4
Jordaŋ opâonec qânâ 12 rombiŋ
Eme ŋic guru sâko jaŋe Jordaŋ fotâcne‐fârepie Wofuŋzi Josua ʒiŋuc âzâcnewec: “Ŋic guru sâc jaŋeraonec ŋic moc moc rocjopatec 12 enʒepieŋ. Erâ jazazemec: ‘Jordaŋ ʒâʒâŋiŋ, taha bapa jaŋe domaŋgopieŋkonec jâmbâŋ qânâ 12 rorâ hâpo ranʒepieŋ. Ehuc hae ŋafeme foniŋmu ira hepie ŋezejec.’ ” Eme Josuazi Israe ŋic jaŋeraonec guru sâc ŋic moc moc bâwosâec‐jopame 12 embiŋ jaŋe hefârec‐jopawec. Ehuc jazarâ muwec: “Wofuŋ Anutu‐ŋeŋicte katapare maŋfuŋko fotâcnehuc Jordaŋ ʒâʒâŋiŋ‐ticnaonec ru sâc qânâ rorâ hâpopie Israe ŋic guru ʒare‐nâŋecte sâc ezejec. Eme izi ŋoŋerao ma moc ezejec. Ehame juku ɋâricfâc‐ŋeŋic jaŋe wio‐ŋarehuc ʒiŋuc muniŋmu: “Qânâ ʒirec fuŋne weniŋuc fokac?” Wio‐ŋarepie ʒiŋuc jazanʒepieŋ: ‘Wofuŋte ʒâʒâfic katapare maio Jordaŋ opâzi tâcnewec. Tâcneme fotâcnembiŋ. Eme Israe ŋic jaŋe raŋɋa raŋɋa irec manasuhuc juniŋte qânâ ʒizi majeŋic erâ ŋehuc juzejec.’ ”
Josua e Wofuŋzi âzâcnewec irec sâcko ŋic ejareme jaŋe Jordaŋ ʒâʒâŋiŋkonec qânâ 12 Israe ŋic guru ʒare‐jeŋicte sâc rombiŋ. Erâ hâpo raku fombiŋkoa hepie ŋewec. Eme Josuazi qânâ 12 rorâ Jordâŋ ʒâʒâŋiŋko taha bapa jaŋe ʒâʒâfic katapa reŋkerâ ra domambiŋko hewec. Eme qânâ i dameŋ ʒiŋuczia ŋekac jaha. 10 Taha bapa jaŋe katapa reŋkerâ Jordaŋ ʒâʒâŋiŋ‐ticnao domambiŋ. Ehame Josua e ŋic dâŋ jazaocte Wofuŋzi âzâcnewec irec sâc jazame wiac sasawa efârembiŋ. I Mosezi Josua mutâcnecnewec irec sâcko embiŋ hâcne. Eme ŋic ŋokac jaŋe ʒocnehec fotâcnembiŋ.
11 Fotâcne‐fârepie Wofuŋte katapa reŋkembiŋ taha bapa i jaŋe tiŋko ferâ ŋic ŋokac bânie‐jarembiŋ. 12 Mosezi jazawec irec sâcko Rubeŋ â Gade jahere ɋâricfâc â Manasere ŋicguru dâkâne jaŋe ʒika bâmockerâ Israe ŋic ŋokac bânie‐jarembiŋ. 13 Eme ʒika qaniŋte ʒawiembiŋ ʒare‐jeŋic 40 tauseŋ i jaŋe ʒika sâko qaniŋte Wofuŋte maio Jeriko wâneŋko rambiŋ. 14 Ehame ʒoaŋ ira Israe ŋic sasawa jaŋere ʒâŋe faio Wofuŋzi Josua ʒâŋe biŋe‐ticne bafaharewec. Eme jaŋe Mosezi jume hone warec ecne jumbieŋ iŋuc jaha Josua honerâ bipic tatara ejareha jujumbieŋ.
15 Eme Wofuŋzi Josua kecʒiŋuc âzâcnewec: 16 “Go taha bapa sâcmutâcte katapa reŋkeŋgopieŋ jaŋe ejaretec Jordaŋkonec wefuniŋ.” 17 Irec Josuazi taha bapa ʒiŋuc jazawec: “Ŋoŋe Jordaŋkonec wefuniŋ.” 18 Mume taha bapa Wofuŋte ʒâʒâfic katapa reŋkembiŋ jaŋe Jordaŋ ʒâʒâŋiŋkonec ferâ tiŋko âtehapie Jordaŋ opâzi fofo‐ticnao mocwâc risierâ qaŋeŋne sâcke‐fârerâ fofone sâc fowec.
19 Eme ŋic ŋokac jaŋe fufuŋke mosa‐jeŋic irec ʒoaŋ gie bapa 10 ira Jordaŋ fotâcnerâ tiŋko fefârembiŋ. Ehuc Jeriko hae mâreŋ bâqiŋkehuc ʒoaŋ wewefuopec Giligali haeo teuŋ âterâ fombiŋ. 20 Eme qânâ 12 Jordaŋkonec rombiŋ i Josuazi Giligali haeo ma heme ŋewec. 21 Ehuc Israe ŋic ŋokac jazarâ muwec: “Juku ɋâricfâc‐ŋeŋic jaŋe, ‘Qânâ ʒi fuŋne wemocte ŋekac?’ Mamacfâc‐jeŋic iŋuc wio‐jarepie 22 ʒiŋuc muhuc jazanʒepieŋ: ‘Israe ŋic jaŋe Jordaŋ opâzi kereŋkeme fotâcnembiŋ irec ma.’ 23 Wofuŋ Anutu‐ŋeŋiczi mume Hâwec Bâbâroŋ kereŋkeme fotâcnembeŋ iŋuc jaha Wofuŋ Anutu‐ŋeŋiczi mume Jordaŋ opâzi kereŋkeme ŋoŋe fotâcnembiŋ. 24 Eme mâreŋ sâc ŋic gurune gurune jaŋe, Wofuŋte me i tâpirihec, iŋuc mana taranʒepieŋ. Ehame ŋoŋe raŋɋa raŋɋa Wofuŋ Anutu‐ŋeŋic araŋ bacnehuc junʒepieŋ.”