
9 Anutu Tâpiri Ɋuŋɋasaŋ Wofuŋ e ʒiŋuc mukac:
“Ŋiczi waiŋ qizecko fârine bâtirikicne
ʒâhec ro nusec eeŋgopieŋ irec sâc jaha
Israe ŋic nâfocne ro nusec ejarezemec;
waiŋ gie bapazi waiŋ qaŋeŋnao
harierâ hândâŋne basaekac
iŋuc jaha ehuc Israe ŋic rocjopa‐fârezemec.”
10 Eme mupo: “Weni jaŋe mu tutuc ejarepemu,
â weni jaŋe uŋsawaŋ dâŋ jazape mananiŋmu?
Manakic, jaŋe hazec‐jeŋic bâzickekicne,
dâŋ sâcne mi manaeŋgopieŋ.
Jâmbomac, jaŋe Wofuŋ dâŋgere manapie
ʒoraŋ eha mana aŋac mi eeŋgopieŋ.
11 Irec Wofuŋ gore kimbeŋzi fusucmacnukac,
no bâmunaŋkezore eipiekopac.”
Iŋuc mupe Wofuŋzi ʒiŋuc nazawec:
“Naru motec hae ʒoŋao juŋgopieŋ jaŋere faio hoŋkec,
â ŋicmotec tumaŋnerâ juŋgopieŋ jaŋere faio mâmâc.
Ŋowe ŋonâŋ jaŋe mecne, ŋic ŋokac qizecne jaŋe mecne,
erâ hâmoc dameŋ‐jeŋic bembeŋkekac
jaŋe mâmâc kâpâcwâru bacjopa razo.
12 Fic wiac‐jeŋic mecne, gie wiac‐jeŋic mecne,
â ŋokacfâc‐jeŋic i mâmâc ŋicguru moc jaŋere biŋe eniŋmu,
no menane sicnehuc mâreŋ ʒirec ŋecjucfâc‐ticne
râsi ejarepemu hâcne.
Wofuŋ nore dâŋ iŋuc.
13 “Ŋic omane mecne, fekicne mecne,
jaŋe mâmâc sasawa burecko moneŋ mafa hureniŋte andac eeŋgopieŋ,
Erâ porofete â taha bapa jaŋe wâc
ʒeŋgoma eatuc ehuc jueŋgopieŋ.
14 Wama moc mi fohame sifu ‘Wama, wama’ muhuc
ŋicfâc‐nane jaŋere huc wic burec burec mac
sawa bâsomieeŋgopieŋ.
15 Jaŋe wiac mamakâcne ehuc moc mimiembiŋ me?
Aricne, jaŋe moc mi mimiehuc mimi jaŋgeŋ jueŋgopieŋ i!
Irec waha jopaocmu jaŋehec mâmâc waha jopazejec,
eme no bâtiŋ‐jopapemu dameŋ ira
fâfâc‐jopame rândiŋkenʒepieŋ.
Wofuŋ nore dâŋ iŋuc.”
Anutuzi bâipiec‐jopame okacne fisi‐jareocmu
16 Wofuŋzi kecʒiŋuc mukac:
“Ŋoŋe hata fokac i ra honeniŋ,
ehuc mârâc jaha hata weniŋuc fowec
â bibiaŋte hata i wena fokac
irec mu wioc erâ bâfuarâ ranʒepieŋ,
ehuc jujumana bâfuanʒepieŋ.
Jaŋe ine mumbiŋ, ‘Mi ranaŋmu.’
17 Eme no ruc bapa ŋic râec‐jopahuc mupo,
‘Ŋoŋe qeŋfânâŋte hazec râeniŋ.’
Jaŋe ine mumbiŋ, ‘Nâŋe irec takic‐nâpokac.’
18 Irec jaŋe wemo wiac fua‐jareocmu i ŋicne ŋicne ŋoŋe mananiŋ,
â kikefuŋ go wâc mana tarac.
19 Mâreŋ sâko mâreŋ go manac: Noni mupe
wiac hâhâwicne ŋicguru ʒi jaŋere faio feocmu,
i jaŋe jaŋac wiac mana biric embiŋ irec fâricne;
jaŋe dâŋnane mana rereŋ mi embiŋ
â sâcmutâc dâŋnane qikiŋnembiŋ hâcne.
20 Iŋuc ehapie Seba mâreŋkonec wiac âsu biaŋ
â mâreŋ ʒorickonec musijâc sahacne izi wemo enareocmu?
Qowi hâcbuc ririke‐ŋeŋicte mocwâc mi aŋacnukac,
â taha bâzi‐ŋeŋicte wâc mi enarekac.
21 Irec Wofuŋ no ʒiŋuc mukopac:
‘Manakic, no ŋicguru ʒi jaŋere hatao
kike hehepiric qânâ hepe ŋeraocmu,
eme ira herâ waha jopaocmu,
mame ŋokâ â âgo bago jaŋe mâmâc ira sipirickeniŋmu.’ ”
22 Wofuŋzi kecʒiŋuc mukac:
“Manakic, ŋicguru moc jaŋe faic mâreŋkonec
wareniŋte ʒawieŋgopieŋ,
ŋicguru sâkozi mâreŋ qaŋeŋnaonec
wareniŋte fahareŋgopieŋ hâcne.
23 Jaŋe tepe damu‐jeŋichec, jaŋe momori jâmbâŋ,
ŋic moc mi akic‐jopaeŋgopieŋ,
ojowa‐jeŋic i hâwec siri sâkore fânâŋ iŋucne,
jaŋe becâsic faio wareŋgopieŋ,
ehuc ʒika qaniŋte birickehuc Zioŋte otâ go
râsi egareŋgopieŋ.”
24 Jerusalem hae rune jaŋe mumbiŋ:
“Nâŋe biŋe‐jeŋic manarâ menâŋec betaŋkekac,
erâ hâwic‐nâpoha ŋokac moczi
motec roocte gozi kime ʒâic manaekac
irec sâc ʒâic manaŋgopeneŋ.
25 Irec nâŋe gieo mi ranʒepeneŋ,
â hata sâkoo wâc mi junʒepeneŋ,
ira hâcne râsi jaŋe ʒika gie baŋgopieŋ,
â rârec rârec hâhâwic sâko fokac.”
26 Eme Wofuŋzi muwec:
“O ŋicfâc‐nanere otâ, go mateŋ qonaŋkec,
erâ ʒafe ruarâ ŋokâ mocjaha sawa jurâ hâmome mamakucne eeŋgopieŋ
irec sâc jaha ki mamakuc hâhâwicne ezemec,
sisipiric ŋic e ututuŋ jâmbâŋ fisi‐gareocmu irec.
27 “Jeremia, go ŋicfâc‐nane jaŋere juju â eebapa
hone tarahuc ba esâic ecmurâ mugarepo.
28 Jaŋe ʒeŋgoma râŋgeŋke sanaŋkembiŋ,
ehuc afeckerâ micko âkec eeŋgopieŋ;
jaŋe qânâ â aeŋ iŋucne
sisipiric gie bafâreeŋgopieŋ.
29 Ʒoc ficnepie bâruŋkewec,
eme aeŋ wiac ʒocko rikepie mi wosâewec;
gie i maŋgâŋ bakicne,
ŋic sindaŋne jaŋe wosâerâ mi râriembiŋ.
30 Irec ʒâŋe‐jeŋic ʒiŋuc muzo: ‘Siliwa qaisockekicne’;
i Wofuŋ noni qikiŋ‐jopapo irec.”