15
Abiamzi ŋicwofuŋ juwec
(Bin II 13:1–22)
1 Nebatere ŋokâ Jeroboam e ŋicwofuŋ jume jara 18 eha Abiamzi fuŋkerâ Judaŋic qaŋeŋ‐jopahuc ŋicwofuŋ ewec.
2 Ehuc Jerusalem haeo jara jahec â moc juwec. E neŋgoc‐ticne i Abisalomte otâ, ʒâŋene Maka.
3 Abiam e juwicnao mamac‐ticnezi hehesic sasawa ebac ewec ijaha bâjâpewec. Ehuc apa‐ticne Dawidire maŋzi fowec irec sâc Abiamte maŋzi Wofuŋ Anutu‐ticnerao hâcbuc jâmbâŋ mi fowec.
4 Ehame ine sifu Wofuŋ Anutu‐ticnezi Dawidire erâ Jerusalem haeo tatamac moc râcnehuc ere faicnao ŋokâ‐ticne âkendâŋnewec, ehuc Jerusalem hae basanaŋkewec.
5 Dawidi e mi qâsoriehuc juwec sâc Wofuŋzi wiac sasawa mutâcnecnewec i ʒâŋe fai‐ticnao ebac efârewec hâcne. Mâc, Hitiŋic Uriarao sawa wiac eme sifuckewec.
6 Abiam e juhame Rehoboam â Jeroboam jahe qaqac ehuc jupic.
7 Eme Abiamzi wiac sasawa ebac ewec irec binaŋ i Juda ŋicwofuŋ jaŋere Binaŋ Qâhâc papia qizecko qâreŋke‐fârekicne. Eme Abiam â Jeroboam jahe qaqac ehuc jupic jaha.
8 Eme Abiam e apa ŋosafâcne jaŋerao ʒuhuckehuc hâmome Dawidire hae qizecko duckembiŋ. Ehame ŋokâ‐ticne Asazi tucticne qarâ ŋicwofuŋ juwec.
Asazi ŋicwofuŋ juwec
(Bin II 14:1–5; 15:16–19)
9 Jeroboam e Israe ŋic jaŋere ŋicwofuŋ jume jara 20 eha Asazi fuŋkerâ Judaŋic qaŋeŋ‐jopahuc ŋicwofuŋ ewec.
10 Ehuc Jerusalem haeo jara 41 ŋicwofuŋ juwec. E mimi‐ticne i Abisalom otâ‐ticne, ʒâŋene Maka.
11 Eme Asa e apa‐ticne Dawidizi ewec irec sâc jaha ehuc Wofuŋte maio wiac sasawa etiŋne‐fârewec.
12 Ehuc mâreŋ ira sasec ŋic boe sau gie bahuc jumbiŋ jaŋe bârâriec‐jopawec, erâ mamac‐ticnezi ɋâŋ qâqâtâc barawec, i wâc iŋuc jaha bârârie‐fârewec.
13 Erâ Asa e mimi‐ticne Makazi Asera nemure ɋâŋ qâqâtâc repicne barâ bajuwecte eki ŋokac wofuŋ mi juocte bârâriewec wâc. Ehuc ɋâŋ qâqâtâc‐ticne i hetâc qâtâcnerâ Kidoroŋ opâo rikewec.
14 Erâ furu mâreŋ ine mi bârâriewec. Erâ sifu maŋticne i hâcbuc jaha Wofuŋtao râeme fowec.
15 Erâ e mamac‐ticnere â e jahacne taha bâtirikicne siliwa â gol â râqâc wiac i bafisi Wofuŋte ufuŋko râewec.
Asa â Beŋhada jahe ʒâʒâfic epic
(Bin II 16:1–14)
16 Asa â Israe ŋicwofuŋ Basa jahe jupic sâc ŋondeŋ‐jekicko ʒika fuahuc fowec.
17 Eme Israe ŋicwofuŋ Basa e Judaŋic râsi rojarehuc ferâ Rama hae bawec. E ŋic i me i moczi Juda ŋicwofuŋ Asarao rac warec mi eniŋte iŋuc ewec.
18 Eme Asa e Wofuŋ ufuŋ‐ticnere kânoŋko â ŋicwofuŋ ficte kânoŋko siliwa â gol gâcne fowec i rorâ kiŋaŋ qaqafâcne jarewec. Erâ Taberimoŋte ŋokâ Siria ŋicwofuŋ Beŋhada, Hezioŋ ŋosa‐ticne hâcne, e Damasko haeo juhame kiŋaŋ qaqafâcne dâŋ ʒiŋuc jazahuc erao sorec‐jopawec:
19 “Mamac jahec‐nâhec jaherao ʒâʒâfic fowec irec sâc nâhâc ʒâʒâfic moc bâfuazeperec. Irec no bubiaŋte wiac siliwa â gol râe‐garekopac i honezemec. Erâ go rarâ Israe ŋicwofuŋ Basahec ʒâʒâfic‐ŋekic fokac i hetâcnezemec. Iŋuc etec no behecnuzejec.”
20 Iŋuc mume Beŋhada e ŋicwofuŋ Asare dâŋ manarâ Israe hae râsi rojareniŋte momorifâcne jaŋere micne sorec‐jopawec. Eme jaŋe rarâ hae ʒiŋuc ro rauc embiŋ: Ijoŋ, Daŋ, Abe‐Bete‐Maka, erâ Kinerote mâreŋ â Naftali mâreŋ sasawa i mâmâc.
21 Eme Basa e biŋe i manarâ Rama hae bahuc juwec i beherâ Tiriza haeo ra juwec.
22 Ehame ŋicwofuŋ Asa e ŋic moc mi hetiric‐jopahuc dâŋ musaweme Juda mâreŋ sâcke‐fârewec. Eme jaŋe Basazi Rama hae bahuc qânâ â katapa rome fewec i ropie rawec. Rame ŋicwofuŋ Asa e wiac izi Benjamiŋ mâreŋko Geba hae â Mizipa hae bawec.
23 Eme Asazi wiac sasawa ebac ewec â tâpiri‐ticnere fuŋne, erâ hae barawec irec binaŋ i Juda ŋicwofuŋ jaŋere Binaŋ Qâhâc papia qizecko qâreŋke‐fârekicne. Juku Asa e ŋicqizec jâmbâŋ ehame kike jahecne demba qawec.
24 Eme Asa e apa ŋosafâcne jaŋerao ʒuhuckehuc hâmome jaŋe fombiŋkoa apa‐ticne Dawidire hae qizecko duckembiŋ. Ehame ŋokâ‐ticne Josafatazi tucticne qarâ ŋicwofuŋ juwec.
Nadabazi ŋicwofuŋ juwec
25 Asa e Juda ŋicwofuŋ jume jara jajahec eha Jeroboamte ŋokâ Nadabazi fuŋkerâ Israe ŋic qaŋeŋ‐jopahuc ŋicwofuŋ juwec. Ehuc jara jajahec Israe ŋicguru ŋicwofuŋ ejarewec.
26 Erâ mamac‐ticnezi Israe ŋic ejareme hehesic bâfuambiŋ hata i bâjâpehuc Wofuŋte ʒâŋe faio wiac mamakâcne ewec.
27 Nadaba â Israe ŋic jaŋe Filisa ŋic jaŋere hae moc ʒâŋene Gibetoŋ i somâckehuc fohapie Isasa kikefuŋkonec Ahiare ŋokâ Basazi râsi rocnehuc fisirâ qâhâmowec.
28 Asa e Juda ŋicwofuŋ jume jara jahec â moc eha Basazi Nadaba qâhâmorâ ere okacne ŋicwofuŋ ewec.
29 E ŋicwofuŋ ehuc izia Wofuŋzi kiŋaŋŋic‐ticne Silo haeonec Ahiarao dâŋ muwec irec sâcko Jeroboamte kikefuŋ sasawa jopa‐fârewec. E wiac jujune moc mi akic‐jopahuc ʒeŋgoma jopa miziewec hâcne.
30 Wiac i Jeroboamzi hehesic bâfuahuc Israe ŋic ejareme ijaha embiŋ irec mecne â Israere Wofuŋ Anutu aaric bâfuacnewec irec erâ mâmâc iŋuc fuawec.
31 Eme Nadabazi wiac sasawa ebac ewec irec binaŋ i Israe ŋicwofuŋ jaŋere Binaŋ Qâhâc papia qizecko qâreŋke‐fârekicne.
32 Eme Asa â Israe ŋicwofuŋ Basa jahe jupic sâc qaqac ehuc jupic.
Basazi ŋicwofuŋ juwec
33 Asa e Juda ŋicwofuŋ jume jara jahec â moc eha Ahia ŋokâ‐ticne Basazi fuŋkerâ Israe ŋic jaŋere ŋicwofuŋ ehuc Tiriza haeo juwec. E ŋicwofuŋ juhame jara 24 tarawec.
34 E Jeroboamzi hata hehesicne âtehuc Israe ŋic ejareme hehesic jaha bâfuambiŋ i hâcne bâjâpehuc Wofuŋte ʒâŋe faio wiac mamakâcne ewec.