17
Eliazi ʒoaŋ sanaŋ qaocmu irec findaŋdâŋ muwec
1 Gileade mâreŋko Tisibe hae ŋewec irecnec ŋic moc ʒâŋene Elia eki Ahaba ʒiŋuc âzâcnewec: “Wofuŋ Israere Anutu, mai‐ticnao no domakopac e jujâmbâŋkekacte jarane jarane titikuc me hoe moc mi wahazejec. Mâc, noni mupe ine wahaocmu.”
2 Ehame Wofuŋte dâŋzi Eliarao ʒiŋuc fuawec:
3 “Mâreŋ ʒi beherâ ʒoaŋ wewefuopec rac, erâ opâ pitic moc ʒâŋene Keriti, ʒoaŋ wewefunaonec ware Jordaŋko hukac, ira soŋkezemec.
4 Opâ i fia nâc ehuc juzemec, eme nânâ ine kâec kâec jaŋe bafisi garehuc juniŋte mupaŋke‐jarepac.”
5 Eme e rahuc Wofuŋzi mutâcnecnewec irec sâcko ewec: Ra opâ pitic Keriti ʒoaŋ wewefunaonec ware Jordaŋko hukac, ira ŋec juc ewec.
6 Eme kâec kâec jaŋe furicte poroŋ â qowi bafisi râcnehuc jumbiŋ â opâ ine fia nâc ehuc juwec.
7 Eme hae mâreŋ sâc hoe moc mi hewecte opâ i piticne fofeku ʒickewec.
8 Eme Wofuŋte dâŋ moc ra bâfuawec ine ʒiŋuc:
9 “Ajoc, fahare Zarefati haeo rac, i Sidoŋ irec hae pitic moc, erâ ira ŋec juc ezemec. Manakic, no hae irec ŋokac hozec moc nânâ gumecguocte mupaŋkecnepac.”
10 Iŋuc âzâcneme faharerâ Zarefati haeo rawec; rarâ haesac motâcko fisirâ honewec: Ŋokac hozec moc jâc haharine nusehuc juwec. Eme wiracnerâ muwec, “Opâ moc râqâcko fiarâ baware narec nâpe.”
11 Raha rahame mocwâc wirarâ muwec, “Poroŋ dâkâne mac moc mâmâc bawarezemec.”
12 Eme dâŋ ʒiŋuc bâtikiecnewec: “Wofuŋ Anutugere maio mukopac, wiac ʒakicne moc mi fonarekac, poroŋ uucne kuʒio ŋenarekac ine me mocjahazi roronere sâc, erâ kiruŋko wokemaŋ kasaŋne mac ŋekac, iŋuc sawa. Ʒine hâcne ʒoc haharine nusekopac i ficko bararâ ruqepe ʒame motec‐nanehec nâhere poroŋ rikepemu. Eme i sawa nârâ ŋeku hâmonacmu.”
13 Eme Eliazi âzâcnewec, “Mi hâwicguoc, ficgao rarâ mukomec iŋuc ezemec. Qanaŋ ine nore poroŋ piticne mac moc rikerâ baware naretec nâzepac, ehame ʒâhec motecgehec ŋahacne rike bâmoc ezemec.
14 Wofuŋ, Israe ere Anutu, e ʒiŋuc mukac: Poroŋ kuʒio ŋekac i mi qosackeocmu, â wokemaŋ kiruŋko ŋekac i mi ʒickeocmu, tiwâne ŋehuc jaha juhame Wofuŋzi mume mâreŋko hoe hezokac.”
15 Eme e rarâ Eliazi muwec sâc ewec. Eme Elia mecne, ŋokac mecne â wiacfâcne mecne, dameŋ ʒora nânâ mi basambiŋ.
16 Kuʒio poroŋ mi qosackewec â kiruŋko wokemaŋ mi ʒickewec, Wofuŋte dâŋ Eliare mickonec wahawec i sanaŋkewec hâcne.
17 Eme irec faicnao ŋokac fic rune ere ŋokâ e huc bawec. Erâ huc boc ŋemâckecneme jujunere sâc mi ewec.
18 Eme ŋokac e Elia ʒiŋuc muhuc âzâcnewec: “O Anuture ŋic, go wemocte râsi enarekomec? Go kiŋ bahac‐nane manasupemurâ â ŋokâ‐nane ecnetec hâmoocte fisimec hâcne!”
19 Iŋuc mume Eliazi âzâcnewec, “Ŋokâge narec.” Iŋuc murâ neŋgoc‐ticnere qickonec rorâ ficmaŋ faic e jahac fohuc juwec ira baferâ e jahacne fofoo râeme fowec.
20 Fohame Wofuŋ ʒiŋuc muhuc wâsickewec: “O Wofuŋ Anutu‐nane, no ʒira ŋokac hozec ehec jaba juhape go jâmbomac ŋokâ‐ticne qahuc wiac qeŋ bipinehec ʒi bâfuakomec.”
21 Iŋuc murâ motecte faio arec jahec â moc waha foc fahac erâ ʒiŋuc muhuc Wofuŋ wâsickewec: “O Wofuŋ Anutu‐nane, go motec ʒirec qâqâtâc mocwâc bârisiec.”
22 Iŋuc numume Wofuŋzi Eliare dâŋ manawec. Ehame motecte qâqâtâczi mocwâc risieme ɋârewec.
23 Eme Eliazi motec rorâ ficmaŋ faic irecnec bawaharâ neŋgoc‐ticne râcnehuc muwec, “Honekic, ŋokâge jukac.”
24 Eme ŋokaczi Elia âzâcnehuc muwec, “Go Anuture ŋic â micgao dâŋ fokac i Wofuŋte dâŋ fârine i miŋecgac mana tarakopac.”